داخوازا زێدهكرنا بههرا ههرێمێ یا دهرمانان دهیته كرن
ئهڤرۆ نیوز ، زنار تۆڤى:
د. دالیا فهرهاد حاجى ئهنداما پهرلهمانێ عیراقێ ل سهر فراكسیۆنا پارتى دیموكراتى كوردستان بۆ ئهڤرۆ نیوز دیاركر: كو ئهڤرۆ ئهینیێ وان كۆمبوونهك ل گهل وهزیرێ ساخلهمیا عیراقێ ئهنجامدایه، ژ پێخهمهت باشتركرنا رهوشا ساخلهمیێ ل عیراقێ و ههرێما كوردستانێ و ئهڤه جارا ئێكێ یه ئهو ل گهل وهزیرێ ساخلهمیێ كۆم دبن، دیسا د وێ كۆمبوونێ دا وان داخواز ژ وهزیرێ ساخلهمیێ كریه كو بههرا ههرێما كوردستانێ یا دهرمانان بهێته زێدهكرن، چونكى رێژهكا مهزن یا ئاوارێن عیراقێ ل كوردستانێ دژین و ئهو رێژا بهرى نوكه بۆ ههرێما كوردستانێ دهات تێرا ناكهت، ههروهسا ههر دهمێ وهزیرێ ساخلهمیێ ل حوكمهتا ههرێمێ بهێته دانان، ل وى دهمى ئهم پێكڤه روونین خوار و ههر پێدڤیاتهكا ههرێمێ ههبیت، ئهم دێ ژ وهزیرێ ساخلهمیا عیراقێ داخواز كهین و مه ل بهره بههرا ههرێمێ زێده بكهین، ژ پێخهمهت دهرمان و پێدڤیێن ساخلهمیێ ب رهنگهكێ باشتر ب گههنه كوردستانێ، ههر چهنده ئهڤه دمینیته لدووڤ رێژا بوودجێ گشتى یێ عیراقێ بۆ سالا 2019، لێ ههكه بوودجێ كوردستانێ بهێته زێدهكرن، دێ رێژا دهرمانان ژى بۆ ههرێمێ زێده بیت.
ناڤهاتیێ گۆت ژى: مه گهلهك بزاڤكرینه كو رێژا ههرێمێ د پرۆژه قانوونا بوودجێ عیراقێ دا ببیته 14%، لێ مه ئهو باوهرى نینه، كو ئهو رێژه بهێته زێدهكرن، ههر چهنده هێشتا بریارا دووماهیێ نههاتیهدان و بزاڤێن مه ژى ل گهل ئالیێن شۆلهژێ د بهردهوامن و نوكه لیژنا دارایى یا ل سهر كار دكهت، لێ ههكه حوكمهتا عیراقێ ههر وهكو خوه هێلا، ل وى دهمى دێ ههر رێژا كوردان وهكو بهرى نوكه مینیت و زێده نابیت.
