داخوازا كێمكرنا كرێیا كارەبا پریپەید دهێتە كرن

هەولێر، قائید میرۆ:

سەرۆكێ جڤاتا پارێزگەها هەولێرێ ئاشكرا كر، داخواز ژ حوكمەتێ هاتیە كرن، كرێیا كارەبا پریپەید بهێتە كێمكرن و ئەو كارەبا 24 دەمژمێری بۆ شوقە و ستیان دچیت ل سەر حسابا تاخێن هەژار نەبیت بەروڤاژی سنوورەك بۆ بهێتە دانان.
دكتۆر عەلی رەشید، سەرۆكێ جڤاتا پارێزگەها هەولێرێ بۆ رۆژناما ئەڤرۆ دیار كر، جڤاتا پارێزگەها هەولێرێ راپۆرتەك ل دۆر رەوشا كارەبێ بەرهەڤكریە و گۆت: «تێدا داخواز هاتیە كرن كرێیا كارەبێ ئەڤا نوكە ل گورەی سیستەمێ پریپەید دهێتە وەرگرتن بهێتە كێمكرن، چونكی سیستەمێ پریپەید ئێك ژ وان سیستەمێن سەركەفتی یێن كارەبێ یە، بەلێ گرانكرنا بهایێ كارەبێ كاریگەری ل سەر وەلاتیان پەیداكریە، لەوڕا داخواز دكەین كریا كارەبێ بهێتە كێمكرن و كارەبا ستی و شوقان ژی كود بیتە 24 دەمژمێری ل سەر حسابا تاخێن هەژار نەبیت».
دكتۆر عەلی رەشید گۆتژی: «پێدڤیە وەزارەتا كارەبێ پێداچوونەكێ ل دۆر خواستا كارەبێ بكەت بۆ هەر پارێزگەهەكێ و بزایت بەهرا هەر پارێزگەهەكێ ژ كارەبا نیشتمانی چەندە و خواستا هەر پارێزگەهەكێ ژی چەندە، چونكی وەلاتی گەلەك گازندان ژ كارەبێ دكەن و پێدڤی ب پێداچوونێ هەیە، جڤاتا پارێزگەهێ هەموو وان داخوازیان بۆ سەرۆكایەتیا حوكمەتێ دێ بلند كەت، داكو كار ل سەر بهێتە كرن».

کۆمێنتا تە