داخوازيا كارگێريا يانا زێره‌ڤانى يا دوور بوو ژ هه‌موو ره‌وشتێن وه‌رزشى
ئەڤرۆ نيوز:
پشتی راھێنەرێ فوتسالا کچێن زێرەڤانی ژ نشکەکێ ڤە تیم بجە ھێلای و بەر ب جھەکێ نەدیار چوی، راھێنەری ناڤبری تنێ بۆ رۆژناما ئەڤرۆ دیارکر پشتگوە خستنا تیما فوتسالا کچان و نە نووکرنا ھەڤبەستا وی بۆ ئەگەر ڤێ تیمێ بجە بھێلیت و خویاکر ژی زێرەڤانی ل ڤی وەرزی نەشێت ناسناڤێ خولا ھەرێما کوردستانێ دەستخوە ڤە بینت.
زێدەتر کەریم نسەیف د دیدارەکا تایبەت دا بۆ رۆژناما ئەڤرۆ گۆت: پشتگوە خستنا تیما فوتسالا کچان ژلایێ کارگێریا یانێ ڤە بۆ ئەگەر دەستا ژ ڤێ تیمێ بەردەم و کارگێریا یانێ ب چو رەنگا پشتەڤانیا تیمێ نە دکر، سەرەرای وێ چەندێ کو شیام چار ناسناڤان ل دووڤ ئێک بۆ بینن، زێدەباری نە رژدیا کارگێریێ بۆ نووکرنا ھەڤبەستا من کو تنێ د ماوێ خولێ دا نەبیت و ئەڤ چەندە ژی دیرە ژ ھەمی رەوشتێن وەرزشی.
ناڤبری ئاماژە ب وێ چەندێ ژی دا کو تیما وی پێدڤی ب دەمی بۆ ژبو بەرھەڤکرنێ بۆ ھەڤرکیێن خولێ، زێدەباری کەمپەکێ راھێنانێ لێ کارگێریا یانێ دژایەتیا خوە ھەمبەر ڤان داخوازیا دیارکر، لەورا یا باشتر ئەو بۆ ڤێ تیمێ بجە بھێلم و بەر ب ئوروپا بچم.
ل دووماھیێ کەریم گۆت: تیما فوتسالا کچێن زێرەڤانی نەشێت ل ڤی وەرزی نانساڤێ خولێ ب دەستخوە ڤە بینت ژبەرکو چەند یاریکەرێن سەرەکی تیم بجە ھێلایە و ل ڤێ حەفتیا بھێت د یاریا بەرامبەر ئافرەتێن ھەولێر دا دێ ھەلویستێ تیمێ بۆ دەستڤە ئینانا ناسناڤێ خولێ ئێکلا کەت.
بەرامبەر ڤان گوتنا سەروکێ یانا زێرەڤانی عەبدولخالق حەسەن گۆت: گوتنێن ڤی راھێنەری چو راستی بۆ نینن، بەروڤاژی کارگێریا یانێ پشتەڤانیا ھەمی تیمێن خوە کریە و نوکە تیما فوتسالێ ژی پشکدارە د ھەڤرکیێن خولێ دا و شیایە ھەتا نوکە ئەنجامێن باش ب دەستخوە ڤە بینت و زێدەتر دیارکر ھەکە ئەڤ گوتنە راستبان دا چەوا تیمان وان شێت پشکداری خولا ھەرێما کوردستانێ کەت.
