داخوازێ ژ هەر ئالییەكێ كاریگەرێ كورد دكەین پشتەڤانییا هێزێن كوردی یێن رۆژئاڤا بكەن
ئەندامەكێ پەرلەمانێ كوردستانێ ژ فڕاكسیۆنا پارتی دیمۆكراتی كوردستان دبێژیت ئەم پشتەڤانی و پشتگیرییا خوە بۆ برایێن خوە یێن كوردێن رۆژئاڤا د دەینە دیاركرن و داخوازێ ژ هەر ئالییەكێ كاریگەر یێ كورد دكەین پشتەڤانییا هێزێن كورد یێن رۆژئاڤا بكەن.
بەنستان عسمەت دینۆ، ئەندامێ پەرلەمانێ كوردستانێ ژ فڕاكسیۆنا پارتی دیمۆكراتی كوردستان ئاماژە ب وێ چەندێ كر كو ئەو بەرخوەدانا گەلێ مە یێ كورد ل رۆژئاڤایێ كوردستانێ دژی چەكدارێن ئەحمەد شەرعی ل هەر دوو تاخێن ئەشرەفیێ و شێخ مەقسوود ئەوێ چەندێ د سەلمینیت كو تاكێ كورد تاكەكێ شوڕشگێر و چاڤنەترسە ل بەرامبەری هەر ستەم و زۆرداریەكێ و هەردەم ژ پێخەمەت پیرۆزیێن گەلێ خوە قوربانیێ د دەت.
گۆت ژی»هەتا دووماهی خولەك ژ دەسپێكا شەرێ سووریێ هەتا نوكە ب هزاران كچ و كورێن كورد ل رۆژئاڤا ژ پێخەمەت پاراستنا شەرەف و كەرامەت و ئاخا خوە چەپەرێن بەرگریێ بەرنەداینە و جانێ خوە كریە قوربان بۆ دۆزا گەلێ خوە یێ پیرۆز».
زێدەتر ژی گوت»نوكە ژ هەر دەمەكێ دی پتر گەلێ كورد پێدڤی ب ئێكگرتن و ئێكرێزیێیە ل بەرامبەر داگیركەر و دۆژمنان، كورد ل هەر جهەكی ل ڤێ جیهانێ بن بتنێ ب سەربلندی و سەرفەرازیێ رازی دبن».
