داخواز دهێتە كرن جادەیێن تاخێ وان بهێنە چێكرن
سندس سالح سلێڤانەیی:
هژمارەكا ئاكنجیێن (تاخێ نیوار) كو دكەڤیتە جهێ سەربازگەها دومیس، داخوازێ ژ سەرۆكاتیا باژێرڤانیا فەیدیێ دكەن، بلەز جادەیێن وان بهێنە چێكرن، ژ بەر كو وەرزێ زڤستانێ هات و هەر دەمێ بارانەكا سڤك هات، ئەو نەشێن ژ مالێن خوە دەركەڤن. سەرۆكێ باژێرڤانیێ ژی دبێژیت: مە ئاگەه ژ ئاریشەیا وان هەیە و هەر دەمێ پارە گەهشتن دێ ئەو جادە ژی هێنە چێكرن و ئەز ب باوەرم دێ ل نێزیك دەست ب چێكرنا وان جادەیان هێتە كرن.
عەبدی ئاكنجیەكێ وی تاخی یە دبێژیت: دەمێ دبیتە زڤستان ژبەر هەڕی و تەقنێ رەوشا مە گەلەك لاواز دبیت و گەلەك رۆژان هەكە بۆ دەوامێ یان كارەكێ گەلەك پێدڤی نەبیت ئەم نەشێین ژ مالێن خۆ دەركەڤین، بۆ زانین پرانیا جادەیێن ڤی تاخی هاتینە چێكرن، ب تنێ سێ جادە ماینە دناڤڕا و هەكە وان ژی بۆ مە چێكەن دێ سوپاسدارێن وان بین.
دەیكا عایشا، كو ئەو ژی ئاكنجیەكا وی تاخی یە، دبێژیت: هەر رۆژا چار چپكێن بارانێ هاتن هاتن و چوونا ترۆمبێلان هەروەسا یا مرۆڤان ژی ل جادەیا مە د ڕاوەستیت، ژبەركو هەموو دبیتە هەڕی و تەقن و قوتابیێن تاخی نەشێن بچنە قوتابخانەیێن خۆ، ب تایبەت قوتابیێن پولا ئێكێ هەتا سێیێ بنەرەت كو ب ڕاستی ئەو گەلەك زەحمەتێ دبەن هەتا دگەهنە قوتابخانێ و پشتی دهێنە مال ژی دڤێت ئێكسەر هەموو جلكێن وان ل گەل پێلاڤێ ب گوهۆڕین و ڤێ چەندێ ئەم گەلەك بێزاركرینە و ب چێكرنا جادێ مە ئەو ئاریشە نامینیت.
محەمەد رەمەزان، سەرۆكێ باژێرڤانیا فەیدیێ دەربارەی گازندەیان وان دبێژیت: راستە مە ئاگەه ژ ئاكنجیێن وی تاخی هەنە، لێ ب تنێ دو هەتا سێ جادەیان ماینە نەهاتینە چێكرن و بۆ وێ چەندێ مە ڤەدیتنەك چێكریە و ئەم چاڤەڕێی گەهشتنا پارەی نە و هەردەمێ گەهشتن دێ ئەو جادە ژی هێنە چێكرن و خەلكەك دێ ژ وێ ئاریشەیێ خلاس بیت و ئەز ب باوەرم دەمێ چێكرنا وان یێ نێزیكە، چونكو بڕیارا پێ دەركەفتی و دێ پارە ژی گەهن.
