داخۆیانیێن ئه‌ردوگان نه د به‌رژه‌وه‌ندا پێڤاژۆیا ئاشتیێ دانه
بزاڤا ئازادیخوازا گه‌لێ كوردستانێ به‌رهه‌ڤه ب رێیا دانوستاندنان ل گه‌ل حوكمه‌تا توركیا پرسگرێكا كوردی چاره بكه‌ت، هه‌رده‌م گه‌ل و نه‌ته‌وا كورد ڤیایه ب رێیا دانوستاندنان ئاریشا وێ یا نیشتمانی بهێته چاره‌كرن و چاره‌نڤیسێ گه‌لێ كورد بهێته دابینكرن، به‌لێ پر مخابن لایه‌نێ ل به‌رامبه‌ر كو حوكمه‌تا توركیایه ئاماده نینه ڤێ دۆزا ره‌وا ب رێیا دانوستاندنان چاره بكه‌ت و هه‌رده‌م ئاسته‌نگان ل هه‌مبه‌ر پێڤاژوویا ئاشتیێ دروست دكه‌ت و سه‌رۆك كومارێ توركیا ره‌جه‌ب ته‌یب ئه‌ردوگان هه‌مبه‌ر چاره‌كرنا دۆزار كوردی یێ دوو روویه، هه‌ر رۆژه‌كێ هلڤین و ئاخافتنه‌كێ دكه‌ت و رۆژه‌كێ دبێژیت دێ پێڤاژۆیا ئاشتیێ یا به‌رده‌وام بیت و رۆژه‌كێ دبێژیت ئه‌م نه دبه‌رڤین ب گه‌ل پارتا دیمۆكراسی گه‌لانHDP و پارتا كرێكارێن كوردستانێ ڤێ دۆزێ چاره بكه‌ین.
پارتا دیمۆكراسی گه‌لانHDP و پارتا كرێكارێن كوردستانێ ئه‌ڤ هه‌ردو رێكخستنه ب هێزترین پارت و رێخستنن ل باكوورێ كوردستانێ و نوونه‌راتیا پرانیا خه‌لكێ باكوورێ كوردستانێ دكه‌ن، پا ئه‌گه‌ر ئه‌ردوگان و حوكمه‌تا وی كێشا كوردی ل گه‌ل ڤان هه‌ردو رێخستیان چاره‌نه‌كه‌ت، پا دێ ب چ ره‌نگ پرسا كوردی چاره كه‌ت و دیسا دێ ل گه‌ل كێ چاره كه‌ت، مانه هه‌ردو ئه‌ودو رێخستنه نوونه‌راتیا خه‌لكێ باكۆری دكه‌ن، له‌وما دڤێت ئه‌ردوگان ل گه‌ل نوونه‌رێن بزاڤا ئازادیخوازا كورد ب ئاشكرا و زه‌لالی روونیت و كێشه و داخوازیێن وان چاره بكه‌ت، ژبه‌ر كو ئه‌ندامێن ڤان هه‌ردو رێخستنان چووینه د په‌رله‌مانێ توركیا دا و رێژه‌كا به‌رچاڤ ژ په‌رله‌مانێ كوردستانێ پێكئیناینه و نوونه‌راتیا خه‌لكێ باكوورێ كوردستانێ دكه‌ن و خه‌لكی ب رێیا سندۆقێن ده‌نگدانێ باوه‌ری یێ داینێ، له‌وما ئه‌گه‌ر حوكمه‌تا توركیا داخوزایێن ڤان هه‌ردو رێخستنان بحه بینیت، دێ توركیا به‌ر ب كنار و په‌راڤێن ئارامی و ته‌ناهیێ چیت، به‌روڤاژی دێ توركیا به‌ره‌ڤ وێرانكاریێ و ناڤبرنێ چیت و توركیا دێ ژ كاروانێ پێشكه‌فتنا مرۆڤاتیێ ڤه‌قه‌تیت، له‌وما یا فه‌ره كاربده‌ستێن توركیا گرنگیا چاره‌كرنا پیڤاژۆیا پرسا كوردی ل به‌رچاڤ وه‌ربگریت، چونكو جیهان هه‌موو چاڤه‌رێی ڤێ پێنگاڤا دیرۆكی و گرنگ یا توركیا یه كو مافێن گه‌لێ كورد دابین بكه‌ت، به‌لێ ب دیتنا من ئه‌ردوگان نه یێ رژده ل چاره‌كرنا پرسا كوردی و ئه‌ڤ ڤه‌مانه خزمه‌تا چ لایه‌نه‌كێ ناكه‌ت و ئه‌ردوڤان دیاره نه‌ڤێت دانپێدانێ ب مافێ گه‌لێ كورد بكه‌ت و نه‌ڤێت دوزا كوردی ل سه‌ر بنگه‌هه‌كێ یاسایی و رێداری بهێته چاره‌كه‌ت و ئه‌ردوگان هه‌رده‌م دژی نوونه‌رێن بزاڤا ئازادیخوازا گه‌لێ كوردستانێ رادوه‌ستیت و تومه‌تبار دكه‌ت، له‌وما ئه‌ڤ چه‌ندا ل توركی دهێته كرن، نه ل دووڤ خواسته‌كا گه‌لێ كورده، له‌وما ئه‌ڤ قوناغێن بۆ چاره‌كرنا پرسا كوردی ژی هاتینه هاڤێتن، ئه‌گه‌ر ئه‌ردوگان ب ڤی ره‌نگی ره‌فتارێ بكه‌ت، دێ زیانێ گه‌هینته وێ قووناغێ ژی، له‌وما داكو پێكهاتێن جڤاكی بێ هیڤی نه‌ین ژ پێڤاژوویا ئاشتێ ل باكوور، دڤێت ئه‌ردوگان پێنگاڤێن ب له‌زتر بهاڤێژیت بۆ چاره‌كرنا پرسا كوردی و هه‌ست ب وێ چه‌ندێ بكه‌ت كو ئه‌ڤ ڤه‌مانه خزمه‌تا وه‌لاتێ توركیا ب خوه ژی ناكه‌ت و چاره‌كرنا پرسا كوردی د خزمه‌تا هه‌موو گه‌ل و نه‌ته‌وه و پێكهاتێن توركیا و كوردستانێ دایه.
