دادوه‌ری ده‌ستهه‌لاتێن سنۆردای ل دادگه‌هێ هه‌نه
دبینین هاتیه نڤیسین و هه‌لاویستن ب دیواری ڤه ل هه‌می دادگه‌هێن عیراقێ ب شێوه‌كی گشتی و دادگه‌هێن كوردستانێ ب تایبه‌تی، نه‌خاسمه ئه‌ڤ گۆتنه دهێته گرێدان ب دادوه‌ری ڤه چونكو خودانێ بریارا دووماهیێ ئه‌وه ل دادگه‌هێ, به‌لێ برسیار ئه‌ڤه‌یه كا راسته دادوه‌ری شیان هه‌یه ببیته خودانێ بریارا دووماهیێ؟ چونكو یا دیاره ژ سیسته‌مێ دادوه‌ریێ كو دادوه‌ر نه خودانێ بریارا دووماهیێ یه, چونكو قانوون هاتیه نڤیسین و راستڤه‌كرن ب رێیا په‌رله‌مانی و چه‌ندین گوهۆرین یێن هاتینه‌كرن ل سه‌ر قانوونێن جۆره و جۆر ل په‌رله‌مانی و هه‌كه دادوه‌ری بریاره‌ك دا و زیان ب لایه‌نه‌كی كه‌فت و د قانوونێ دا سنۆر دانابن بۆ ڤێ جۆره بریارێ, دشیان دانه كو ئه‌ڤ بریاره بهێته هلوه‌شاندن و
ره‌دكرن و ل ڤێرێ چو گرنگری بۆ بریارا دادوه‌ری نامینت, ئه‌ڤه دبیته ئه‌گه‌را كارتێكرنێ ل سه‌ر بریارا دادوه‌ری چونكو هنده‌ك بریار هه‌نه پێدڤی هنده‌ك ده‌ستهه‌لاتێن زێده‌ترن بۆ دادوه‌ری داكو ل دووڤ قه‌ناعه‌تا هزروبیرێن خوه بریارا دروست بده‌ت, وه‌كو نموونه بۆ ڤان جۆره ئاریشان, بریارا خودانكرنا زارۆیان ل ده‌مێ حاله‌تێن به‌ردانێ د خێزانێ دا, پێدڤی هندێ یه كو دادوه‌ر بزانیت كیژ مال بۆ زارۆیان باشتره كو ژیانه‌كا ئارام و باش ئه‌و زارۆیه تێدا بژین و هنده‌ك دادوه‌ران قه‌ناعه‌تا باش هه‌یه كو زارۆ ل ده‌ف بابێ خوه بن باشتره, به‌لێ قانوونێ چو مه‌رج دانایه كو خودانكرنا زارۆیان ژ به‌هرا دایكێ بت و ئه‌م هه‌می دزانین كو دایك ب شێوه‌كێ گشتی باشتره بۆ خودانكرنا زارۆیان, به‌لێ هنده‌ك حاله‌تێن جودا هه‌نه و پێدڤی هندێ نه كو زارۆ ل ده‌ف بابێ خوه بن, به‌لێ دیسا ڤه دادوه‌ری شیان نینه بریارا دروست بده‌ت هه‌تا هه‌كه ئه‌و بریاره دروست بیت چونكو قانوون هاتیه سنۆركرن ب رێیا بریارا په‌رله‌مانێ كوردستانێ. نموونه‌كا دی هه‌یه بۆ بریارا دادوه‌ری ئه‌وه كو ده‌مێ دادوه‌ری حه‌ز هه‌بیت زارۆ ل گه‌ل بابێ خوه بمینن بۆ ده‌مێ رۆژه‌كێ یان پتر د هه‌یڤێ دا, به‌لێ قانوون رێ ناده‌ته دادوه‌ری بریارا خوه بده‌ت, چونكو د حاله‌تێ به‌ردانێ
دا تنێ قانوونێ رێك دایه بابێ زارۆیان بچووكێن خوه ببینیت هه‌یڤێ دو جاران و هه‌ر جار تنێ سێ سه‌عه‌تان، بۆ هنده‌ك بابا ئه‌ڤه زۆرداریه‌كا مه‌زنه و دادوه‌ر دزانیت ژی ئه‌ڤه نه بریاره‌كا دروسته، به‌لێ د شیانێن وی دا نینن چو گوهۆرینان بكه‌ت د بریارا خوه دا, دادگه‌هێن كوردستانێ پڕن ژ حاله‌تێن به‌ردانێ یێن كو بابێن زارۆیان هاتینه راگرتن ژ دیتنا زارۆیان بۆ ده‌مێ رۆژه‌كێ ساخ و هه‌كه ئه‌م باش ل دووڤ بچین كا زیانێن ڤێ جۆره بریارێ چنه, دێ بینین كو زیانێن ده‌روونی هه‌نه بۆ زارۆیان و بۆ بابێ زارۆیان ژی هه‌كه گرێدانه‌كا جڤاكی یا باش هه‌بیت د ناڤبه‌را بابی و
زارۆیان دا, مخابن ل دادگه‌هێن مه ل كوردستانێ چو دووڤچوون نه‌هاتیه‌كرن ل به‌رچاڤ كا چه‌ندین تاوانێن توماركری هاتینه كرن ژ به‌ر ئه‌گه‌رێن فشارێن ده‌روونی یێن جۆره وجۆر و چه‌ندین بابه‌تێن به‌ردانێ بووینه ئه‌گه‌را روودانێن جۆره و جۆر, ئه‌ڤه هه‌می دكه‌ڤیته دبن خالا نه‌بوونا ده‌ستهه‌لاتیه‌كا دروست دا بۆ دادوه‌ری ژ لایه‌كێ ڤه و نه‌بوونا ڤه‌كۆلینه‌كا دروست بۆ بریارێن په‌رله‌مانی یێن گرێدای قانوونا دادگه‌هێ ڤه و یا ژمن ڤه یا باشه كۆمبوونه‌ك هه‌بیت ژ لایێ ژماره‌كا دادوه‌رێن شاره‌زا ڤه كو هنده‌ك قانوون بهێنه گوهۆرین ل
دووڤ به‌رژه‌وه‌ندیا گشتی بیت و پتر رێیێن قانوونی بده‌نه دادوه‌ری بریارا خوه بده‌ت ده‌مێ كو بزانیت پێدڤیه بریاره‌كا جودا بده‌ت، ئه‌ڤه هه‌می دزڤریت بۆ ئه‌گه‌رێن ئاڤاكرنا قانوونێ ل كوردستانێ و ل دووڤ گۆتنا سه‌رۆك بارزانی (كه‌س ل سه‌ر قانوونی دا نینه ل كوردستانێ), ب راستی ئه‌وه رێیا دروست بۆ پێشكه‌فتنا كوردستانێ.
