دادڤانێن خولێ داخوازا مافێن خوە دكەن
ئەڤرۆ
قەیس وەیس
دەستەكا گشتی یا دادڤانێن یاریا تەپا پێی د خولێن ئیراقێ دا داخوازا ژ فیدراسیۆنا ئیراقێ كریە ئەو شایستەیێن دارایی وەكو مافێ وان ب زووترین دەم بهێنە پارڤەكرن.
دادڤانێ نێڤدەولەتی محەمەد سەلمان بۆ سایتێ كووورە گۆت: هەموو دادڤانێن ئیراقێ داخوازا شایستەیێن خوە یێن دارایی دكەن ئەوێن ل دەڤ فێدراسیۆنا ئیراقێ ماینە هەلاویستی تایبەت یێن هەیڤێن بۆری كو ژ یاریێن خولێ و كۆپا ئیراقێ برێڤەبرین، مە چەندین جاران داخوازا پارڤەكرنێ كریە لێ مخابن هەتا نوكە ئەو مافێ مە كو پارەكێ كێمە نە هاتیە دان سەرباری ئەوێ زەحمەتا هاتنووچوونێ د ناڤ پارێزگەهێن ئیراقێ دا دكەین، بەرانبەر دا دادڤانێن كەنداڤی یان یێن عەرەبی هەر تشتەكێ پێدڤی ژلایێ فێدراسیۆنێن وانڤە بوو دهێنە دابینكرن بەروڤاژی ئیراقێ هەموو ئاستەنگن زێدەتر كارتیكرنێ ل سەر كادرێ دادڤانان دهێتە كرن، هەرچەندە ئارمانجا مە سەركەفتنا هەر یاریەكێ یە د خولێن ئیراقێ دا ل دووڤ رێنما و یاسایا نێڤدەولەت لێ ئەو خەلەتیێن نە ب مەرەم ل هەموو جیهانێ دهێتە دیتن لەوما دڤێت ئەوێن رەخنێ ل دادڤانان دكەن كاودانێن مە بەرچاڤ وەربگرن.
