دادێ ل من ببۆرە
ناجح بێجانی
دادێ من ژی هەستێ هەیی وەكو هەمی مرۆڤان تو ب خودێ كەی نەبێژە من تە چ دڤێتین؟ ئەز دزانم دلێ تە یێ بژانە و بێ دەنگییا من تە د ئازرینت ژ هەمی خۆشی ودەركەفتن و گەریانا من ژی دڤییا وەك هەر زاڕۆكەكی دیتر د هەمبێزا دایكێ خوەدا ئارام ببم، لێ ئەز نەشێم دەوروبەریێن من تێناگەهن، ئەز نە یێ لالم، لێ بێ دەنگییا من بەلیی دبیت.
من ژی هەستێ هەیی وەكو هەمی مرۆڤان ب تنێ دناڤبەرا من وان دا ، ئەو پەیڤن یێن ژی دەڤێ وان دەردكەڤن، باش دزانم چەند یا نەخۆشە دەمێ مرۆڤی بڤێتن پەیڤا دایكێ بێژتن: لێ نەشێتن ب بێهنفرەهییا تە دل خۆش دبم ئارام دبم، لێ جیهانا من وان ئێك جیهانە بەلێ ب دو جۆرێن جودا ڕەفتاری دكن، ئەز نە ئەوم یێ دهزڕا وان دا، بەلكو بەرۆڤاژی تێدگەهم ب هەستێن خۆ من ژی دڤییا وەكو وان بم.
لێ دایێ ئەز دزانم ب تنێ تو تێدگەهی ئازاریێن من چەند دل ئێشین هناڤێن من دسۆژن دەمێ ئەز وان ل سەر جادا و كۆلانا دبینم دلەیزین، جلا دكرن، پێ دكەنین، گازی هەڤ دكن، كۆمڤەدبن، حەنەكا دكن، ئەز ب تنێ مە و یێ ژ وان ڤەدەرم هەست پێ دكم تو ژمن توورەیی، لێ چ بكم قیژێین من تە ئالۆز دكن من ژی دخواست وەكو وان بم، لێ نە ب دەستێن منە، تو بۆ من هەمی تشتی تێدگەهم چەند دلێ تە ئێشت وغەمبار دبت، ژ بەركو هندی ژییێ من مەزنتر دبت و پێدگەهم ئاریشێن من زێدەدبن و چارەسەری كێم دبیت.
دایێ دزانم ئەو لاندكا من یا لبەر سینگێ تە چەند شەڤان خەو یا ژچاڤێن تە یا رەڤاندی و ڕۆندكێن تە چاڤ هیشك دكرن، حەتا سپێدی ب لایێ لایێ و بنڤە بنڤە عەزیزێ من ئەز دنڤاندم، دوبارە دێ بێژمە تە دایێ ل من ببۆرە.
