دارا ئومێدا
كورته چیڕۆك
كۆره ڕێكه و ڕێباره‌كی كه‌سه‌كی بێ هیڤی و ئومێده، ئه‌ڤ كه‌سێ بێ هیڤی و ئومێد و بێ زاربووی ژ بێ خوه‌یی و خودانی د هه‌می ده‌مان و ل هه‌می جهان ڕێباره و دچت و هه‌ر دچت . . !
ل واره‌كی ئارام و بێ ئارێشه دگه‌رهت.
هه‌ر دڤێ گه‌ریانا بێ دووماهیك دا، ل چوار ڕیانه‌كا پڕ ئاسته‌نگ و ڤاله ژ هاتن و چوونا مڕۆڤان ل قورنه‌تا جیایه‌ك ئاسێ و دبن دار مازییه‌كێ پیره‌ژنه‌كا ژ خوه پیرتر و بێ ئومێدتر ژ هیڤیان دبینت، ب گرنژین ڤه و ب ئه‌زمانه‌كی نه‌رم و شرین ب ئێڤار باشه‌كێ سلاڤ دكتێ، پیرێ ب هه‌می خه‌م و ده‌ردێن خوه یێن گران ڤه ب دل خوه‌شی و گڕنژین ڤه به‌رسڤا سلاڤا وی ددت وسلاڤێ ژێ وه‌ردگرت، ئه‌ڤ هه‌ردو بێ ئومێده كه‌فتن دانوستاندنا و سوحبه‌تێ . . گۆتن و سه‌رهاتیێن ئه‌ڤێ فه‌له‌كا ژیێ وان هه‌می بێ بها و بێ ڕوومه‌ت و مفا ژوان قه‌تیاندی و بۆراندی. ڤی كه‌سێ بێ ئومێد و هیڤی گۆت: پیڕێ ته خێره ل بنێ ڤی چیایی و بنێ ڤێ دارێ ڕوونشتی؟ كا بۆته چ بكم ؟ ته چ پێویست و چ داخوازی ته هه‌نه بۆ ته بكم ؟
پیرا هه‌ژار ب دله‌كی بریندار گۆت: دێ بۆ ته بێژم به‌لێ كا بێژه من ته خێره تو ل چ دگه‌رهی و دێ كیڤه چی؟
ڤی كه‌سێ بێ ئومێد گۆت: پیرێ ئه‌ز گه‌ڕۆكێ بێ مال و وارم بێ كه‌س و بێ خوه‌دانم، ڕێباره‌كی بێ هیڤی و ئومێدم نزانم دێ كیڤه چم ! بێ ناڤ و نیشانم و بێ وارم دچم و هه‌ر دچم ! دێ پیرێ دره‌نگه ڕێیا من دووره و كه‌ره‌مكه ته خێره؟
پیرێ دلێ خوه ئارام دكت و ب دله‌كی تژی خه‌م دبێژت: ڕێبوارێ ده‌لال، ئه‌ڤ دارا ل سه‌رێ ڤی چیایێ بلند و ب لات و كه‌ندال و هۆ ئاسێ و بێ ده‌لیڤ و ڕێ ، به‌رانبه‌ری گوندێ مه‌یه، داره‌كا كه‌ڤناره و ژ كه‌ڤن وه‌ره پیڕۆزه ناڤێ وێ ( دارا ئومێدا ) یه، ب ده‌ستێن كه‌نج و لاوان دهێته كه‌زاختن و كۆلان و ئاڤدان، لێ مخابن مه ل گوندی گه‌نج نه‌ماینه و گه‌نجێن مه ژ گوندی ره‌ڤینه و گوند هێلاینه، ژبه‌ر زۆڕداریا مه‌زنێ گوندی و هنه‌ك ژ وانان ژ بۆ ئاره‌زوێن خوه یێن ژ گوندی دوور كه‌فتین، ئه‌ڤ داره یا بێ ڕه‌نگ و خه‌مل مای، چ نه‌مایه هشك ببت ، هه‌ر ژبه‌رێ وه‌ره مه لاڤ و داخواز ژ خوه‌دایێ دارێ دكرن، مه بپارێزت ژ نه‌خۆشی و ئازار و ده‌ردان، لێ دیاره خوه‌دایێ دارێ یێ ژ مه تۆڕه و عنڕی، یێ ژمه دل نه‌خوه‌ش بووی ، ژبه‌ركو ئه‌ڤه چه‌ند سالن ئێدی گوهداری و چاڤدێری یا ڤێ دارێ ناكین و مه یێ پاشگوهـ ئێخستی، ئه‌ڤجا زوڵم و زۆڕی و ئێش و نه‌خوه‌شی یێ دناڤ مه دا به‌لاڤ بووین و چ چاره و جاره‌سه‌ری نینن بو ئێش و ده‌ردێن مه، له‌و ئه‌زا هاتیم و ژبه‌ركو مه چ گه‌نج نه‌ماینه ل گوندی! من ژی ئه‌و هێز و شیانه نه ماینه بگه‌هم دارێ و جاره‌كا دی وه‌ك به‌رێ ڤێ دارێ بخه‌ملینم، به‌لێ دێ چاڤه‌ڕێبم هه‌تا مرنێ، به‌لكی و ( دارا ئومێدا ) جاره‌كا دی گه‌ش ببت و گوندێ مه ئاڤا ببت.
