داعش ب وه‌كاله‌ت
دیاره دیرۆكا پڕ تراجیدیا كوردێن ئێزدی شاهیده ل سه‌ر مالوێرانكرن و فه‌رمانێن ب سه‌رێ وان هاتین و هه‌كه ئه‌م سه‌رژمێریاریه‌كێ بۆ دیرۆكێ چێكه‌ین، ئاشكرا دبت كو ژده‌ستپێكا سالا زاینی هه‌تا نها هه‌ر 27 سالان جاره‌كێ فه‌رمان و جێۆسایده‌كا وه‌سا ب سه‌رێ ئێزدیان هاتیه، لێ گه‌ره‌كه ئه‌م ژبیر ژی نه‌كه‌ین پرانیا ڤان فه‌رمانان یێن به‌ری 1400 سالان و هێرڤه‌نه، كه‌واته داعش ژبۆ كوردان ب گشتی و ئێزدیان ب تایبه‌تی سیناریۆیه‌كا كه‌ڤنه و نه‌یا نهایه. دوژمنێن كوردان كانێ چه‌ند ژبۆ خوه و پێشه‌رۆژا خوه بێ مه‌ژی بووینه هند ژبۆ تێكدانا كوردان د ژیر و شاره‌زابووینه، له‌ورا ده‌ما دهاتنه د ناڤ ئاخا كوردستانێ دا وان پتر ئێزدی دكرنه ئارمانج ب بیانۆیا هندێ كو ئایدۆلۆژیا وان نه‌گرێدای یا ئیسلامێ یه، ژ به‌ر هندێ ئه‌م دبینن ئه‌ڤ نه داعشه‌ك نوویه، به‌لكو ئه‌ڤ نوونه‌رێ وان سه‌رمیرایه ئه‌وێن كو ژن و زارۆیێن ئێزدیان د شكه‌فتا ڤه دشه‌وتاندن و شكه‌فتا (زقاق قه‌رقۆری) ل په‌رستگه‌ها لالش شاهیده ل سه‌ر ڤان ره‌فتارێن ب ڤی ره‌نگی. تشتێ بالا مرۆڤی دكشینه و وژدانا مرۆڤ دهه‌ژینه ئه‌وه، گه‌لۆ چاوا د ڤی چه‌رخی دا ئینسان ژبرس و تیهنان بمرت؟ ل 3/8 هه‌كه ل چیایێ شنگال كاره‌ساتێ ده‌ستپێكر، د ناڤا ده‌ستێن داعشێن ب وه‌كاله‌ت بوو موسیبه‌ت، سه‌ر هاتنه ژێڤه‌كرن، زارۆ سێوی بوون، كه‌چ و ژن دهاتنه فرۆتن، پیر و كال ژبێ خوه‌ی كرن مرن، ئه‌ڤه‌یه ئه‌وا دیرۆك بێژت رێپیڤانا مرنێ. نایێ ڤه‌شارتن ئه‌ڤ نه‌تشته‌ك نوویه ژبۆ ئێزدیان، به‌لكو هه‌تا به‌ری شۆره‌شێن كوردی ب تایبه‌ت به‌ری سه‌رهلدانا شۆره‌شێن بارزان تم و تم ئه‌ڤ حالێ ئێزدیان بوو، ب تنێ گونه‌ها وان ئه‌و بوو چونكی ئاینێ خوه، رێوره‌سمێن خوه دابونه‌ریتێن خوه ب كوردی دكرن و ب كوردی دئاخڤین، لێ دڤێ ئه‌م ژبۆ دیرۆكێ بێژین ئه‌و خیڤه‌تا پێكڤه‌ژیانێ ئه‌وا ل سه‌ر ده‌ستێ بارزانیێ نه‌مر هاتیه ڤه‌دان، هینگی ئێزدیان كاری دبن سیبه‌را ڤێ چادرێ دا خوه بپارێزن، چونكی ڤێ سیبه‌رێ هه‌مبێزا هه‌موو ئۆل و نه‌ته‌وه‌یێن كوردستانێ كر، ژ به‌ر هندێ هه‌كه ئه‌م ته‌ماشه‌ی دیرۆكێ نیڤا دووێ ژچه‌رخێ بۆری بكه‌ین، ئه‌و چه‌رخه‌یه ئه‌وێ ئێزدیان كاری نه‌فه‌سا ئازادیێ بكشینن، ئێزدی پشكداری شۆره‌شان بوون ژبه‌ر كو هه‌ست ب هه‌بوونا خوه‌كرن. ئه‌ڤجا ئه‌م د وێ باوه‌ریێ داینه ئه‌و جینۆسایدا داعشان ب سه‌رێ شنگالیان ئینای درێژه‌پێدانا سیاسه‌تا وان شۆڤێنیایه ئه‌وێن ژه‌هرا خوه ب سه‌ر كوردان دا به‌رددان، ژ به‌ر كو گاڤا مرۆڤ سه‌حكه‌ته ره‌هه‌ندێن ڤێ بۆیه‌را مه‌زن، ئاشكرا دبه كو ئه‌ڤ پیلانه‌ك دارێتی بوویه ب دژی سیاسه‌تا كورێ مسته‌فا بارزانی ئه‌وێ كو ئێزدی دبن خیڤه‌تا خوه دا پاراستین، ژ به‌ر كو هه‌ر كه‌س دزانه ئێزدیان تایبه‌تمه‌ندیه‌ك ل جه‌م سه‌رۆك بارزانی هه‌یه، لێ تشتی سه‌یر ئه‌وه هنده‌ك لایه‌نێن كوردی ژی ژ ڤی ئالی ڤه ره‌فتارا داعشیانه كرن، ژ به‌ر كو ده‌مێ ئاواره ژچیایی دگه‌هشتنه ده‌ڤه‌رێن ئارامێن هه‌رێمێ ل جهێ كو نانه‌كی یان ئاڤه‌كێ بده‌نێ دگۆتنه وی خه‌لكێ هه‌ژار پارتیا بارزانی به‌رپرسه و ئه‌و لایه‌ن ل هندێ چوون كو ئێدی پارتی ل هزرا شنگالیان هاته شووشتن و د ڤان خه‌وناندا پالپشتیا هه‌ڤكرن بۆ جوداكرنا شنگال ژ باشووری كوردستانێ، لێ خۆشبه‌ختانه شنگالی هه‌ر زوو تێگه‌هشتن كو ئه‌ڤ پیلان ژی پیلانا داعشێن ب وه‌كاله‌تن و گه‌هشتنه وێ باوه‌ریێ كو ب تنێ سه‌رۆك بارزانی یه بكاریت، برینا كوور یا شنگال ده‌رمان بكت.
