داعش په‌یڤه‌كا نهێنی یه. . !!
پشتی واشنتونێ نامێن په‌سن ئامێز بۆ نه‌حه‌زێ خوه ته‌هرانێ رێكرین، كو تێدا دیاركری دژایه‌تیكرن و شه‌ركرن د گه‌ل داعش به‌رژه‌وه‌ندیه‌كا هه‌ڤپشكه و چه‌ند تلگرافێن نه‌رازیبوونێ بۆ ئه‌نقه‌ره یا هه‌ڤپه‌یمانا دێرینا ئه‌مریكایێ ل ده‌ڤه‌رێ رێكرین كو “جیمس كلابه‌ر”سه‌رۆكێ ده‌زگه‌هێ هه‌واڵگیری یا ئه‌مریكا به‌رامبه‌ر لیژنا به‌رگریێ ل گۆنگرس گۆتی: “شه‌ڕكرن دژی داعش نه ژ ئه‌وله‌ویه‌تا توركیێ یه و ئاماژه ب هاریكاریا په‌رینه‌ڤه‌یا شه‌ركه‌رێن تیرۆرستێن بیانی بۆ سووریا و عیراقێ كر” ب رێیا توركیا كو ئه‌ڤه ژی وه‌كه فشار و گه‌فه‌كێ یه ل سه‌ر حوكمه‌تا توركیا، داكو رۆله‌كا هێش زێده‌تر بله‌یزیت د هه‌ڤپه‌یمانا شه‌ڕێ دژبه‌ری داعش دا.
ژ ئالیه‌كێ دن “توركیا و مسر” كو دو هه‌ڤدژێن ئێكن كۆمكرن، هه‌ر وه‌سا توركیا و یه‌كینه‌یێن پارستنا گه‌ل (YPG) كو ئه‌و ژی دو هه‌ڤدژێن ئێكن كۆمكرن ل ده‌مێ ئه‌و ئوپه‌راسیۆنا له‌شكری یا توركیا ئه‌نجامدای ب پشكداریا (39) ده‌بابه و (57) تانك و (100) هۆیێن له‌شكری و (572) سه‌ربازان بۆ ڤه‌گوهاستنا گڵكۆیێَ (سوله‌یمان شاه) یێ باپیرێ (ئۆسمان)ێ ئێكێ دامه‌زرێنه‌رێ ده‌وله‌تا ئوسمانی و سووریا و یه‌په‌گه (YPG) یێن دوستێن هه‌ڤ ل سه‌ر وێ ئۆپه‌راسیۆنێ ناكۆك كرن، دیسا ل ڤێ دووماهیێ ل سعوودیێ، داعشێ سعوودیه و ئیران و توركیا كو هه‌ر سێ ناكۆك و هه‌ڤدژێن ئێكن ل سه‌ر ئێك مێزا دانوستاندنێ كۆمكرن.
پشتی داعش ئه‌ڤ هه‌موو ناكۆكه كۆمكرین، گرفت ئه‌وه د ڤێ هه‌ڤپه‌یمانیا نێڤده‌وله‌تی دا، ئه‌ڤ ده‌وله‌تێن وه‌كی شانشینا سعوودیێ و ئیران و ئوردن و توركیا و ئیماراتا عه‌ره‌بی یا ئێكگرتی و مسر و قه‌ته‌ر یێن كو په‌یوه‌ندیێن د ناڤبه‌را پتریا ڤان ده‌وله‌تان، ب تایبه‌ت سعوودی و ئیران، و سعوودیه و توركیا، و سعوودیه و قه‌ته‌ر و مسر و توركیا د شه‌پرزه و ئالۆزن، له‌وڕا داعش په‌یڤه‌كا نهێنی یه، ناكوكان كوم دكه‌ت و دوستان جودا دكه‌ت.
ل ڤێره پرسه‌ك ژ دایك دبیت، ئه‌رێ دێ چاوا هێزێن سعوودیێ یێ سونه باوه‌ڕ مل ب ملێ هێزێن ئیرانی یێن كو باوڕا له‌شكریا وان یا شیعه‌یه ب پلا ئێكێ پێكڤه شه‌ڕێ داعش كه‌ن؟ و دێ چاوا ب به‌رهه‌ڤیا ده‌روونی و ئایینی و له‌شكری رابن بۆ به‌رهه‌نگاری یا لایه‌نێ دی كو داعشه؟ و دێ چاوا هێزێن توركیێ دێ د هه‌مان خه‌نده‌كا مسری دا بن یاكو سه‌رۆكێ توركیێ “ره‌جه‌ب ته‌یب ئه‌ردوگان”ی سه‌رۆكێ مسرێ (عه‌بدولفتاح سیسی) ب خوینڕێژ و داگیركه‌رێ ده‌سه‌ڵاتێ و كۆده‌تاكار ل قه‌له‌م دای؟
ئه‌رێ ب راست داعش هێزه‌كا هنده مه‌زن و ب هێزه كو ئه‌ڤ هه‌موو ده‌وله‌ته پێدڤیه د هه‌ڤپه‌یمانیێ دا بن، داكو شه‌ڕێ وێ بكه‌ن؟ یان ژی مه‌ره‌م ڤه‌شارتیه ب رێڤه‌به‌رنا شه‌ره‌كێ دۆمدرێژه ل رۆژهه‌لاتا ناڤین!، ئاینده دێ به‌رسڤا ڤان هه‌موو پرسان دده‌ت و نهێنیان ئاشكرا كه‌ت و گرێیان ڤه‌كه‌ت!!.
