داعش گەفان ل رۆسیا دکەت
پشتی کو سەرۆکێ رۆسیا دیار کر، ئەو دێ ب توندی تیرۆرستان سزا دەن و هەر وەلاتەکێ پشتەڤانی ل ئێرشا ڤێ دووماهیێ ل سەر رۆسیا کربیت دێ ب توندی هێتە سزا دان، رێکخستنا تیرۆرستی یا داعشێ بەرسڤا پۆتینی دا و دیار کر ئەو وەکو داعش خوە بۆ کریارێن نوو ل دژی رۆسیا ئامادە دکەن.
داعشێ ب رێیا تۆرێن جڤاکی دیار کر، چار ئەندامێن وان هاتینە گرتن و ژ ئالیێ هێزێن ئێمناهیێ یێن رۆسیا ڤە ب توندی هاتینە ئەشکەنجە دان، ئەو یەک بێ بەرسڤ نامینیت و ئەو وەکو رێکخستنا داعش خوە بۆ سزادانا رۆسیا بەرهەڤ دکەن.
ئەو یەک د دەمەکێ دایە پشتی کریارا تیرۆرستی یا ل رۆسیا گەلەک ژ وەلاتێن ئێکەتیا ئۆرۆپا ب تایبەتی ژی فرەنسا ل دژی کریارێن تیرۆرستی دەست ب پێرابوونێن مەزن کرینە و دبێژن داعشێ جارەکا دی دڤێت دەست ب کریارێن تیرۆرستی ل دژی وەلاتیێن سڤیل ل ئۆرۆپا بکەت.
