داكو ل رەمەزانێ‌‌ تووڕە نەبین پێدڤیە تێگەهێ‌‌ خوە ل دۆر رۆژیێ‌‌ ب گۆهورین

ئەڤرۆ

بەرپەرێ‌ ساخلەمیێ‌:

د.ئاڤا غازی رشید، تایبەتمەندێ‌‌ نەخۆشیێن دەرووی دیاركر كو هەموو كەس ل دەمێ‌‌ رۆژیگرتنێ‌‌ تۆرە نابن، بەلكو هندەك كەس ژی ئەوێن د رەمەزانێ‌‌ دا تۆرە دبن، د بنەرت دا بەری رەمەزانێ‌‌ ژی د تۆرە بووینە و هەر وان كێشە ل سەر كونترولنەكرنا هەستێ‌‌ تۆرەبوونێ‌‌ هەبوویە، ئانكو هاتنا رەمەزانێ‌‌ بەردەوامیە بۆ تۆرەبوونا بەری رەمەزانێ‌‌ و گۆت: هندەكێن دی ئەم دبینین كو رۆژی یا بوویە ئەگەر تۆرە ببن، بۆ وان كەسان خالا ژ هەمیان گرنگتر ئەوە كو دوبارە هەلسەنگاندنا تێگەهێ‌‌ وان بو رۆژیێ‌‌ بهێتە كرن و بزانن رۆژی چیە، بۆ نموونە هندەك هەنە وەسا د رۆژیێ‌‌ دگەهن كو چ تشتا نەخۆت و نەڤەخۆت هەتا دبیتە مەغرەب و رۆژی ل دەڤ وان زەحمەتە و بەرێ‌‌ وان یێ‌‌ ل سعەتێ‌‌ كەنگی دێ‌‌ بانگ دەت، بەلێ‌‌ د بنەرت دا رۆژی ئەڤە نینە، بەلكو رۆژیێ‌‌ گەلەك رامانێن كوور و بەرفرەه هەنە.
د.ئاڤا غازی، ئەوژی دیاركر، ئێك ژ پێنگاڤێن گرنگ كو مرۆڤ تۆررە نەبیت ئەوە تێگەهێ‌‌ خوە ل دۆر رۆژیێ‌ ب گوهوریت و هزربكەین رۆژی دەلیڤەكە خوە ب گوهورین و دەروونێ‌‌ مە پاقژ ببیت ژ نەڤیان و كەرب و كینێ‌‌ و رەفتارێن مە و ئەزمانێ‌‌ مە راستڤەببن و هەلسەنگاندنا ئاخفتنێن خوە بكەین بەری بێژین، و گۆتژی: رۆژی دیاردكەت كو مرۆڤی شیان یێن هەبن، بو نموونە بشێت پتری 12 سعەتا چ نەخۆت و نەڤەخۆت و كۆمەكا حەزێن خوە كونترول بكەت، رامان ژێ‌‌ ئەوە ئەو دشێت گەلەك گوهورینان بكەت و ئەم دبینین رۆژی قوتابخانەكە بەر ب گوهورینەكا باشتر.
تایبەتمەندیێ‌ نەخۆشیێن دەروونی دیاركر، مرۆڤان هندەك سالوخەت و جه هەنە تێدا تۆرە دبن، پێدڤیە ئەم هەول بدەین نەچینە وان جهان و خوە دوور بكەین ژ گەنگەشە و دانوستاندنێن بێ‌‌ مفا كو ژ رادیێ‌ خوە دەربكەڤن و ل جهێ‌ وێ‌‌ دەمێ‌ خوە تژی بكەین ب بەرنامەكێ‌ رێكخستی كو بشێین مفای ژێ‌‌ ببینین و وان گوهورینان بجهبینین.
د.ئاڤا غازی گۆتژی: خوارنا پاشیڤێ‌‌ گەلەك یا گرنگە، دێ‌‌ هاریكاریا مە بكەت زوی شەكرا مە نەهێتە خوارێ‌‌، چونكو هندەك جارا كێمبوونا شەكریێ‌ تۆرەبوونێ‌‌ پەیدادكەت، دیسا پێدڤیە نڤستنا خوە رێك بێخین، ئەم دبینین گەلەك جارا تێكچوون د نڤستنێ‌‌ دا ل رەمەزانێ‌ پەیدادبیت، ئەڤەژی دبیتە ئەگەر مێشك گەلەك بێهنا خوە ڤەنەدەت و بیردانكا مرۆڤی تێك بچیت و سەرئێشان پەیداببیت و زوی توورە ببین، خالەكا دیتر ژی گرێدای وان كەسانە یێن جگارا دكێشن كو رەنگە ئالودەبوون یا بو پەیدابووی ژبەر نیكوتینی، هندەك جارا ل سعەتێن دووماهیێ‌‌ یێن رۆژیێ‌‌ بەری فتارێ‌‌ لەشێ‌‌ وان داخازدكەت و توورە دبن و گۆت: پەیاما من بو جگاركێشا ئەوە كو رەمەزان دەلیڤەكە ژێ‌‌ دوور بكەڤیت و هەكە پشتی فتارێ‌‌ ژی نەبەردەتێ‌‌، رەنگە چەند رۆژان بێهنا وی تەنگ ببیت و دلێ‌‌ وی بچیتێ‌‌، بەلیێ‌ دێ‌‌ شێت كونترول كەت.
ل دووماهیێ‌‌ د.ئاڤاە دیاركر كو ئەڤە خالێن گشتینە و هەلبەت هەر مرۆڤەكی هندەك خالێن تایبەت ژی هەنە و دەمێ‌‌ سەرەدانا نۆشداری دكەت دێ‌ ل دووڤ وان رەفتار و گوهورینان شیرەتان ئاراستە كەت كو تۆرە نەبیت.

کۆمێنتا تە