دالەهی
فەهیما ئیبراهیم
هەستێن من پرت و بەلاڤ و ئاوارە و دەربەدەربووینە.
تە ژی بەختێ خوە ل من خراب کر. خەونین من مانە هەلێڤڕی. چەند دگۆتن: «تو یا ب هێزی». کەسێ نەدزانی هێزا من ژ نێڕینێن تەیە. من دلێ خوە د ناڤ دەستێن خوە دا مری دیت؛ من ب کفنێ ئازاران ڕاپێچا. د شەڤێن درێژ دا، کارێ من یێ ئێکانە کۆمکرنا پرتێن بیدەنگییا من بوو، چاڤێن من ئێدی ڕۆندکێن خوینێ دباراندن. چو شڕۆڤەکرن نەبوون، بەرسڤا هندەک ئازاران ژ ئازارێ ب خوە بژانتر بوو. من هەموو پەیڤ د گەورییا خوە دا داعویران، دا کەس ب دەردێ ژانێن من نەحەست.
ئەز نە یا ب هێزم وەکو پێشچاڤ، ئەز یا فێری کەتن و شکەستنان بوویم، یا وەستیایی و کەڕخی مە ژ ژیانێ، ژ چاڤەڕێبوونێ، ژ دەروونێ خوە یێ چو جاران پێڤە نەچت، ئەڤێ هەر جار، دوبارە ل هەمبەر پەیڤەکێ لاواز دبت و دکەڤت. ژ دیناتییێن خوە ئەز بێزارم، ئێدی جانێ من ژ پەیڤا خرش بوویە، نەماینە دارێژم، ئێدی دەرکرنا ئازاران ب ئاخفتنێ ناهێت، لەو هاوارا خوە دگەهینمە بێدەنگییێ، نهۆ، بێدەنگییا من ژی ب ڤان چەنگێن سولۆتی، مینا بەلاتینکەکێ خوە د ئاگری وەرکری، من ب چو ئارامگەهان ڕا ناگەهینن. چو تشت مینا بەرێ ڤەناگەڕت، چو نەمایە بهێتە گۆتن، ئەز و دەروونێ من یێ د خەمان ڕا مالقبوویی نەبت. ئێدێ پتر شەڕی بۆ مانێ ناکم، ئەز یا بتنێ، ئەز یا ماندی، ژیانێ دربێن هەموو بەختڕەشان ژێ وەرگرتن و ل شادییا من دان. چارەنڤیسەکێ پڕ ب ژان ل بەر من دانا، تە ژی تنێ بۆرییەکێ تژی بیرهاتن بۆ من هێلا.
جاران، ئەز هەست پێ دکم ئەز یا د جەستەیەکی بیانی دا دژیم، نە یێ منە، ئەز ئێکا دی مە، «ئەزا» خوە وندا کرییە؛ من دوور ژ هزروبیرێن من دبت، من ل جیهانەکا دی دگێڕینت، بەرێ من ددتە ڕێ یێن بێ وەغەر، بەرێ من ددتە ئاشۆپێن سەیر. ئەڤە ژی، وی هەستی ل نک من پەیدا دکت کو خەونێن من یێن بەرێ هەموو بووینە هەلم و بەرزە بووینە، تو ئێدی دناڤ دا، مینا ڕێڤینگەکی بوویی، تو بۆری و ئێدی ڤەناگەڕی.
