دانانا دەڤەردار و رێڤەبەرێن ناوچەداریان بڕیارەكا سیاسیە و ناهێتە بجهئینان
لەزگین جوقی:
ئەندامێ جڤاتا پارێزگەها نەینەوا دیار كر، هندەك ئەندامێن جڤاتا پارێزگەها نەینەوا سەر ب كۆتلا بابلیۆنڤە بزاڤان دكەن لێپرسین ل گەل پارێزگارێ نەینەوا ل دۆربابەتی دانان و گوهورینا قایمقام و رێڤەبەریێن ناحیا ل نەینەوا بهێتە كرن، ئەڤە بڕیارەكا سیاسی بوویە و ناهێتە بجهئینان.
د. ئەحمەد نازم دووبەردانی، ئەندامێ جڤاتا پارێزگەها نەینەوا بۆ ئەڤرۆ راگەهاند، هەر بڕیارەكا ژ جڤاتا نەینەوا دەربكەڤیت نەیا دروست بیت پارێزگاری دەستهەلات هەیە رەت بكەت، ب تایبەتی ژی دەمێ بڕیار نەدبەڕژەوەندیا گشتی دا بیت و گۆت: «ئەو بڕیارا بۆ دانانا دەڤەردار و رێڤەبەریێن ناوچەداریان ل نەینەوا هاتیەدان، بڕیارەكا سیاسی بوویە، مەرەم پێ ئەو بوویە كورد بهێنە پشتگوه هاڤێتن ل دەڤەرێن كوردستانی یێن سەر ب نەینەوا ڤە».
گۆتژی: «نوكە ژی لایەنێن سیاسی ل نەینەوا، ب تایبەتی ژی كوتلا بابلیۆن كار دكەت لێپرسینێ ل گەل پارێزگارێ نەینەوا ل سەر ڤێ بابەتی بكەت، وەسا دیارە لایەنێن سیاسی مەرەمێن سیاسی یێن خراب ل سەر گوهۆڕین و دانانا دەڤەردار و رێڤەبەریێن ناوچەداریان ل نەینەوا هەنە».
