دانانا سندوقێن هاریكاریێ ژلایێ وه‌لاتی و گروپان د زێده‌بوونێ دایه
ئه‌ڤرۆ، نه‌وزاد هلۆری:
ل پرانیا وه‌لاتێن جیهانێ به‌رنامێن تایبه‌ت ژ بۆ پشته‌ڤانیكرنا هه‌ژار و نه‌خۆشان و وان كه‌سان هه‌نه یێن كو پێدڤی ب هاریكاریان دبن، به‌لێ ل كوردستانێ به‌رنامه كێمن، ئه‌وێن ژلایێ گروپێن خێرخوازی و وه‌لاتیان ژی دهێنه كرن د رێكخستی نینه.
یاسین محمه‌مه‌د، وه‌كو ماموستایه‌كێ قوناغا په‌روه‌رده‌ی دیار كر كو گه‌له‌ك گرنگه هاریكاری و پشته‌ڤانیا هه‌ژار و نه‌خۆشان و كه‌سانێن پێدڤی بهێته كرن و گۆت: (هه‌ڤكاری و پشته‌ڤانیێن دارایی و مه‌عنه‌وی ب پله ئێك دڤێت حوكمه‌ت و ئالیێن شوله‌ژێ بكه‌ن، به‌لێ هه‌كه د شیانێن وان دا زێده بوون ل وی ده‌می دڤێت رێكخراوێن خێرخوازی و كه‌سانێن زه‌نگین و سه‌رمایه‌دار بهێنه سه‌ر خه‌ت و پشكدار بن، هه‌كه دیسان كه‌سانێن پێدڤی پتر بوون ل وی ده‌می دڤێت وه‌لاتی ژی ب رێیا په‌یوه‌ندیێن كه‌سی و جڤاكی و خێزانی و گروپێن خێرخوازی چ ب شێوێ راسته‌وخو بیت یان ژی دانانا سندوقا و كومكرنا هاریكاریان بیت ب دینار دینار بهێنه سه‌ر خه‌ت و ل گوره‌ی شیانان هاریكاریا وان كه‌سان بكه‌ن، ژبه‌ركو ئه‌وان ژی ماف هه‌یه بژین و چاره‌سه‌ریا ئاریشێن خوه یێن دارایی و ساخله‌می بكه‌ن).
یاسین زێده‌تر گۆت: (جهێ داخێ یه چو هه‌ماهه‌نگی دناڤبه‌را كه‌س و گروپێن خێرخوازی و ئالیێن شوله‌ژێ نینه ژ روویێ میكانزما كومكرنا هاریكاریان و دابه‌شكرنا وان، تنێ ئالیێن شوله‌ژێ هایداری بابه‌تێ وایه و موله‌تێ پێ دده‌ن ب تایبه‌تی بو دانانا سندوقان، له‌وا گرنگه رێكخستنه‌كا زۆر بۆ چه‌وانیا كومكرن و دابه‌شكرنا وان بهێته كرن و ژ پێدڤی یا وان كه‌سان زێده‌تر نه‌هێته راده‌ستكرن، ژبه‌ركو هنده‌ك جاران گه‌له‌ك ژ پێدڤی یا نه‌خوشی یان كه‌سێ پێدڤی هاریكاری دهێنه كومكرن و راده‌ستكرن، كو ئه‌ڤ یه‌كه ژی شاشیه، ژبه‌ركو كه‌سانێن دن ژی هه‌نه و پێدڤی ب هاریكاریایه).
ماموستا یاسین د درێژاهیا ئاخفتنێن خوه‌دا دیار كر كو پشكه‌ك ژ كارێن گروپان بۆ خه‌لكی روهن نینه و گۆت: (جڤاكێ مه ئێكه ژ وان جڤاكێن ڤه‌كری و پرانیا خه‌لكێ مه ژی حه‌ز ژ كارێن خێرخوازی دكه‌ن و د هاریكارن ل گه‌ل كه‌سانێن هه‌ژار و پێدڤی، له‌وا نه‌چارن كو هاریكاریا وان بكه‌ن، ژبه‌ركو ئه‌و ژی پێكهاته‌یا جڤاكی نه و خزم و كه‌س و كار و نێزیكێن وانن و ناخوازن وان هه‌ژار و نه‌خوشان د وان نه‌خۆشیان دا بهێلن ب تایبه‌تی د هه‌یڤا ره‌مه‌زانێ دا كو ره‌نگ و ئاستێ هاریكاریان زێده‌تر دبیت).
