دانوستاندنێن جەنگا ئێرانێ – ئیسرائیل و کەشەکێ مژەوی
دوهی بەرپرسەکێ وەزارەتا ساخلەمیێ یا ئیرانێ دیار کر، د ئەنجاما ئێرشێن ئسرائیلێ یێن ل سەر ئیرانێ دا هەتا نها هزار و سەد کەس هاتینە کوشتن و پتر ژ ٥ هزار کەس ژی بریندار بووینە.
ل ئالیێ دی دوهی ئیسماعیل بەقایی پەیڤدارێ وەزارەتا دەرڤە یا ئیرانێ ژی دیار کر، هەتا نها وان ژ بۆ دانوستاندنان چو داخوازی ژ ئەمریکا نەکرینە، چونکی دڤێت ئەمریکا گەرەنتیێ بدەت د دەمێ دانوستاندنان دا ئێرشی ئیرانێ نەهێتە کرن، لێ هەتا نها ئەمریکا ئەو یەک نەکریە و ژ بەر ڤێ یەکێ ژی ئیران بەرهەڤ نینە ل گەل ئەمریکا چو دانوستاندنان بکەت.
ئەو یەک د دەمەکێ دایە، کو دۆنالد ترامپ سەرۆکێ ئەمریکا د دیدارا ل گەل سەرۆک وەزیرێن ئسرائیلێ دا دیار کر، بەرپرسێن ئیرانێ داخوازا دانوستاندنان کرینە و حەفتیا بهێت دێ گەرەکا دی یا دانوستاندنان د ناڤبەرا ئیرانێ و ئەمریکا دا هێتە کرن و ئیران نەچارە پڕانیا داخوازیێن ئەمریکا قەبوول بکەت.
