داهاتێ برنجێ كوردی ل ناحیا دێره‌لۆك زێده‌بوویه
ئامێدیێ، مه‌حمود نهێلی:
به‌رپرسێ هوبا چاندنێ ل دێره‌لۆكێ بۆ رۆژناما ئه‌ڤرۆ دیار كر، ئه‌ڤ ساله رێژه‌یه‌كا گه‌له‌ك پتر ژ سالێن چویی ل سنورێ هوبا وان برنجێ كوردی هاتبوو چاندن و ڤێ یه‌كێ ژی داهاته‌كێ پتر بۆ جوتیاری دابینكریه و ئه‌گه‌رێن وێ ژی بۆ پتر تێگه‌هشتنا هاولاتیان ل سه‌ر مفایێن برنجێ كوردی و خرابیێن برنجێن بیانی ڤه‌گه‌راند.
ئه‌ندازیار عسمه‌ت ئیبراهیم به‌رپرسێ هوبا چاندنێ ل دێره‌لۆكێ بۆ رۆژناما ئه‌ڤرۆ گۆت: (دگه‌ل وێ یه‌كێ چاندنا برنجی ب زه‌حمه‌ت و ره‌نجه‌كا پتر ژ ده‌رامه‌تێن دتیر دڤێت، لێ ژ به‌ر كو مفایێن برنجێ كوردی باشترن ژ یێن بیانی و هه‌روه‌سا ژلایێ تام و خوه‌شیێ ڤه ژی ژ هه‌موو جورێن دیتر باشتره و چاندنا وی قازانجه‌كا باش تێدا هه‌یه بو جوتیاران و هه‌روه‌سا زه‌ڤیێن چاندنێ ژی دهێنه پاقژكرن ژ به‌ر وێ یه‌كێ سال بۆ سالێ رێژا چاندنا برنجێ كوردی به‌رڤ زێده‌بوونێ یه).
به‌رپرسێ هوبا چاندنێ ل دێره‌لۆكێ خویا ژی كر: ل سنورێ هوبا وانا پتر ژ 1500 دونه‌مێن ئه‌ردی ب كێر چاندنا برنجی دهێن و بۆ ئه‌ڤ ساله پتر ژ 650 دونه‌مان هاتینه چاندن و گۆت: ( ژ به‌ر وێ یه‌كێ كو ل ده‌ڤه‌را مه ئه‌ردێ ئاڤی هه‌یه جوتیارێن مه ب ره‌نگه‌كی باش برنج چاندیه و تایبه‌ت ئه‌ڤه هه‌یاما چوار پێنج سالایه هێردی هێردی جاره‌كا دی چاندنا برنجی به‌رڤ باشیێ دچیت بتایبه‌تی ژی ئه‌ڤ ساله ژ سالێن چویێ گه‌له‌ك باشتر بوویه).
ده‌رباره‌ی گرنگیا چاندنا برنجی ژی ل ده‌ڤه‌رێ به‌رپرسێ هوبا چاندنێ ل دێره‌لۆكی دیار كر: برنجێ كوردی مفایه‌كی باش تێدا هه‌یه ژلایێ ساخله‌میێ و پروتیناتا ڤه و جوتیار دشێت ب چاندنا برنجی قازانجه‌كی باش یێ ئابوری بكه‌ت ژ هه‌موو لایه‌كی ڤه بگره ژ لایێ مادی ڤه دێ ب بهایه‌كی باش هێته فروتن، و هه‌روه‌سا زه‌ڤیێن چاندنێ ژی دهێنه یاقژكرن پشتی ب برنجی دهێته چاندن ئه‌و گیای و كه‌ره‌سته‌یێن خراب دناڤ زه‌ڤیان دان نامینن.
و ئاشكرا كر: كو هه‌ر دوونه‌مه‌كا ئه‌ردی ئه‌گه‌ر ب ره‌نگه‌كێ باش بهێته كرن، دێ دورێن چوار ته‌نێن برنجی به‌رهه‌م ئینیت و نوكه برنجێ كوردی ژی ل بازاری دووقات یێ بیانی دهێـته فروتن زێده‌بار وێ یه‌كێ ب ده‌ست خه‌لكی ناكه‌ڤیت.
ناڤهاتی ئه‌و یه‌ك ژی ته‌كه‌ز كر: كو ئه‌و ل دووڤ شیانێن خوه به‌رده‌وام هاریكاریا جوتیاری دكه‌ن بۆ هه‌ر كاره‌كێ چاندنێ ئه‌و ئه‌نجام بده‌ن و گۆت: ( ئه‌و كه‌سێ ب كارێ چاندنا برنجی رابیت ئه‌م دێ ده‌رمانێن دژی گیایێ ناڤ برنجی ودژی كرموكێزان ده‌ینێ هه‌روه‌سا ب ده‌رمانێ قه‌له‌وكرنێ یێ كێمیایی دێ هاریكاریا وی كه‌ین و هه‌ر ده‌مه‌مه‌كێ پێدڤی ب مه هه‌بیت دێ چینه پێش و دێ بۆ ئێش و نه‌خوشیێن توشی برنجێ وی ژی دبن چاره‌سه‌ركه‌ین و ئه‌گه‌ر چ نه‌بیت بۆ بكه‌ین دێ رێنمایان پێشكێشی جوتیاری كه‌ین تایبه‌ت ژلایێ شیره‌تكاریا چاندنێ ڤه).
و خویاكر، ئه‌ڤان سالێن داویێ ماكینه‌یێن گێره‌كرنێ ئیناینه و جوتیار دێ شێت مفایه‌كی باش ژێ وه‌گریت و گه‌له‌ك ژ كارێن وی یێن گێره‌كرنێ دێ بۆ ب ساناهی ئێخیت.
ژبه‌رێ وێ یه‌كێ داخاز ژ جوتیارێ ده‌ڤه‌رێ كر، پتر گرنگیێ ب چاندنا برنجی بده‌ن ژ به‌ر كو داهاته‌كێ باش بۆ جوتیاری پێڤه دهێت و ئاشكراكر.
