داهاتێ وه‌زاره‌تا باژێرڤانی و گه‌شت و گوزار سه‌دێ 55 زێده‌بوویه
ئه‌ڤرۆ، ئه‌میر ئه‌ترووشی:
وه‌زیرێ باژێرڤانی و گه‌شت و گوزار راگه‌هاند، د ماوه‌یێ سالا بۆری یا 2022ێ دا، داهاتێ وه‌زاره‌تا باژێرڤانی و گه‌شت و گوزار یا حۆكمه‌تا هه‌رێما كوردستانێ سه‌دێ 55 زێده‌بوویه و ب تنێ د سالا بۆری دا، نێزیكی 306 ملیار دیناران داهاتێ وه‌زاره‌تێ بوویه و گۆت: ئه‌ڤه ل گۆره‌ی پلانه‌كا تێر و ته‌سه‌ل یا وه‌زاره‌تێ بوویه.
ساسان عه‌ونی، وه‌زیرێ باژێرڤانی و گه‌شت و گوزار ل حۆكمه‌تا هه‌رێما كوردستانێ راگه‌هاند، ب دانانا پلانه‌كا تێر و ته‌سه‌ل یا وه‌زاره‌تێ، ئه‌م شیان داهاتێ وه‌زاره‌تێ ب رێیا گشت رێڤه‌به‌ریێن گشتی و ده‌سته‌یێن گه‌شت و گوزارێ و سه‌رۆكاتیێن باژێرڤانیان و فه‌رمانگه‌هێن سه‌ر ب وه‌زاره‌تێ دا ب رێژه‌یا سه‌دێ 55 زێده‌بكه‌ین و ب تنێ د سالا بۆری 306 ملیار و 250 دینار داهاتێ وه‌زاره‌تێ بووینه.
زێده‌تر دبێژیت: ل سه‌ر راسپارده و رێنمایێن سه‌رۆكێ حۆكمه‌تا هه‌رێما كوردستانێ بۆ رێكخستنا داهاتێ ناڤخۆ، مه ل وه‌زاره‌تێ پلانه‌ك دانابوو ژ بۆ زێده‌كرنا داهاتی كو د سالا بۆری دا ب رێژه‌یا 35% زێده‌بكه‌ین، به‌لێ كارێ هاتیه كرن ژ پێشبینیێن مه باشتر بوویه و رێژه‌یا زێده‌كرنا داهاتی گه‌هشته 55%.
وه‌زیرێ باژێرڤانی و گه‌شت و گوزار ل حۆكمه‌تا هه‌رێما كوردستانێ ئاماژه ب هندێ ژی دا، ب دوو شێوه‌یان مفا ژ وی داهاتی دهێته وه‌رگرتن، یا ئێكێ ئه‌وه كو 15% ژ وی داهاتی پرۆژه‌یێن خزمه‌تگۆزاری ئه‌نجام بده‌ن، و بۆ كه‌رتێ ئاڤێ ژی 17% ژ داهاتی پرۆژه پێ هاتینه ئه‌نجامدان.
حوكمه‌تا هه‌رێما كوردستانێ ب رێیا باژێرڤانیان پشكه‌ك ژ مۆلكێ، خوه ب كرێ دده‌ت وه‌لاتیان دا كو هند ئه‌و وه‌كو خودانكار و پیشه مفاداربن، هند ژی حوكمه‌ت ب خوه مفاداربیت، ئه‌ڤه ژبلی وێ یه‌كێ ب رێیا داهاتێ وان مولكێن كرێ پرۆژه و خزمه‌تگۆزاری دهێنه چێكرن، كوما گشتی یا مولكێن ب كرێ هاتینه‌دان ل باژێرڤانیێن سه‌ر ب رێڤه‌به‌ریا گشتی یا باژێرڤانیان ل پارێزگه‌ها دهۆكێ دبیته نێزیكێ چوار ملیار دیناران.
ئه‌ندازیار دیار به‌حری ره‌سول، رێڤه‌به‌رێ گشتیێ باژێرڤانیان ل پارێزگه‌ها دهۆكێ دیار كر، مولكێن باژێرڤانیان ل سنوورێ پارێزگه‌ها دهۆكێ (ژبلی سه‌نته‌رێ قه‌زا دهۆكێ) دبنه دو هزار و 284 گرێبه‌ست. ل سنوورێ پارێزگه‌ها دهۆكێ زێده‌تری 830 گرێبه‌ستێن ژ جۆری به‌رخۆری هه‌نه و هه‌موو ئه‌و گرێبه‌ستن یێن كو داینه‌ڤ وه‌لاتیان بۆ چه‌ند سالان و پشتی داوی هاتنا گرێبه‌ستێ وان، دبیته مولكێ حوكمه‌تێ.
خویاژی كر، هه‌روه‌سا ئه‌ڤ جورێ مولكێن كرێ بۆ وان كومپانی و كارگه‌هان هاتینه‌دان ئه‌ڤێن سه‌رمایێ وان ژ 75 ملیون دیناران پتر بیت، ل سنوورێ باژێرڤانیێن سه‌ر ب رێڤه‌به‌ریا گشتی یا باژێرڤانیان 114 كارگه‌هێن مه‌زن ژ ڤی جۆری هه‌نه، موله‌تا ئه‌ڤان جۆره پرۆژان ژلایێ رێڤه‌به‌ریا گشتی یا گه‌شه‌پێدانا پێشه‌سازی دهێته‌دان.
دیسان ئه‌ڤ جۆرێ مولكان ژی ب هه‌مان شێوه بۆ وان كومپانی و كارگه‌هایه كو سه‌رمایێ وان ژ 75 ملیون دیناران كێمتره، هژمارا وان ژی دبیته 779، موله‌تا وان ژی ژلایێ ژوورا بازرگانی دهێته‌دان.
دیار به‌حری دیار كر ژی كو مولكێن كرێ یێن سالانه هه‌نه كو وان مولكان بخوڤه دگریت كو ژ قوناغا به‌رخوری دبورن و دبن مولكێن حوكمه‌تێ و ب سالانه هاتینه‌دان ب كرێ و هژمارا وان دبیته 565 و گۆت: د پلاندایه و نوكه كار ژی ل سه‌ر دهێته‌كرن كو ده‌ڤه‌رێن پێشه‌سازی بهێنه كوژاندن و بزڤرن بۆ حوكمه‌تێ و مولكێن كرێ یێن حوكمه‌تێ بهێنه زێده‌كرن دا كو زێده‌تر مفا ژ وان مولكان بهێته وه‌رگرتن ب تایبه‌تی ژی بهێنه‌دان بۆ وه‌به‌رهێنانێ، به‌لێ ژ به‌ر كو پشكه‌ك ژ ده‌ڤه‌ران هه‌تا نوكه ماسته‌ر پلان نینه و هنده‌كان ژی مولك نینه و هند ده‌ڤه‌ر ژی ژبه‌ر بابه‌تێن ئه‌منی، كارتێكرن ل رێڤه‌چوونا كاری كریه.
