داهێنەرەكێ گەنج ئاستەنگان د گوهۆڕیت
نەرمین رێكانی:
داهێنەرێ گەنج (رەوان رەشاد) كو دەرچوویێ كولیژا ئەندازیاری یە ل زانكۆیا دهۆك و دامەزرێنەرێ ئامیرێ گایدەر مەیتە، ستارت ئاپەك كۆ ئارمانجا وی بهێزكرنا كەسانێن نابینایە ب تەكنۆلۆژیا زیرەك و ژیریا دەستكرد، د دیدارەكێ دا بۆ روژنامەیا ئەڤرۆ گوت: ژ زارۆكینیا خوە دا من حەزا دروستكرنا ئامیرەیان هەبوو، هەر چەندە ل وی دەمی چەندین ئاستەنگ هاتنە د رێكا من دا، ژ بەر نەبوونا وان كەرەستێن پێدڤی د باژێرەكێ بچووكدا، كو ئەو ژی (ئاكرێ) بوو، بەلێ من دەست نە داهێلان و بەردەوام بووم .
هەروەسا گوت: دەستپێكا هاتنە پێشا من د قوناغا زانكۆیێ دا بۆ پشتی ئەز هاتیمە وەرگرتن ل كولیژا ئەندازیاری بەشێ كارەبا و كۆمپیتەری، ل ئەڤی بەشی ئەو بەهرەیێن من هەین پتر دیار بوون، ل قوناغێن دووماهیێ مە پرۆژەیەك دروستكر بۆ كەسانێن نابینان، كو ژبۆچوونەكێ بۆ نابینایان پێك دهات، كو دشێت هاریكاریا وانا بكەت بۆ ب رێڤەچوونێ، پشتی مە ئەڤ نموونەیا خوە نیشا سەرۆك وەزیران (مەسروور بارزانی) دای، ل ئێكەم دیدارا لاوان كو ل زانكۆیا دهۆك هاتبوو رێكخستن، ئەڤ چاڤپێكەفتنە بۆ خالەكا گۆهۆڕینێ د ژیانا من دا، كو ئەز شیام ڤی پرۆژەیێ خو بەرە ف پێشڤە ببەم و بۆ خەلكی پتر بدەمە دیاركرن كا مفایێن ڤی ئامیرەی چەندە و ب خۆشحالی ڤە گەلەك كەسێن نابینا حەزا ب كارئینانا ڤی ئامیرەیی هەبوو، ل دەستپێكێ شێوازێ بكارئینانا ڤی ئامیرەی یێ سادە بوو ، كو ب تنێ تەوەرەك پێڤە هەبوو بۆ دەستنیشانكرنا دووراتیەكا دیاركری كو ب رێكا دەنگی كەسێ بكارهێنەر دهاتە ئاگەهداركرن، بەلی د نوكە دا ئەم كار ل سەر هندێ دكەین و د پلانا مەدایە ب چەندین رێكێن نوو و تەكنۆلۆژیایەكا پێشكەفتیتر ڤی ستارت ئەپی مەزنتر لێ بكەین و پرۆژەیێنزێدەتر مە هەبن بۆ خزمەتكرنا كەسانێن خودان پێدڤیێن تایبەت.
