داواکاریا گشتی ڤەکۆلینێ ل سەر خەندقاندنا رەھەندی دکەت
ئه‌ڤرۆ:
چێکرنا رووبارەکی دناڤ تاخێ زرکا دا و ب سەرڤەچوونا ماوێ پرۆژەی و پشتگوھخستنا پرۆژەی، بۆ ئەگەر زارۆیەکێ پێنچ سالی ل رۆژا چارشەمبیا بووری بکەڤیتە د گومەکا ئاڤا وی رووباری دا و گیانێ خوە ژ دەست بدەت. سەباح ئەترووشی بابێ زارۆی بۆ ئەڤرۆ دیار کر کو ھەتا نوکە وی سکالا ل سەر بەلێندەرێ پرۆژەی تومارنەکریە، بەلێ دادگەھا دھۆکێ و داواکارێ گشتی یا ڤەکۆلینێ ل سەر ڤێ بوویەرێ دکەت. ژ ئالیێ خوەڤە ئەندامەکێ پەرلەمانێ کوردستانێ دیار کر کو مافێ وەلاتیانە سکالایێ ل سەر بەلێندەرێن خەمسار تومار بکەن و بێگومان کەسێن خەمسار دێ گەھنە سزایێ خوە.
سەباح ئەترووشی بابێ وی زارۆیێ پێنچ سالی یێ ل رۆژا چارشەمبیا بووری ١٥-٤-٢٠١ ل ناڤ گۆمەکا ئاڤێ دا ل نێزیک مالا خوە ل تاخێ زرکا گیانێ خوە ژ دەستدای بۆ رۆژناما ئەڤرۆ دیار کر، پشتی ئەز بۆ ماوەێ پتر ژ دو ھەیڤان کەفتیمە د گرتیخانێ دا، خێزانا من مال بجە ھێلابوون و ڤەگەریابوونە مالا بابێ من، بەری رۆژا چارشەمبی ب چەند رۆژەکان جارەکا دا ڤەگەریانە مال، بۆ ھندێ کاروبارێن مالێ بکەن کو ئەز ب ڤەگەرمە مال، چونکو پێشبینی بەر ب ھندێ دچوون مادێ قانوونی یێ ئەز پێ ھاتیمە دەستەسەرکرن بھێتە گوھۆرین و ئەز ب کەفالەت بھێمە بەردان و گۆت: ئەز نەگەھشتم پشتی دەرکەفتن ژ گرتیخانێ کورێ خوە ببینم و ب تنێ گەھشتمە سەر گۆرێ وی.
گۆما ئاڤێ سێ مەتران یا کوور بوو
ناڤبری ل دور پەیدابوونا وێ بوویەری خویا کر، ئەڤە ماوێ دو سالانە رووبارەک ل نێزیک مالا مە دھێتە چێکرن کو دبێژنێ رووبارێ کێڤلا و زرکا و ل نێزیک مالا مە دێ بووریت و نێزیکی ٢٠٠ ھەتا ٣٠٠ مەتران ژ مالا مە دوور بەلێندەرێ پرۆژەی ھندەک گۆمێن ئاڤێ چێکرینە، ماوێ پرۆژەی ب تنێ شەش ھەیڤ بوون، بەلێ ژ بەر کاودانێن ھەرێمێ گیرووبوو و گۆت: دەمێ بەلێندەری ئەو گۆمە د کۆلاین مە د گۆتێ ئەڤە مەترسینە و دڤێت بھێنە پرکرن یان ژی پەرچیمکرن، بەلێ بەلێندەری چو پێنگاڤ نەھاڤێتن.
بابێ رەھەندی ئەو یەک ژی دیار کر، ل رۆژا دیارکری مێھڤان ل مالا مە بوون و یا پری بچووک بوو، کورێ من ژ مالێ ڤەقەتیابوو و بەر ب وێ گوما ئاڤا چوو بوو، ل دووڤ پێشبینیان ئەو چوویە نێزیک گۆما ئاڤێ و بەر ھاڤێتینە تێدا، بەلێ رەنگە خشیا بیتە د گۆما ئاڤێ دا و کەفتبیتە تێدا و گۆت: ئەو گۆما ئاڤێ سێ مەتران یا کوورە و زارۆ نەشیایە خوە قورتال بکەت.
٤٠ دەقیقان دلێ وی مابوو ساخ
زێدەتر ل دوور روودانێ دبێژیت: دەمێ دایکا وی ھەست ب بەرزەبوونا وی کری، ئێکسەر بەر ب وێ گوما ئاڤێ چوو، دیت نەعالێن وی ل سەر لێڤا ئاڤێ نە، بەلێ خۆشبەختانە خووشکا وێ ل گەل بوویە ھەکە رەنگە دایکا رەھەندی ژ دلسۆتیا جەگەرێ خوە ھاڤێتبایە د ئاڤێ دا بۆ قورتالکرنا رەھەندە و پشتی ھینگی گازی کریە جیرانان و کەسەکی سوندە ئێخستیە خوە و چوویە د ئاڤێ دا و رەھەند ئینایە دەر و گۆت: رەنگە خەندقی بوو، بەلێ پشتی ٤٠ دەقیقان ژی ھێشتا دلێ وی یێ ساخ بوو، لێ مێشکێ وی فەتسی بوو.
سەباح ئەترووشی ئاشکرا کر کو ھەتا نوکە دیار نینە کا ئەڤە کیژ کۆمپانیە ڤی پرۆژەی ب رێڤە دبەت و چو تابلو ژی نەھاتینە ھەلاویستن و گۆت: ھەتا نوکە من چو سکالا ل سەر کۆمپانیا جێبەجێکار تومارنەکرینە، بەلێ ئەز ژ لایێ داواکاریا گشتی و دادگەھا دھۆکێ و ئاسایشا دھۆکێ لیژنەکا ڤەکۆلینێ ل سەر خەندقاندنا رەھەندی ھاتیە پێکئینان و دێ ڤەکۆلین ل سەر ھێتە کرن کا کی یێ خەمسارە و ھەر بۆ ڤێ مەرەکێ ژی نڤیسینگەھا مالتا یا پۆلیسان داخواز کریە ئەڤرۆ رۆژا سێشەمبی ئەز و دایکا رەھەندی و بابێ من بچینە لایێ وان و ئیفادێن خوە ل سەر بوویەرێ بدەین.
باژێرڤانیا دھۆکێ ژی یا خەمسارە
سەباح خویاژی کر کو بەری نھا ژی گەلەک روودان ل سەر ڤی رووباری و وان گۆمێن ئاڤێ پەیدابووینە و گەلەک ژ وان ژی برینداربووینە و دەست و پێن وان شکەستینە، بەلێ ئەڤە ئێکەم حالەتێ خەندقاندنێ بوویە و گۆت: من داخواز ژ دادگەھێ کریە خوە ھەکە ئەم ژی د خەمساربین، بلا پێرابوونێن قانوونی د دەرحەقی مەدا بھێنە وەرگرتن و ھەکە بەلێندەر یێ خەمسار بیت، ئەو ژی بکەڤیتە بەر ڤەکۆلینێ و پێرابوونێن قانوونی.
بابێ رەھەندی گازندە ژ باژێرڤانیا دھۆکێ ژی کر کو ھەر پرۆژەکێ بھێتە ئەنجامدان وان لیژنێن سەرپەرشتیێ ھەنە و نزا بۆچی ھەتا نوکە وێ لیژنێ ئەڤ گۆمێن ئاڤێ نەگرت بوون یان ژی پەرچیم نەکربوون.
بەلێندەرێ خەمساریێ بکەت دێ ھێتە سزادان
زیرەک تاھر دوسکی، سەرۆکێ لقێ دھۆک یا ئێکەتیا بەلێندەرێن کوردستانێ دیار کر، ھەکە بەلێندەرەک خەمساریێ د پرۆژێ خوە دا بکەت و وەلاتیەکێ پێ زیاندار بیت یان ژی تووشی روودانەکا دلتەزین ببیت، وەلاتی مافێ ھەی سکالایێ ل سەر بەلێندەری توماربکەت و گۆت: گەلەک جاران حالەت پەیدابووینە و وەلاتی تووشی روودانان بووینە و بەلێندەر پێ ھاتیە گونەھبارکرن.
سەرۆکێ لقێ دھۆک یا ئێکەتیا بەلێندەرێن کوردستانێ خویا کر کو بەری چەندەکێ ل دەمێ قێرکرنا جادێن کورا بەلێندەری نیشانێن ھاتن و چوونێ نەدانابوون و ترومبێلا وەلاتیەکی وەرگەریا و ئەڤە بۆ ئەگەر کو بەلێندەر قەرەبوویا وی وەلاتی بکەت و گۆت: ھەکە حالەتێن دلتەزین پەیدابن و بەلێندەر یێ خەمساربیت و وەلاتی سکالایێ ل سەر توماربکەن، دوور نینە ھەتا بەلێندەر بھێتە زیندانکرن ژی.
ل دور حالەتێ خەندقاندنا رەھەندێ پێنچ سالی زیرەک تاھر دوسکی خویا کر کو مافێ وانە سکالایێ توماربکەن و بێگومان ل گۆرەی قانوونێ دێ پێرابوون ھێنە وەرگرتن.
دڤێت ئەو گۆمێن ئاڤێ ھاتبانە پەرچیمکرن
بەیار تاھر، ئەندامێ لیژنا باژێرڤانیان ل پەرلەمانێ کوردستانێ بۆ ئەڤرۆ دیار کر، ل گۆرەی قانوونا ژمارە ٤٠ یا سالا ١٩٥١ یا قانوونا مەدەنی، ھەر بەلێندەرەک یان رێڤەبەریەک دەمێ پرۆژەکی ئەنجام ددەت دڤێت ھەموو پێرابوون بھێنە وەرگرتن کو چو زیان نەگەھیتە وەلاتیان و گۆت: ھەکە ئەو گۆمێن ئاڤێ یێن رەھەند تێدا خەندقی نەھاتبنە پەرچیمکرن و سیمەکرن، بێگومان دێ لایەنێن خەمسار کەڤنە بەر ڤەکۆلینێ و پێرابوونێن قانوونی و دادگەە دێ ڤێ پرسێ ئێکلاکەت کا کی یێ خەمسارە.
