داڕیژە
سیلاڤ بازێركی
لڤێ دووماهیێ جۆرە ڤیدیۆیەك ل قوتابخانەیان یا بوویە تڕێند، ماموستا دێ داخوازێ ژ دایك و بابێن قوتابییان كەت د پارچە ڤیدیۆیەكی دا هەستێ خوە بەرامبەر زاڕوكێ خوە دەرببڕن، زاڕۆك و ماموستا ب گوهلێ بوونا هەستێ ڕاستەقینە یێ دایك و بابان زۆر كاریگەر دبوون هەتا وی ڕاددەی جاران ڕۆندك خوە د چاڤێ وان دا نە دگرت،چونكو ڤیانا دایك و باب و جەگەرا وان پاقژترین و ب وەفادارترین ڤیانە، ڤیانەكا خوینێ و ڕوحی یە، ڤیانەكا بێی بەرژەوەندیە، ئەرێ ما ئەڤ ڤیانە نەیا ژ هەژی یە ڕۆندك بۆ بهێنە ڕێژتن؟
هەكە ل گەل هەر دل گرانیەكا ب هەر ئەگەرەكئ هەی دناڤبەرا ژن و مێران دا یان د ناڤبەرا خۆشكۆ برایان دا یان هەڤالان دا لایەك دەستبەرداری توڕەییا خوە بیت هەتا هەكە یێ دروست بیت ژی ئەو كەسە چەند خودان سینگەكێ بەر فرەهە یێ بشێت ل سەر كەرب و توڕەییا خوە زال بیت و چ بڕیاران ل دەمێ توڕەیێ نە دەت و دووماهیا ژیێ خوە ل نێزیك ببینیت هەر وەكی(عەلیێ كوڕێ ئەبو تالبی) دبێژیت: بۆ دونیا خوە وەسا بكە هەر وەكی چ جاران نامری و بۆ ئاخرەتا خوە وسا بكە هەر وەكی سوباهی دێ مری، ئەڤجا مادەم هەر دێ ژ ئەڤێ جیهانێ بار كەین سلبوون و دلگرانییا ل گەل كەسێن دیت چ مفا هەیە؟ ڕابە و هەستێ خوە بۆ بەرامبەری خوە ب داڕێژە بلا ڕۆندكێن ڤیانەكا پاقژ بهێنە ڕێتن نەكو ڕۆندكێن ل سەر لێڤا كێلیا گۆڕی، مادەم ئەم ئێك خوین ومللەتین ئەم هەر ئێك كەسین و نابینە دوو.
هەتا پێغەمبەرێ مە(موحەمەد) ی سلاڤ لێبن دەربارەی ئەڤی بابەتی گۆتییە: ل دەمێ دو كەس ژ ئێك و دو دلگران دبن یێ ژ هەموویان باشتر ئەوە یێ ل دەستپێكێ ل گەل یێ دی باخڤیت (ئیمام بوخاری و ئیمامموسلم) ڤەگۆهاستیە، لێ ل ئەڤی سەردەمی ب تەمامی بەرۆڤاژی فەرمودەیا پێغەمبەری هزر دكەن دبیت دو كەسان ڤیانا ئاشبوونی هەبیت، لێ هەر ئێك هزر دكەت هەكە ئەو ل دەستپێكێ هەستێ خوە ب داڕێژیت دێ ب سڤكاتی هێتە دیتن، ئەڤجا ئەڤ تێگەهە و هزار تێگەهێن دی بووینە ژەنگ ل سەر جڤاكی.
