داکو قوتابی ل تاقیکرنان ب سەربکەڤیت
ئه‌ڤرۆ نيوز:
پتریا خێزانان ل دەمێ کو زارویێن وان نێزیکی دەمێ تاقیکرنان دبن بەرئاتافی ترسێ دبن، ئەڤ چەندە رەنگڤەدانێ ل قوتابیان ژی دکەت و ئەوژی رۆژانێن خۆ لژێر فشارێن دەروونی یێن ب مەترسی دبورینن.
خێزانێ رۆلەکێ گرنگ ھەیە:
یا ل سەر خێزانێ پێدڤیە ژینگەھەکا ڤالا ژ شەرەنیخێ بۆ قوتابیان پەیدابکەن داکو ئەوژی ھەڤپشک نەبن و بشێن ھزرێن خۆ بکەن.
خۆ ژ بیرئانێن ب کۆمی دوور بکە، ژبەرکو ئەڤە دێ بۆ قوتابیان بنە دەلیڤەیەک پشکداریێ د گەنگەشان دا بکەن و دێ خۆ ژ ھزرکرنا تاقیکرنێ دوور کەن.
بۆ دەمێن درێژ روونشتی نەمینن، ژبەرکو ئەو دبیتە ئەگەری َتووشبوونا قوتابی ب مەلەلێ و پاشی نەشێت ھزرێن خۆ بکەت و باشترە دەم بۆ دەمی خواندنێ بھێلیت و لڤینێ بکەت.
یا ژ ھەموویێ گرنگتر دەمێ قوتابی دخوینیت، باشترە موبایلێ ب دائێخیت و دائێخستنا وێ دێ وی ژھزرێن ژدەرڤە دوور کەت و پتر ب بابەتێن زانستی ڤە دێ ھێتە گرێدان.
د خواندنێ دا پێدڤیە:
1- یا پێدڤیە دەرس ھەموو بھێتە خواندن وەکو رۆژنامەیان، پاشی بابەت بھێنە پشککرن بۆ چەند لقەکان، ژبەرکو زانینا ھەر پارچەیەکێ دێ گرێدای تێگەھشتنا بابەتی بیت.
2- یا گرنگە ئەو تشتێ تو دخوینی ب تشتەکێ راست ل دەوروبەرێن خۆڤە گرێدەی، ژبەرکو ئەو دێ پتر ھزرا تە ل بابەتی ئینیتەڤە دتاقیکرنێ دا، ھەروەسان باشترە پێزانینێن خۆ بکەیە کەتوار داکو تە شیانێن بیرئانینا وێ ل تاقیکرنێ ھەبن.
3- شێوازێ خۆ یێ تێگەھشتنێ نەگوھۆرە ددەمێ تاقیکرنێ دا، ھەکە تو ژوان کەسان بی ئەوێن ب دەنگەکێ بلند دخوینی یان برێڤە دچی و دخوینی، بلا شێوازێ تە یێ تاقیکرنێ ژی وەسان بیت داکو چ ترس بۆ تە پەیدانەبن.
تشتێ ھاتیە زانین ژی ئەوە کو قوتابی ژ تاقیکرنا د ترسن ژبەرکو ئەو ھزر ل مال و کەس و کارێن خۆ دکەت، دەوروبەرێن وی دبنە ئەگەر کو ئەو یێ ئارام نەبیت، ژبەرکو گەلەک گرنگیێ ددەنێ و دیسان قوتابخانێ و ب تایبەت قوناغێن دواناوەندی ل بەر وی دکەنە چیا، ئەڤ چەندە ھزرێن نێگەتیف بۆ وی پەیدادکەن، یا ل سەر قوتابی پێدڤی یە ل دەمێ تاقیکرنان خۆ ژ ھەموو جورێن قەھوێ و حەبێن خەوھاتنێ دوور بکەت، ژبەرکو ئەو دبنە ئەگەر کو پتر ھشیار بمینیت و ھزرکرنا وی کێم دبیت و باشترە خوارنا وی گەلەک یا باش بیت و تێر بنڤیت ژ (8) دەمژمێران کێمتر نەبیت و خۆ ژوان تشتان دوور بکەت یێن کارتێکرنێ ل کوئەندامێ دەماران دکەن.
گەلەک یا پێدڤیە سپێدەھیا پیچەک تێشتێ بخوی ژبەرکو ئەو دانێ سەرەکی یە و کاردکەت بۆ زێدەکرنا بزاڤا لەشی و مێشکی و دڤێت خوارنا تێشتێ تشتەکێ سڤک بیت و ھەموو ژێدەرێن خوارنێ دناڤدا ھەبن داکو رێژا شەکرێ د خوینێ دا بپارێزن و مێشکی ب بزاڤ بێخن بیردانکێ ب ھێزبێخن و باشترە تێشت یا پێکھاتی بیت ژ کوپەکێ شەربەتێ یان ئاڤەماستێ و ھێکەکا کەلاندی و پارچەکا نانی و پەنیری و دروستە تو مورەبایێ و ھنگڤینی بخوی دگەل ھندەک زەرزەواتا وەکو خیار و باجانسۆرکان و گێزەران.
باشترە قوتابی گەلەک شلەمەنیان ڤەخوت وەکو ئاڤێ و شەربەتا سروشتی و شیری و خوە دوور بکەت ژ چایێ و قەھوێ و خوارنێن ھێزێ و چا و قەھوە د پێکھاتینە ژ گەلەک کافایینی و قوتابی زوو ھشیاردبیت بەلێ ھێزا مێشکێ وی کێم دبیت و دیسان ب چ رەنگەکی ڤەخوارنێن غازی ب کارنەئینە و ل شوونا وان شەربەتا سروشتی ب کاربینە بۆ ڤەخوارنێ.
