دایك دگەل سێ كچێن خوە یاریزانێن باسكێت بۆل و ڤۆلی بۆلێ نە
د داخویانیەكێ دا ستێرا پارێزگەها دهۆك و یاریزانا یانەیا سەنحاریب ئیڤون داود رەبەن دیار كر ئەو دگەل سێ كچێن خوە بۆ ماوەیێ چەندین سالە یاریزانێن یاریێن باسكێت بۆل و ڤۆلی بۆلێ نە و پشكداری چەندین قارەمانیێن پارێزگەهێ، هەرێمێ و ئیراقێ، دەرڤە كرینە و هیڤی خواست دەلیڤێ بدەنە یاریزانێن كچ ب وەرزشا خوە شادبن و شیانێن هەین ناڤێ پارێزگەهێ و كوردستانێ بلند بكەن.
زێدەتر ناڤهاتی بۆ رۆژناما ئەڤرۆ گۆت: ئەم ژ بنەمالەكا وەرزشڤانین ژ دەیكوباب و برا و خویشك، بابێ من وەرزشڤانێ دێرینێ پارێزگەها دهۆكێ یە و خەما وی بلندكرنا ئاستێ وەرزشێ یە تایبەت ل سەر ئاستێ كچان ودەرئەنجامێ ڤێ خەمخۆریێ یانەیا سەنحاریب شیایە چەندین قارەمانیێن هەرێما كوردستانێ و ئیراقێ ب دەستڤە بینت تایبەت ئەوا ل سالا بۆری كو ئەم شیاین هەردو قارەمانیێن ڤۆلی بۆلێ و باسكێت بۆلا ئیراقێ ب دەستڤە بینن و دێ بەردەوامبین وەكو نوونەر و كچێن پارێزگەها دهۆكێ دەستكەفت و ئەنجامێن مەزن بینن.
ژلایەكێ دووڤە ئیڤون وەكو دەیكەك ژی گۆت: ژبۆ بەردەوامیا بلندكرنا ئاستێ وەرزشا كچان ل پارێزگەهێ بۆ هەردو یاریێن باسكێت بۆل و ڤۆلی بۆلێ هەرزو وەكو دەیكەكە من سێ كچێن خوە ئەو ژی دۆرین، دوریس و دیما هەر ژ زارووكینا وان من فێركرینە وەرزشێ و هەتا نوكە یا ژ هەمیا مەزنتر دۆرین یا 17 سالی شیایە ببیتە بچووكترین یاریزانا هەلبژارتیا ئیراقێ بۆ یاریا باسكێت بۆلێ و دیسان یا ڤۆلی بۆلێ یە وەكو یاریزانا سەرەكی ژی سپێرتا راهێنەری ل سەر شیانێن وێ یە و گەشبینم هەردو كچێن دی ژی دێ بنە ستێرێن وەرزشی.
ل دووماهیێ ناڤهاتی هیڤی خواست پشتەڤانیا كچێن وەرزشڤان ل پارێزگەها دهۆكێ بهێتە كرن و گۆت: مە ل قوتابخانە، پەیمانگەهـ و كۆلیژەیێن وەرزشی كۆمەكا باش یا یاریزانێن وەرزشی بۆ گەلەك یاریان هەنە، هیڤییا مە ئەوە جهێن پەیوەندیدار و یانەیێن وەرزشی چاڤ ل یانەیا سەنحاریب بكەن و پشتەڤانیا كچێن پارێزگەهێ بكەن و شانازیێ پێ دبەین یانەكا بێ جوداهی هەمی یاریزانان وەردگریت و بنیاتێ وەرزشی چێدكەت لێ دڤێت پشتەڤانیا ماددی بۆ ڤێ یانێ ژی هەبیت دا بشێت باشتر و بهێزتر بیت.
