دایك و بابێ وی حه‌ز نه‌دكرن ببیته رۆژنامه‌ڤان
خانكێ، دلڤین ره‌شید:
رۆژنامه‌ڤان (غه‌زوان غازی) د دیداره‌كێ دا بۆ رۆژناما ئه‌ڤرۆ دیاركر كو ئه‌و ده‌رچۆیێ پشكا رۆژنامه‌ڤانیا ئه‌لكترۆنی یه ل زانكۆیا پولیته‌كنیكا دهۆكێ یه، ده‌مێ ل قوناغا دویێ هاتیه ناڤ وارێ راگه‌هاندنێ و ده‌ستپێكا وی ل رۆژناما (ده‌نگێ لالش) بوو، كو بۆ ماوه‌یه‌كێ درێژ وه‌ك په‌یامنێر ل وێرێ كاركریه، پشتی ده‌رچۆنێ ژی وه‌ك په‌یامنێر و پێشكێشكار و كامیره‌ڤان و مۆنتێر ل كه‌نالێ سه‌ما تیڤی یێ لۆكالی به‌رده‌وامی ب كارێ خوه یێ راگه‌هاندنێ دایه.
ناڤبری، كو خه‌لكێ كومه‌لگه‌ها بابیری یه سه‌ر ب ناچه‌داریا ئه‌لقۆش ڤه ل ده‌شتا نه‌ینه‌وا، هێشتا گۆت: ل ده‌ستپێكێ دایك و بابێ من حه‌ز نه‌دكرن ئه‌ز ل پشكا رۆژنامه‌ڤانیێ بخوینم، چنكو وان دزانی دژیه‌كێ بچووك دا من حه‌زا وه‌رزشێ هه‌بوو، لێ ب بۆرینا ده‌می بۆ من دیاربوو كو ئه‌ز دێ رۆلێ خوه پتر دناڤ راگه‌هاندنێ دا بینم و شیره‌تامن بۆ هه‌موو رۆژنامه‌ڤانان ئه‌وه كو پێدڤیه ل دووف ئه‌ته‌كێتێن رۆژنامه‌ڤانیێ بچن، چنكو پتریا رۆژنامه‌ڤانێن مه نه د ئه‌كادیمی نه و گه‌له‌ك جاران هنده‌ك ئاریشه دبن، ب تایبه‌ت دناڤ سۆشیال میدیایێ دا، ئانكو نه‌هه‌ر كه‌سه‌كێ مایكه‌ك هه‌لگرت و شه‌رم نه‌كر ئه‌و رۆژنامه‌ڤانه، نه‌خێر به‌لكو دڤێت رۆژنامه‌ڤان ژی هنده‌ك سنۆر بۆ شه‌رمێ ل ده‌ف هه‌بن و نابیت ده‌رباز ببیت.
