دایك و باب ب پله ئێك به‌رپرسیارن ژ كاركرنا زارۆیان
دهۆك، نه‌وزاد هلۆری:
پشكه‌ك ژ دام و ده‌زگه‌هێن په‌یوه‌ندیدار ل پارێزگه‌ها دهۆكێ پتری ساله‌كێ یه كار بۆ ڤه‌گه‌راندنا زارۆیێن كاركه‌ر بۆ باوه‌شا دایك و باب و خێزان و قوتابخانێ دكه‌ن، سه‌رۆكا رێكخراوه‌كێ ژی دا زانین كو پتری هزار و 200 زارۆیان ل دهۆك و زاخۆ و ئاكرێ كار دكه‌ن.
سارا موفتی، سه‌رۆكا رێكخراوا مندالپارێزی یا كوردستان/ تایێ دهۆكێ بۆ رۆژناما ئه‌ڤرۆ گۆت: (ل سالا 2021ێ ب هه‌ڤكاری ل گه‌ل هژماره‌كا سازیێن میری ل پارێزگه‌ها دهۆكێ و ئیدارا سه‌ربخوه یا زاخۆ كار بۆ ڤه‌گه‌راندنا زارۆیێن كاركه‌ر دكه‌ین و دده‌ما بوری دا شیاینه هزار و 200 زارۆیێن كاركه‌ر ل دهۆك و زاخۆ و ئاكرێ تومار بكه‌ین).
سارایێ زێده‌تر گۆت: (ئه‌گه‌رێ سه‌ره‌كی یێ كاركرنا زارۆیان ل عیراقێ كو كوردستان ژی پشكه‌كه ژ وی وه‌لاتی دزڤریت بۆ هه‌ژاری و قه‌یرانێن دارایی و شه‌ر و ئالوزیان، پشكه‌كا دی یا كاركرنا وان دزڤریت بۆ هندێ كو دایك و باب و كه‌سانێن دی كار ب وان دده‌نه كرن، هنده‌ك جاران ژی كاركرنا زاۆریان دزڤریت بۆ بكارئینانا حاله‌تێن توندوتیژی و فێلیازیێ و هه‌تا دووماهیێ، ل گوره‌ی پیڤه‌رێن نیڤده‌وله‌تی هه‌بوونا ئه‌ڤ هژمارا زۆر یا زارۆیێن كاركه‌ر ل ڤان ده‌ڤه‌رێن پارێزگه‌ها دهۆكێ زۆره، ئه‌ڤه ب تنێ ل سێ ده‌ڤه‌ران هاتینه توماركرن، دبیت پرانی نه هاتبنه توماركرن ژبلی ده‌ڤه‌رێن كو هه‌تا نوكه نه‌چوینه دناڤ پلانا مه‌یا كاری دا).
سه‌رۆكا رێكخراوا مندالپارێزی یا كوردستان و تایێ دهۆكێ دیار كر ژی كو پرۆژێ وان یێ به‌رده‌وامه و د پلاندایه كو ل ده‌ڤه‌رێن دی ژی كار بكه‌ن و گۆت: (پشكه‌كا هه‌ره زۆر یا وان زارۆیان هاتنه ڤه‌گه‌راندن بۆ قوتابخانێ، به‌لێ پشكه‌كا دی یا وان زارۆیان دووباره دزڤرنه كارێن خوه، داكو ئێدی زارۆ نه زڤرنه كاری ڤه هنده‌ك جارا هاریكاریێن دارایی بۆ وان زاۆریان دهێنه كرن ب تایبه‌تی ب دان و دروستكرنا ده‌لیڤێن كاری بۆ دایك و باب و خوشك و برایێن وان یێن مه‌زن، ئه‌و زارۆیێن كو كار دكه‌ن دكه‌ڤنه د ناڤبه‌را ژیێ شه‌ش بۆ 15 سالیێ و پرانیا وان ژی ژ ره‌گه‌زێ نێرن، به‌لێ ل گه‌ل هندێ ژی پتریا وان زارۆیێن كار دكه‌ن كچن).
ژلایه‌كێ دیڤه، سارا موفتی، سه‌رۆكا رێكخراوا مندالپارێزی یا كوردستانێ ل دهۆكێ، دیار كر ژی كو هژماره‌كا پێرابوونێن قانوونی ل هه‌مبه‌ر وان كه‌سان هاتینه كرن كو كار ب زارۆیان دكه‌ن و گۆت: (ل گوره‌ی قانوونێ نابیت زاۆر كار بكه‌ت خوه هه‌كه ره‌وشا وی یا چه‌وا بیت، ل سه‌ر دایك و بابا و ئالیێن شوله‌ژێ پێدڤیه ب هه‌ر رێیه‌كا هه‌بیت كار بۆ وێ یه‌كێ بكه‌ن زارۆ كار نه‌كه‌ن به‌لكو ئه‌رك و مافێن خوه یێن خواندنێ و خودانكرنێ وه‌ربگرن، كاركرنا زارۆیان كارتێكرن و مه‌ترسیێن خراپ ل سه‌ر وان دكه‌ن ب تایبه‌تی ژ روویێ جه‌سته‌ی و بێ به‌هربوونا وان ژ فێركرن و په‌روه‌رده‌كرنێ، ئه‌و زارۆیێن كو ژ كاری هاتینه دوور كرن د چه‌ند قوناغه‌كان دا دبوریت ژ وانان چاره‌سه‌ركرنا وان ژ روویێ جه‌سته‌یی و ده‌روونی و پاشان په‌روه‌رده‌كرنا وان و هه‌ولدان كو ڤه‌گه‌ریته دناڤ خێزان و قوتابخانێ و ژینگه‌ها خوه یا ئاسایی).
