دا فێرببین
سـەلام بـالایـی
لەزێ نەكە مالباتا تە ل بەندا تەیە.
ئەڤە هەمی رۆژانە رادیۆییا ترافیك بۆ مە دبێژیت دا گیانێن هەڤوەلاتیان ب سلامەت بن.
ژبلی هەكە فلاشێن كامیرەیان ل ناڤچاڤێن تە دان؛ بەریكێن تە ڤالابوون، ئەو ب خۆ چ تێدا نینە، لێ دێ هەر دەین ل سەر تە.
دا وژدانێ خۆ ژی تەنا بكەین؛ رۆژانە پۆلیسێن هاتنوچوونێ د كەلكەلا گەرمێ داو و سڕوسەقەما زڤستانێ د خزمەتێ دانە و ئەم هەمی ل گەل خێزان و كەسوكاران ل سەیرانانین، بلا ل سەر خاترا وان ئەم پێگیریێ ب ڕێنمایێن وان بكەین.
ئەم یێن دبینین د بیرەوەری و رۆژێن ئەینی دا چەندا خزمەتا مە دكەن، لێ مخابن هندەك شۆفێر دێ ترافیكێ تێكدەن و دەنە ئاخێ و تۆزێ ب سەر هەڤوەلاتیان دا ئینن، باشە ئەزیزێ من نێ تە سەیرانا خۆ كر بوو، خۆشی دێ ب ئارامی و بێی لەز بگەهە مال دا پتر یێ دلخۆش بی، ما هەكە تە ب وێ لەزاتی و نە پێگیریا رێنمایێن هاتنوچوونێ ڕوودانەكر، ما چ خۆشی تە د سەیرانێ هێلا هەر بۆ خێزانا خۆ هەر بۆ یێ بەرانبەر تە ڕوودان ل گەل كری.
رۆژان مە ئاگەهی ژێ هەیە كانێ چەند كەس دبنە قوربانی دڕوودانێن هاتنوچوونێ دا. هەمی ژ لەزاتیێ یە.
ئەزێ بۆ وە سەرهاتیەكێ بێژم ب سەرێ من ب خۆ هاتیە د ناڤا باژێرێ دهۆكێ دا، بەری ترافیكا زەری لاند ئەزێ هێدی دچم ب ترومبێلا خۆ سەیارەك یا ل پشت من هەرێ رەماشا لێددەت، ئەم نێزیكی ترافیكێنە و یا سۆرە، ب راستی من ژی مەجال نەدایێ، پاشی هۆڕێن لێدان، دیسا من مجال نەدایێ.
من هند دیت رێكەك دیت ژ رەخ منڤە هات ئەز و ئەو هەردو راوەستیایین ترافیكا سۆرە، جامێ ترومبێلێ ئینا خوارێ گۆتە من: تو بۆچی برێڤە ناچی؟! من ژی گۆتێ دێ كەرەمكە هەرە ما تە ترافیك نەددیت یا سۆرە؟ دێ بۆچی لەزێ كەی؟ ما ئەم ل جادا دەرڤەینە تو لەزاتیێ دكەی؟ یان تە ئاریشەكا ساخلەمی هەیە برا؟، ئینا گۆتە من: ئەز دبێژم شۆلاتە نەهاژۆتنا ترومبێلانە، سەیارا خۆ براوستینە و ب پییا هەرە.
من ژی گوتێ سوپاس بۆ ئامۆژگاریا تە.
