دبلۆماتکارەکێ ئیرانێ: ئیرانێ چەک و پارە بۆ داعشێ دابین کرینە
ئه‌ڤرۆ نيوز:
دبلۆماتکارەکێ ئیرانی کو بەرێ ل وەزارەتا دەرڤە یا ئیرانێ کار کریە دیار دکەت کو ل سالا ٢٠٠٥ ئیرانێ دەست ب بەرنامێ خوە یێ بۆ ھاریکاریا گرۆپێن ھشکباوەر ل رۆژھەلاتا ناڤین کریە و ئارمانجا سەرەکی یا ئیرانێ ئەو بوویە کو شەرێ ناڤخوەیی ل سووریێ و عیراقێ دروست ببیت دا ئەو بشێت پێگەھێ خوە ل وان ھەر دو وەلاتان ب ھێز بکەت و ئیرانێ مەزنترین مفا ژ داعشێ وەرگرتیە.
ئەبولفەزل ئیسلامی دبلۆماتکارێ بەرێ یێ ئیرانێ کو ل وەزارەتا دەرڤە یا وی وەلاتی ھەتا سالا ٢٠٠٥ پۆستێن گەلەک گرنگ وەرگرتینە و پاشی ژ بەر ناکۆکیێن ل گەل ئەحمەدی نەژاد سالا ٢٠٠٦ چوو یابانێ بۆ رۆژناما کەیھان یا لەندەن دیار دکەت کو دەمێ سالا ٢٠٠٥ ئەز ل وەزارەتا دەرڤە من ب خوە دیت کو ئیرانێ ب رەنگەکێ باش ھاریکاریا پارەی و چەکی بۆ رێکخراوێن ھشکباوەر یێن ل عیراقێ دابین دکر، ئارمانجا سەرەکی یا ئیرانێ ئەو بوو کو ب رێیا وان رێکخراوان ئالۆزی و شەرێ ناڤخوەیی ل عیراقێ دروست بکەت دا بۆ ھەموو خەلکێ خوە بێژیت کو ئەمریکا چ ب سەرێ عیراقێ ئینا دا خەلکێ وان ژی ھزرا ھندێ نەکەن ئەمریکا ھاتیە عیراقێ کەتە وەلاتەکێ ئازاد، چونکو وان ھەموو تشتەک دکرن رێ ل ھێرشێن ئەمریکا بۆ سەر ئیرانێ بگرن و گۆت: (پشتی شەرێ عیراقێ بەرپرسێن ئیرانێ بلەز ل سەر گەلەک خالان کار کرن و ئێک ژ خالێن گرنگ کو ئیرانێ ل سەر کار دکر ھاریکاریا پارەی و چەکی بۆ گرۆپێن ھشکباوەر ل عیراقێ بوو کو ئێک ژ وان گرۆپان کو ئیرانێ ب سالان ئەو پەروەردە کرن و چەک دا وان ژی داعش بوویە).
دبلۆماتکارێ ئیرانی ھەروەسا دیار دکەت کو ئیرانێ دڤیا عیراقێ ل ژێر دەستھەلاتا ئەمریکا دەرخینیت و ھەروەسا پێگەھێ خوە ژی ل سووریێ ب ھێزتر بکەت ژ بەر ھندێ ژی ھەبوونا داعشێ بۆ ئیرانێ کارتەکا گەلەکا مەزن بوو و ئەز دشێم ب ئاشکرا بێژم کو ئیران مفادارێ ئێکێ یێ شەرێ داعشێ بوویە، چونکو ھەتا نھا داعشێ نەشیایە چو چالاکیان د ناڤ ئاخا ئیرانێ دا ئەنجام بدەت و ئیرانێ ب بەھانا شەرێ ل دژی داعشێ شیا ل عیراقێ ب تەمامی دەستھەلاتا خوە دروست بکەت و ئەڤرۆکە ب ئاشکرایی دشێم بێژم عیراق کەفتیە دەستێ ئیرانێ و چارەنڤیسێ سووریێ ژ یێ عیراقێ ژی خرابتر بوویە و گۆت: (گەلەک جاران من ب خوە دیت کو بۆ بالیۆزێن ئیرانێ یێن ل وەلاتێن رۆژھەلاتا ناڤین دگۆتن کو دڤێت ئەم ھاریکاریا ھەر گرۆپەکێ بکەین کو ئەو ببنە ئەگەرێ ھندێ سیستەمێ ژناڤ ناچیت. دگۆتن بۆ مە گرنگ نینە کا ئەو گرۆپ شیعە بن، سوننە بن یان ژی کومونیست بن، یا گرنگ ئەوە کو ئەو ئالۆزیان چێ بکەن و ژ بەر وان ئالۆزیان ژی ئەم بشێین پێگەھێ خوە ل دەڤەرێ ب ھێز بکەین).
ئەبولفەزیل ئیسلامی د پشکەکا دی یا داخۆیانیا خوە دا دبێژیت کو وەلاتێن رۆژئاڤایی ژ پیلانێ ئیرانێ ئاگەھدار بوون، لێ ترسا وان ژ کریارێن تیرۆرستی یێن ئیرانێ ھەبوون. شەرێ ل غەزە، ئالۆزیێن کو ئیرانێ ل عیراقێ و لوبنانێ دروست کری وەسا کر کو گەلەک وەلاتێن ئورۆپا ژ بەر بەرژەوەندیێن خوە یێن ئابووری ل ھەمبەر پیلانێن ئیرانێ بێ ھەلویست بمینن و ژ بەر ھندێ ژی ئەڤرۆکە عیراق و سووریێ وێران بووینە و تنێ وەلاتێ مفا ژ وێران بوونا عیراقێ و سووریێ دیتی ئیرانە، چونکو ئیرانێ وەسا کر ب وێران بوونا وان ھەر دو وەلاتان و ئاریشێن کو بۆ ئەمریکا دروست بوویی ئەو ئێدی ھزرا ھندێ نەکەن دەستێوەردانا سەربازی ل ئیرانێ بکەن.
ناڤھاتی د دووماھیا ئاخڤتنا خوە دا ئاماژە ب رۆلێ روسیا دکەت و دبێژیت کو روسیا دڤێت پێگەھێ خوە ل رۆژھەلاتا ناڤین ب ھێز بکەت و بەرپرسێن روسیا باش دزانن ھەکە پەیوەندیێن خوە ل گەل ئیرانێ تێک بدەن دێ ئیران ئالۆزیێن مەزن بۆ وان دروست بکەت و ژ بەر ھندێ ژی روسیا نەڤێت پەیوەندیێن خوە و ئیرانێ تێک بدەت و ل سووریێ ژی ھەر دو وەلات پێکڤە شەرێ تیرۆرێ دکەن و ئارمانجا وان ھەر دویان ل سووریێ ئەوە بەرژەوەندیێن خوە ب پارێزن.