دبیت ل 2030 ئاڤ ل بن ئه‌ردی نه‌مینیت
هه‌ولێر، قائید میرۆ
هشكه‌سالیێ كاریگه‌ری لسه‌ر چه‌ندین كه‌رتێن جودا په‌یداكریه و ل گۆره‌ی ڤه‌كۆلینه‌كا وه‌زاره‌تا چاندنێ و ژێده‌رێن ئاڤێ ژی چه‌ندین گوند و قه‌زا و ناحیێن هه‌رێما كوردستانێ مه‌ترسیا هشكبوونێ ل سه‌ر هه‌یه. رێڤه‌به‌رێ ئاڤا ژێر ئه‌ردی ژی ل دهۆكێ ئاشكرا كر، مه‌ترسی هه‌یه هاڤینا ئه‌ڤساله هژماره‌ك بیرێن ئاڤێ ل دهۆكێ هشك ببن و دبێژیت: مه داخوازكریه ل جهێ لێدانا بیرا، پڕۆژێن ئاڤێ بۆ دهۆكێ بهێنه راكێشان.
عه‌بدولمه‌جید عه‌بدولا، رێڤه‌به‌رێ ئاڤا ژێر ئه‌رد ل پارێزگه‌ها دهۆكێ بۆ رۆژناما ئه‌ڤرۆ دیار كر “كێمیا بارانا ئه‌ڤساله كاریگه‌ریێن زۆر ل سه‌ر كه‌رتێ چاندنێ و كێمبوونا ئاڤێ ل هه‌رێما كوردستانێ هه‌بووینه، ژ به‌ر كو ئاڤا سه‌ر ئه‌رد و بن ئه‌رد كێمبوویه و پێشبینی دهێته‌كرن زیانێن هشكه‌سالیێ هێشتا به‌ره‌ف زێده‌بوونێ بچن، ب تایبه‌تی ئه‌م یێ به‌ره‌ف وه‌رزێ هاڤینێ دچین، ب ئه‌گه‌رێ هشكه‌سالیێ به‌رهه‌مێ جووتیارێن ده‌شتا سلێڤانه‌یا هه‌تا نێزیكی مووسل تووشی زیانێن مه‌زن بوویه و نێزیكی 95%ێ به‌رهه‌مێ وان ده‌ڤه‌ران نه‌مایه.
زێده‌تر گۆت: ژبه‌ر لێدانا بیران زیانێن مه‌زن گه‌هشتینه ئاڤا بن ئه‌ردی ژی، ڤه‌كۆلینه‌ك هاتیه‌كرن ژلایێ رێكخراوا ئاسایشا ئاڤێ و تێدا دیاربوویه ل رۆژهه‌لاتا ناڤین پشتی سالا 2030یێ دبیت بیر بهێنه لێدان و ئاڤ هه‌ر ده‌رنه‌كه‌ڤیت.
رێڤه‌به‌رێ ئاڤا بن ئه‌رد ل دهۆكێ دبێژیت “مه نڤیساره‌ك دایه پارێزگه‌ها دهۆكێ و داخوازا مه‌زاختنا پاره‌ی كریه بۆ به‌رهنگاربوونا هشكه‌سالیێ، ب تایبه‌تی سكرێن ئاڤێ بهێنه چێكرن، هه‌تا مفا ژ ئاڤا بارانێ بهێته وه‌رگرتن، هه‌روه‌سا پڕۆژه‌یێن ئاڤێ بهێنه چێكرن مینا پڕۆژێ ئاڤا خراپ دێمی چه‌ندین پڕۆژێن دیژی هه‌بن، ئه‌گه‌ر پڕۆژه نه‌هێنه چێكرن هیڤیا لێدانا بیران مه‌ترسی دێ هه‌بیت لسه‌ر دابه‌زینا ئاستێ ئاڤێ و په‌یدابوونا ئاریشه‌یێن ئاڤێ.
عه‌بدولمه‌جید عه‌بدولا ئاماژه كر” مه داخوازكریه ل خراپ دێمی پڕۆژه‌یه‌كێ دی یێ ئاڤێ بهێته بجهئینان، چونكو هژمارا ئاكنجیان هه‌ر د زێده‌بوونێ دایه و ئاڤ ژی یا به‌ره‌ف كێمبوونێ دچیت، ئه‌ز پێشبینی دكه‌م هژماره‌كا بیرێن ئاڤا ل وه‌رزێ هاڤینێ هشك ببن، مه ل دهۆكێ نێزیكی 400 بیرێن ئاڤێ هه‌نه ل سالێن هه‌شتیان هاتینه لێدان و 80 هه‌تا 100 مه‌تران هاتینه كۆلان، ئه‌ڤان مه‌ترسی ل سه‌ر هه‌یه ڤێ هاڤینێ هشك ببن، چونكو ئاستێ ئاڤێ سال بۆ سالێ یێ به‌ره‌ف دابه‌زینێ دچیت و چه‌ندی بیرا ب كۆلی ناگه‌هیه ئاڤێ.
