دبێژنە وان كەسان هونەرمەند یێن كو داهێنانێ د كارێن خوە دا دكەن
، زنار تۆڤی:
دەرهێنەر و سیناریست تەنیا كەریم، ل سالێن هەشتێیان ل سەدێ بوری، وەكو دەرهێنەر و سیناریست و ئەكتەر كار كریە، هەتا نوكە چەندین كارێن هونەری د بیاڤێن شانۆیێ و سینەمایێ دا ئەنجامداینە، نوكە ژی مژوولی چەندین كارێن هونەرییە، د دیدارەكێ دا بۆ رۆژناما ئەڤرۆ دبێژیت: ل سالێن هەشتێیان ل سەدێ بوری من دەست ب كارێن هونەری كریە، بۆ جارا ئێكێ من ژ شانۆیێ دەست پێكر، كارێ من یێ ئێكێ یێ شانۆیێ «مەسەلەی ویژدان» بوو، یێ ئەحمەد موختار جافی، ل سالا 1983 ێ، كو ژ ئامادەكرن و دەرهێنانا من بوو، هەتا سالا 1991 ێ، ئەز یێ بەردەوام بووم ل سەر كارێن شانۆیێ، پتری 28 كارێن شانۆیێ من ئەنجامداینە د بیاڤێن ئەكتەریێ و نڤێسینێ و دەرهێنانێ د وی دەمی دا، پشتی سەرهەلدانێ من د بیاڤێ تەلەڤزیۆنێ دا كار كر و من كارێن سینەمایی و دراما و دكیۆمێنتاری و كورتە فلم و فلمێن درێژ چێكرن، وەكو فلمێن ( كارەسات و دابران و قەدەر و لالش و حەسرەت و شوقەی حاجی سەعدی و درامایا پرس و بۆنی ئاگر و راپەرین و یاری ئەندێشە و چەندین كارێن دیتر، دووماهی كارێ من ژی فلمێ داستانی یێ كچا كافرۆشی بوو، كو ڤی فلمی چەندین خەلاتێن جیهانی و ناڤخۆیی وەرگرتینە، هەورەسا دەربارەیی كارێ سیناریۆیێ، من پتر ژ 14 بەرهەمان هەنە، وەكو بەرەف ئۆرشەلیم، گرەو و دوایین ئاهەنگ و شەنگە لە بەرزی چیا و دراما نەخشین و زەمبیل فرۆش و مێخەكبەند و باول و مندال زیزەكان و مژدە و كورتەباس و نمەی غوربەت و چەندین بەرهەمێن دیتر.
ناڤهاتی ئەو ژی گۆت: دبێژنە وان كەسان هونەرمەند یێن كو داهێنانێ د كارێن خوە دا دكەن و كارێن ب مفا و ب تام بەرهەم دئینن، دیسان دبێژنە وان كەسان ئەكتەر و دەرهێنەر یێن كو ئاشقێن كارێ خوە یێ هونەری بن، هەروەسا ئاستێ هونەرێ كوردی ناهێتە پیڤەركرن، كو ئەم بێژین ئەڤ كارە یێ باشە و ئەڤ كارە یێ خرابە، چونكی د هونەری دا چ زاراف نینن ب ناڤێ باش و خراب، بەلێ ئەم دشێین بێژی ڤی كاری تامەكا تایبەت هەیە و یا ڤی ژی یا كێمە، ئەوێن تاما وان كێمتر، كێماسی د كارێ وان دا هەیە، وەكو سیناریۆ و ئەكتەری و دەرهێنان و وێنە كرن، ب رەنگەكێ گشتی د نوكە دا دراما كوردی یا كامل نینە، د دەستپێكەكا باش دایە، دبیت د دەمێن بهێت دا فۆرمەكێ تایبەت ب خوەڤە وەرگریت.
تەنیا هێشتا دبێژیت: گەلەك گرنگە دراما كوردی بهێتە چێكرن، ب مەرەما ناساندن و پێناسەكرنا كەلتۆر و نەریتێن جڤاكێ كوردی بۆ خەلكێ بیانی، هەكە هات و دراما كوردی فۆرم و موركا كوردی پێڤەبوو، ل وی دەمی دێ دراما كوردی جهێ دراما بیانی گریت و دێ خزمەتا جڤاكێ كوردی كەت، لەوما دڤێت ئێدی گرنگی ب دراما كوردی بهێتە دان و سپۆنسەر بۆ بهێنە دروست كرن و كەرتێ تایبەت ژی پشتەڤانیێ لێ بكەت، هەروەسا ئەم نەشێین بێژین مە سینەما هەیە، چونكی مە وەكو فلمسازێن كورد فۆرمەكێ تایبەت نینە، كو سینەما كوردی پێ بهێتە نیاسین، لەوما هەكە مە بڤێت ببینە خۆدان سینەما، دڤێت مە فۆرمەكێ تایبەت هەبیت و مە زمانەكێ ستاندارد ژی هەبیت، دڤێت ئەم دەولەت بین و فلمێن مە ب ناڤێ كوردستانێ بهێنە ناساندن و دڤێت مە داستانێن خۆمالی هەبن و ب ڤی رەنگی دێ سینەما كوردی ژ دایك بیت، دیسان خۆزی دەرهێنەرێن كورد رێباز و شێوازێ دەرهێنەرێ كورد یلماز گۆنەی هەلبژارتبا، نەكو لاساییكرنا سینەما ئیرانی.
هێشتا دبێژیت: نوكە ئەز بەرهەڤییان دكەم، كو كار ل سەر كورتە فلمێ مژدە و فلمێ درێژ یێ مندالە زیزەكان، كو ژ نڤێسین و هزرا د. فەرهاد پیربالییە، كو ژ سیناریۆ و دەرهێنانا من ب خۆیە دكەم، من هەردەم حەز كرییە، كو من فۆرمەكێ تایبەت ب خۆڤە هەبیت، دیسان ئەز حەز دكەم كار ل سەر بابەتێن دیرۆكی و داستانان دا بكەم و ئێش و ئازارێن گەلێ خۆ نیشان بدەم، پرانییا جاران د فلمێن من دا ژن بووینە چەڤەنگێ جوانی و وێرەكی و ئازایەتیێ.
