دخوازم چاڤ خشاندنەك ل ژیانا پێشمەرگێ زەحمەت دیتی بهێتەكرن
دیدار، سالار محەمەد دۆسكی:
پێشمەرگێ شۆڕەشا 26ی گولانێ عسمت رەجب محمود خالد خەلكێ گوندێ ئەرەدنا ل باژێرێ مویسل ژ دایك بوویە، خواندنا سەرەتایی و ناڤنجی و ئامادەیا بازرگانی ل مویسل ل سالا 1981ێ ب دووماهی ئینایە، ل سالا 1982ێ قەستا ناڤ رێزێن شۆڕەشێ كریە، چەندین سالان ل ئێزگێ دەنگێ كوردستانێ كاركریە و هەمان دەم كارێ پارتایەتی كریە هەر ژ پلا ئەندامەتیێ بۆ ئەندامێ رێكخراوێ و ئەندامێ لژنە و كارگێرێ لژنە و كارگێر لقێ و ماوێ هەشت سالان ژی بەرپرسێ لقێ 14 یا پارتی دیموكراتی كوردستان ل مویسل بوویە.
كادرێ پێشكەفتیێ پارتی دیموكراتی كوردستان عسمەت رەجب، د دیدارەكێ دا ل گەل رۆژناما ئەڤرۆ گۆت: ل دەسپێكا سالا 1982ێ وەك هەر گەنجەكێ كوردستانێ من حەز ل سەر كوردینی و رێكخستنێن پارتی دیموكراتی كوردستان هەبوو، ل رێككەفتی 6/4/1982ێ من پەیوەندی ب رێزێن پێشمەرگێ كوردستانێ كر، ب رێكا خالێ خوە (مەجید) خودێ ژێ رازیبت و گەهشتمە دێرەلوكێ دەڤ (مەلا رەسول) و ب رێكا وی گەهشتمە ناڤ پێشمەرگەی ل گوندێ (كاروك) ل دەڤەرا نێروە دووڤدا هاتمە رەوانەكرن بۆ بارەگایێ لقێ ئێك یا پارتی دیموكراتی كوردستان، و دووڤدا چوومە مەكتەبا سیاسی یا پارتی دیموكراتی كوردستان و بریار دەرچوو ل راگەهاندنا مەكتەبا سیاسی بۆ دەمێ هەیڤەكێ كار بكەم، و دووڤ دا هاتمە ڤەگوهاستن بۆ ئێزگێ دەنگێ كوردستان و بكارێ تەكنیكی رابووم، هەتا سالا 1988 و دووڤ دا پرۆگرامەكێ تایبەت هەبوو شب ئەنفالان ڤە ب هەڤكاری ل گەل جەنابێ سەرۆك (مەسعود بارزانی) و مەكتەبا سیاسی ل گەل ئەوان هەڤالێت دەربەدەربووین ل كەمپێن (مێردین، دیاربكەر) پرۆگرام سەرپەرشتیا جەنابێ سەرۆكی بوویە و ب هەڤكاری ل گەل هەڤالێت مە ل ئەڤان كەمپان گوهداری دكرن، و زێدەتر پەیاما مە دڤیا مە راستەوخوە نە دگەهاند بەلكو زێدەتر ب ئارامز دهاتە گەهاندن و زێدەتر سالەكێ ڤەكێشا و حەفتیانە دو رۆژ پرۆگرۆام دهاتە پێشكێشكرن و ئەڤە پشتی ئەنفالان بوو.
عسمەت رەجب هەروەسا دیاكر، ژ بەر كاودانێن ئەمنی گەلەك جاران بارەگایێ ئێزگەی دهاتە توبارانكرن و تایبەت ئەو توپێن دویر هاڤێژ ل سنورێ نێزیكی ئیرانێ و گەلەك جاران ئێزگە ب فرۆكان دهاتە توبارانكرن و گەلەك هەڤالێن مە وەك كارمەندێن ئێزگەی و گەلەك جاران پێشمەرگەی ژی شەهید بووینە.
پێشمەرگێ دێرین عسمەت رەجب هەروەسا گۆت: ئێزگێ دەنگێ كوردستانێ گەلەك كارتێكرن ل سەر خەلكێ كوردستانێ هەبوو ل دەڤەرێن نەرزگار كری، و نە لبن كونترولا شۆڕەشێ و دیسا ل هەر چارپارچێن كوردستانێ رۆژئاڤا و باكور و رۆژهەلات ژی و پەخشێ ئێزگەی هەتا باشورێ عیراقێ دگەهشت، و ماوێ زمانێ عەرەبی هەردەم پەیاما مە دگەهشتە دەرڤە و ب رێكا ئێزگەی خەلكێ مە ئاگەهد ژ كارو و بزاڤێن پێشمەرگەی دناڤا شۆڕەشێ بوو، و دیسا ئێزگە ئامرازەك بوو گەلەك گەنج بگەهنە ناڤ رێزێن شۆڕەشا 26ی گولانێ، حوكمەتا عیراقێ دزانی ئێزگەی چەند كاریگەری هەیە چونكە بەردەوام چالاكیێن پێشمەرگەی دهاتنە بەلاڤەكرن و تایبەت چالاكیێن دژی حوكمەتا بەغدا و حوكمەتا ئیراقێ بلاوازی دهاتە نیشادان، و دیسا سیایەتا حزبێ و زولما حوكمەتا بەغدا ل سەر خەلكێ مە و تایبەت گەنج و لاوان گەلەك دهاتنە دەستەسەركرن، لەوما ژی حوكمەتا ئیراقێ هەمی بزاڤكرن ئەڤ دەنگە بهێتە بێ دەنگكرن و تەشویش دانا و دیسا بەردەوام ژی ئێزگە دهاتە توبارانكرن و تەشویش دەمێ دانا مە خەلكێ خوە ئاگەهداركربوو، كو مە ئێزگە ڤەدگوهاستە شوپولەكا دی و هەمان دەم حوكمەتا ئیراقێ ژی ئەڤ چەندە دزانی و ئەو ژی بەردەوام چاڤدێری یا ئێزگەی دكر و تشویش ڤە دگوهاستە شەپولێن مە ڤەدگوهاست و خەلكی هەر گوهداری ل سەر ئێزگەی هەبوو.
عسمەت رەجب ئەرەدنی دبێژیت: ئێزگێ دەنگێ كوردستانا ئیراقێ گوهدارەكێ باش هەبوو ل هەمی دەڤەرا چونكە زمان حالێ حزبێ بوویە، و خەلكی دڤیا بزانن كا رەوشا دەڤەرێ یا چەوایە و بزاڤ و چالاكیێن پێشمەرگەی و رێكخستنێن نهێنی و هەر تشتەكێ گرێدایی كاودانان تێدا ب هەر دو زمانێن كوردی و عەرەبی دهاتە بەلاڤەكرن.
كادرێ پێشكەفتیێ پارتی دیموكراتی كوردستان گۆت: شیانێن وی سەردەمی بۆ برێڤەبرنا ئێزگەی گەلەك دسنوردار كری بوون لێ هەمان دەم كاریگەریەكا مەزن ل دەڤەرێ هەبوو و شیانێن وی سەردەمی ئێزگە و گوڤارا خەبات هەبووینە و دیسا گوڤالا قوتابیان و لاوان هەبوو و دیسا هندەك لقێن پارتی بەلاڤووكێن هەبووینە و لاپەر كێم بووینە و ئەو بەلاڤووك دهاتنە هنارتن بۆ رێكخستنێن پارتی دناڤا باژێران دا.
عسمەت رەجب زێدەتر گۆت: هەمی رۆژێن من ل ئێزگەی دخوش بوون چونكە كومەكا هەڤالان هەر ئێكێ دەڤەرەكێ و باژێرەكی بووینە خوشی ئەو بوو ئیرادامە هەمیان ئێك بوو وەك برا مە پێكڤە كار دكر، و ئەم هەمی نێزیكی ئێك بووینە و مە هەمیا خزمەتا ئێك و دو دكر و مە گەلەك جاران جلكێن ئێكودو دشیشتن، نەخوشی ئەو بوویە ئەگەر چەند سالان دایك و باب و كەس و كارێن خوە نەبینی گومان نینە دێ یا نەخوش بیت، لێ گیانێ برایەتیێ د ناڤبەرا مە هەمی هەڤالان دا قەرەبوویا دویركەتنا خویشك و برا و دایك و بابا دكر.
عسمەت رەجب گۆتژی: ل سالا 1984ێ ل دەڤەرەكێ بووین دگۆتنێ (خرێنە) وێ سالێ گەلەك بەفر ل هەمی كوردستانێ باری ، سپێدەكێ هەڤالەكێ مە بناڤێ(پێشرەو شالی) كو خەلكێ سلێمانیێ بوو وەك تەكنیكار ل گەل مەبوو هشیاركرم و گوت وەرە پێش چیایێ بەرامبەر مە و هەمی هاتیە بەر دەرگەهێ بارەگای و من گۆتێ تو خەونا دبینی گۆت وەرە پێش هاتمە دەرڤە و من دیت رەنیەكا بەفرێ هاتیە و خودێ قورتال كربووین و بەر دەرگەهێ بارەگایی چیایەكێ مەزن دروست بوویە، ل ئادارا هەمان سال ئەم بێ ئەرزاق مابووین و بتنێ نیڤ فەردێ ئاری مە مابوو و مە هندەك هەڤال راسپاردن كو بچنە دەڤەرا (دەشتا هێركێ) سەر ب (سیدەكان) ڤە و هندەك ئەرزاقی بوومە بینن، ئەو هەر سێ هەڤال( مەسعود سالەی، قادر حەسەن، حسێن هەركی) قوناغەكا دویر بوو و گەلەك سارمابوو و نیڤ فەردێ ئاری مە مابوو و بن چادرێ بوو ل نێزیك مەقری و ژ بەر سارمایێ مە (كەرێ) خوە دانابوو بن چادرێ رۆژەكێ ژ خەو رابووین ئەو ئارێ مایی ژی (كەرێ) مە هەمی خواری یە.
عسمەت رەجب زێدەتر گۆت: قاهەرەمانی یا پێشمەرگەی ل چالاكیان ل ئێزگەی دهاتە دیاركرن، و ل كانی ماسێ و دێرەلوكێ و بامەرنێ و ل دانێ ئێڤاری دهاتنە خواندن و ئەگەر ئێكی ژێ چووبا دا ل رۆژا دووڤ دا سپێدێ دووبارە گوهداریێ كەت.
ل دووماهیێ عسمەت رەجب گۆت: داخازێ ژ حوكمەتا هەرێما كوردستانێ دكەم، چاڤ خشاندنەكێ ل ژیانا پێشمەرگەی زەحمەت و ماندیبوون دیتی بهێتەكرن، چونكە ژیان ئەڤرۆ گەلەك یا بزحمەت كەفتی و پێشمەرگێ ژیانا خوە هەمیێ ماندیبوون دیتی گرنگە ئەڤرۆ گرنگی پێ بهێتەكرن.
