دخوازیت دیمه‌نێن باژێرێ خوه بگه‌هینیت
زاخۆ، عه‌لی حاجی:
سرا لوقمان، كچه‌كا نوو پێگه‌هشتی یه د وارێ وێنه‌گرتنێ دا، د دیداره‌كێ دا بۆ رۆژناما ئه‌ڤرۆ دیاركر كو ئه‌و ب گرنگ دبینیت دیمه‌نێن جوانێن زاخۆ ب رێیا زۆمێ كامیرا خوه بگه‌هینته هه‌موو وه‌لاتێن جیهانێ، ژبه‌ر وێ چه‌ندێ دیمه‌نێن سروشتی هه‌لبژارتینه.
زێده‌تر گۆت: ده‌ستپێكا من ڤه‌دگه‌ریت بۆ به‌ری چه‌ند سالان كو ب رێیا كامیرێن نۆرمال من ده‌ست ب گرتنا وێنه‌یان كر هه‌تا كو ئه‌و حه‌زا ل گه‌ل من مه‌زن بووی و پشتی هاتنا مۆبایلێن نوو هه‌ر زوو من ده‌ست ب گرتنا وێنه‌یان كر و د سۆشیال میدیایی دا به‌ڤكرن به‌لێ پشتی من شیایی شیانێن خوه د وێنه‌گرتنێ دا باشتر لێ بكه‌م من كامیره‌كا تایبه‌ت كری ژبه‌ركو دخوازم ئێدی هه‌موو كاره‌كێ ب كوالێتی ئه‌نجام بده‌م، من حه‌ز ل سه‌ر گرتنا وێنه‌یێن سروشتی هه‌یه ژبه‌ركو دبینم ڤالاهیه‌ك هه‌یه د گه‌هاندنا دیمه‌نێن جوانێن زاخۆ بۆ خه‌لكێ جیهانێ و ئه‌ز دبینم دێ شێم هه‌تا راده‌كی وان دیمه‌نان بگه‌هینمه جیهانا عه‌ره‌بی، به‌لێ ب مخابنی ڤه جڤاكێ مه ب چاڤه‌كێ كێم به‌رێ خوه دده‌نه كچێن وێنه‌گر، ژبه‌ر كو كاره‌كه گرنكیا خوه هه‌یه و كێمیا كچێن وێنه‌گر دێ بیته ده‌لیڤه‌كا باشتر بهێمه پێش.
