دخوازیت نوویاتی و داهێنانێ د هونه‌ری دا بكه‌ت
دهۆك، زنار تۆڤی:
سترانبێژا گه‌نج (سۆزدا عه‌مۆ) كو خه‌لكا باژێرێ عه‌فرینێ یه ل رۆژئاڤایێ كوردستانێ، نوكه ل باژێرێ هه‌ولێرێ دژیت، د دیداره‌كێ دا بۆ رۆژناما ئه‌ڤرۆ دیاركر كو به‌ری پێنج سالان وێ ده‌ست ب گۆتنا سترانان كریه، بۆ ده‌مێ چه‌ندین هه‌یڤان ل په‌یمانگه‌ها سه‌باح فه‌خری ل حه‌له‌بێ خواندیه، پشتی ره‌وشا عه‌فرینێ تێكچوویی و ژ ئالایێ توركیا ڤه هاتییه داگیر كرن، مالباتا وێ قه‌ستا هه‌رێما كوردستانێ كریه و نوكه ل هه‌ولێرێ ل گه‌ل خێزانا خوه دژیت ناڤهاتییێ گۆت: به‌ری چه‌ند رۆژان من سترانه‌كا فولكلۆری ب ناڤێ( شۆكرایێ ) كلیپ كریه، ئه‌ڤ سترانه من ژ هونه‌رمه‌ندێ نه‌مر محه‌مه‌د شێخۆی گوهلێبوویه، هه‌تا نوكه من سێ كلیپ و چه‌ندین سترانێن سینگل گۆتینه، هه‌روه‌سا من ل به‌ره سترانه‌كێ ب زارێ كرمانجیا خوارێ بێژم.
ناڤهاتیێ گۆت: من ستایله‌كێ تایبه‌ت د گۆتنا سترانان دا هه‌یه و مالباتا من گه‌له‌ك پشته‌ڤانیێ ل كارێ من دكه‌ن و ئه‌و حه‌ز دكه‌ن، هه‌رده‌م ئه‌ز كار و به‌رهه‌مێن نوو پێشكێشی حه‌ز ژێكه‌رێن ده‌نگێ خوه و خه‌لكێ كوردستانێ بكه‌م، هه‌روه‌سا من سترانه‌ك ب زمانێ عه‌ره‌بی و ئینگلیزی ژی گۆتیه و هه‌تا نوكه پشكداری د چه‌ندین به‌رنامێن هونه‌ری دا كریه و هه‌رده‌م من ڤیایه نوویاتی و داهێنانێ د هونه‌رێ كوردی دا بكه‌م.
