دخوازیت هێزا ژنان د راگەهاندنێ دا بدەتە دیاركرن
دلڤین رەشید:
رۆژنامەڤان و ڤەكۆلەر (زینە شەهلا) د دیدارەكێ دا بۆ رۆژناما ئەڤرۆ دیاركر كو ئەو خەلكا رۆژئاڤایێ كوردستانێ یە و ئەڤە نێزیكی (15) سالانە دبۆارێ رۆژنامەڤانیێ دا كار دكەت، وەكو ژنەكا رۆژنامەڤان و چالاكڤان تووشی گەلەك ئاستەنگان بوویە، لێ هەتا نوكە یا بەردەوامە و دخوازیت هێزا ژنان د راگەهاندنێ دا بدەتە دیاركرن.
ناڤهاتیێ گۆت: ل دەستپێكا كارێ من یێ راگەهاندنێ من نە دشیا ناڤێ خوە بدەمە دیاركرن، لەورا نەچار بووم ناڤەكێ ئاشۆپی بكاربینم، چونكو هێشتا ددیتنا جڤاكێ مە دا كارێ راگەهاندنێ بۆ ژنان ب شەرم دهێتە دیاركرن، لێ ل ڤێ دووماهیێ من خواست ئەڤان بەربەستان بشكێنم و گەلەك ب وێرەكی من ناڤێ خوە یێ دورست بكارئینا وەكو چالاكڤانەك ژی چۆمە دناڤ جڤاكی دا و من شیا ب ڤان هەردو رێكان بەرەڤانیێ ژ مافێ مللەتێ خوە بكەم، راستە بارێ ژنان گرانتر دبیت ب تایبەت ژی ئەو ژنێن ل دەڤەرێن شەر و ناكۆكیان دا دژین، ژ هەموو لایەكێ ڤە بەرپرسیارەتی دكەڤیتە سەر ملێن وێ، بەلێ ژن ب گشتی و یێن كورد ب تایبەتی رۆلەكێ بەرچاڤ و خۆراگرانە هەبوویە هەمبەری وان نەخۆشیان راوەستیاینە و ب سەركەفتیانە ژیانا خوە بەردەوام كرینە.
