دخولا ستێرێن ئیراقێ دا یانەیێن كوردستانی دو سەركەفتن، خوسارەتیەك و وەكهەڤییەك ئینا
قەیس وەیس:
دوهی یاریێن گەڕا چارێ ژ چارچووڤەیێ قۆناغا ئێكێ یا خولا ستێرێن ئیراقێ یا فوتبۆلێ ب دووماهی هاتن ئەوا بۆ یانەیێن كوردستان د خولێ دا دناڤبەرا ئەنجامێن دلخوەشكەر و سۆپرایزێن نە چاڤەڕێ كری دا بوون و قارەمانا وەرزێ بۆری ژی بەردەوامە ل سەر پاراستنا سەرێ لیستێ.
دهۆك بەردەوامە ل سەر
دەستدانا خالان
تیما یانەیا دهۆك بەردەوامی دا ئەنجامێن نە باش د خولێ دا پشتی دگەل مێڤانا خوە یانەیا كارەبا یا بەغدایی بێ گۆل وەكهەڤبووی، د یارییا واندا ئەوا دوهی ل یاریگەها یانەیا دهۆكێ هاتیەكرن، هەر ژ دەستپێكا نیڤا ئێكێ ئەو ئاستێ چاڤەڕێ كری ژلایێ یاریزانێن دهۆكێ نە هاتە نیشان نەدا، دڤێ نیڤێ دا دادڤانێ یاریێ گۆلا كارەبا نە هژمارت پشتی ڤەگەڕیایە سیستەمێ ڤارێ، ئەوا ئەڤ نیڤە بێ گۆل وەكهەڤی ب دووماهی هاتی، د نیڤا دویێ دا تیما دهۆكێ گەلەك بزاڤ كرن ژبۆ گۆلا پێشكەفتنێ لێ لەز دشۆتكرنێ دا و نە مفا وەرگرتن ژ چەند هێرشان بوو ئەگەر چ گۆل نەهێنە تۆماركرن، ژلایێ خوە تیما مێڤان چەند بزاڤەكێن كێم هەبوون لێ بێ ئەنجام بوو ئەوا یاری بێ گۆل ب دووماهی هاتی.
هارون ئەحمەد: ژ ئاستێ تیمێ و ئەنجامی د ڕازی نینن
ل دۆر ڤێ یاریێ هارۆن ئەحمەد كاپتنێ تیما دهۆكێ گۆت: هەرچەندە ئاستێ تیما مە یێ ناڤنچی بوو و ئەم چاڤەڕێ بووین ئاستەكێ باشتر پێشكێش بكەت، لێ ژ ئاستێ تیمێ و ئەنجامی د ڕازی نەبووین، سەرباری یاریزانان كۆمەكا دەلیڤەیێن گۆلكرنێ ژ دەستدان، د بەرانبەر دا تیما كارەبا شێوازێ یارییا بەرەڤانیێ دكر و شیان ڕێكێ ل تۆماركرنا گۆلان بكەن، ئەنجامدانا یارییا دناڤبەرا چار رۆژان جارەكێ كارتیكرن و گڤاشتن ل سەر ئاستێ یاریزانان دكەت، هیڤی و ئارمانجێن مە سەركەفتن بوو لێ ئەڤە تەپا پێی یە، بۆ یارییا بهێت دێ بزاڤێن ڤەگەڕیانێ بۆ ئاست و ئەنجامێن باش كەین.
زاخۆ پاشكەفتنا خوە ڤەگەڕاندە سەركەفتنێ
ژلایێ خوەڤە تیما یانەیا زاخۆ بەردەوامە ل سەر ئاست و ئەنجامێن خوە یێن باش و شیا ژ دەرڤەیی یاریگەها خوە سەركەفتنەكا گرنگ د یارییەكا دراماتیكی دا ل سەر یانەیا زەورا یا بەغدایی بینت ب سێ گۆلان بەرانبەر دو گۆلان، هەرچەندە تیما زاخۆ ب دو گۆلان بەرانبەر گۆلەكێ یا پاشكەفتی بوو لێ شیا سەركەفتنێ بینت، هەرسێ گۆلێن كوڕێن خابووری ژلایێ كاپتنێ تیمێ ئەمجەد عتۆان و مەحمود ئەسوەد و گۆستاڤۆ تۆماركرن، د یارییا واندا ئەوا ل ئەینییا بۆری یاریگەها زەورا هاتییە كرن.
تەلال ئەلبلۆشی: سەركەفتنا مە بەردەوامی دانە ل سەر پلانا مە یا دارێشتی
راهێنەرێ تیما یانەیا زاخۆ یێ قەتەری تەلال ئەلبلۆشی كەیفخوەشیا خوە دیار كر ب سەركەفتنەكا گرنگ بەرانبەر ئێك ژ یانەیێن جەماوەری و گۆت: بۆ مە یا گرنگ سێ خال بوون، سۆپاسییا هەموو یاریزانێن تیمێ دكە مكو ب ئێك گیان و مۆرالەكا بلند یاری دكرن و شیان پاشكەفتنا مە ب كەنە سەركەفتن، رۆلێ جەماوەرێ یانەیا زاخۆ هیچ ڕەنگەمی نا هێتە ژبیركر ئەوێن ڕێیەكا درێژ ژ زاخۆ هەتا بەغدا هاتین ژبۆ پشتەڤانییا تیما خوە، هەرچەندە دو باشترین یاریزانێن مە تووشی هنگاڤتنێ بوون و نە دشیان پشكداربن لێ مە یاریزانێنن خودان شیان هەبوون و جهێ وان گرتبوو، پێنەڤێت ئارمانجا مە د كاروانێ درێژ دایە، مە دەستپێكەكا ب هێز دەستپێكرییە ئارمانج مە هەیە كو هەر ژ وەرزێ بۆری مە دەستپێكرییە و بەردەوامین هەتا ب گەهینێ.
هەولێر تووشی مەزنترین خوسارەتی بوو
ژلایەكێ دووڤە تیما یانەیا هەولێرێ خوسارەتیەكا نە چاڤەڕێ كری ل سەر دەستێ خودانێن ئەردی یانەیا ئەلقاسم دا پشتی ب چار گۆلێن پاقژ تووشی خوسارەتیێ بووی، راهێنەرێ هەولێرێ حسێن مورشد دوورئێخستنا یاریزانەكێ مە ب كارتا سۆر و هنگاڤتنا ستێرێن مە شێركۆ كەریم و ئوسامە رەشید ئەگەرێن ئەنجامێ خراب بوو، سۆزێ ددەینە جەماوەرێ یانەیێ دێ ئەنجامێن باش ڤەگەڕین د بەرانبەر دا یانەیا نەورۆز شیا سەركەفتنەكا باش ل سەر مێڤانا خوە یانەیا نەجەف ب دۆ گۆلان بەرانبەر گۆلەكێ بینت.
ژ یاریێن دی حدود چنە- 1 شورتە، جەوییە 3-چنە دیالا، نەفت 2-چنە نەفت ئەلبەسرا، تەلەبە 2-چنە ئەلكەرمە، كەرخ چنە-2 نەفت میسان، كەربەلا 1-چنە مینا.
ب ڤان ئەنجامان یانەیا شورتە ب 10 خالان سەرێ لیستێ دهێت، هەر ئێك ژ جەوییە و نەفت میسان ب هەمان خالان رێزێن دویێ و سێیێ دهێن، زاخۆ ب هەشت خالان رێزا چارێ، ب هەمان خال نەفت رێزا پێنجێ، ئەلقاسم، زەورا، هەولێر و تەلەبە ب حەفت خالان رێزێن شەشێ هەتا نەهێ ل دووڤ ئێك دهێن، نەورۆز ب پێنج خالان رێزا 12ێ دهێت تیما دهۆكێ ب چار خالان پێشڤە هاتە رێزا 13ێ.
