دراكۆلا
ناصح کامگاری
دەمێ زەلام ژ کرینێ ڤەگەریای دەنگێ گازندێن وی ژ دەرێ نیمچەڤەکری یێ دەستئاڤێ دهات: ئەم مرۆڤێن مەزن چ ژ مرۆڤایەتیێ فەهم ناکەین.
بویکا نوی ل سەر تەختێ خۆ یێ خاروڤیچ خۆ راکێشا و ب باوشکەکا درێژڤە گۆت: ل بەرێ سپێدێ من دخواست چرکەکێ بنڤم، زەنگا تیلەفونێ ئەز ژ خەوێ راکرم.
دەنگەگێ نەیێ روون یێ زەلامی دگەل کێمبوونا فشارا ئاڤا سەسفۆنێ جارەکادی دیاربوو: .. زەلامەکێ زەبەلاح وەکی هرچێ ل پشیا سەری راوەستیا بوو، و بتنێ دو نان ژی مابوون. نانپێژی نان ئینان، دیت کچکەکا بچویک کو عەبایەک ل بەر بوو، ل بەر مێزی یا دکەتە گری. گۆتێ: تە چیە تە پارەیێن خۆ بەرزەکرینە؟ کچکێ ب گریڤە گۆت: بیست تومەن.
نانپێژی هەر دو نانێن ب کونجی کرنە د سەبەتا وێ دا، ژ نیشکەکیڤە وی زەلامێ ل پێشیا سەری کرە هەوار وگۆت: ما سرا یا وێ یە؟ دەستێ نانپێژی ما ل هەوا و ژێ پرسی: تە چەند دڤیا؟ زەلامی گوتێ: هەر ئەڤ هەر دویە!. نانپێژی ژی نان ژ سەبەتا وێ زارۆکێ دەرێخستن و هاڤێتنە سەر مێزێ، وی بێ ویژدانی ژی نان راکرن.
بویکا نوی ب چاڤێن خۆ یێن وەرمتی ڤە ژناڤ نڤینا رابوو، ب دەنگەکێ خاڤ گۆت: بێ ویژدان..
زەلام ژ بەر دەرۆکێ ژۆرا نڤستنێ دەرباز بوو. بویکا نوی ل بەر خۆدیکێ پرچا خۆ گرێدا و د بن لێڤانڤە دنالی (زەلامێ دراکولا).. دەستێ خۆ ب پرچا خۆ ڤە ئینا و پاشێ پرچا خۆ یا کچانە وەکو کوریا هەسپی هەژاند و هەژاند.
زەلام ل بەر دەستشۆیێ ل ژێر فشارا ئامان شیشتنێ دبن لێڤانڤە ئاخفتنێن کرێت دگۆتن، دەمێ بویکا نوی هاتی ل پشت مێزا خوارنێ رونشتی و گۆت: رێڤەبەرێ قوتابخانا کچا تە بوو تێلەفون کر و گۆت: سەرەدانەکا قوتابخانێ بکە.
زەلامی ئاڤا سەماوەری یا کەلی دکرە قۆریکی. دایکێ کچا خۆ ب زكێ برسی ڤە هنارتیە قوتابخانێ و زارۆک بێهێز و شیان یا روونشتیە کوژیکێ حەوشا قوتابخانێ.
بویکا نوی ئەڤە گۆت و سفرە ل سەر مێزێ دانا و ل نیڤا سفرا گولگولی دو نانێن بەربەری یێن گەرم و بژارتی بوو.
ژێدەر:
ناصح کامگاری، سقف این خانە کوتاه است، ص ٧٧-٧٨.