درامایا (خۆدیك) ل مەها رەمەزانێ دێ هێتە نیشادان
هەرهین محەمەد:
دەرهێنەر (مەهدی مونیر) د دیدارەكێ دا بۆ رۆژنامەیا ئەڤرۆ دیاركر كو ئەڤە دەمەكە ئەو مژوولی وێنەكرنا درامایەكا پازدە خەلەكی نە ب ناڤێ (خۆدیك) بۆ هەیڤا رەمەزانا پیرۆز و هەر خەلەكەك بەحسێ ئێش و ئازارەكێ یان نەریتەكێ جڤاكی یێ رۆژانە دكەت كو گرێدای ژین و ژیارا خەلكی نە و پتر بابەتێن رەخنەیا ئاڤاكەر و پەروەردەیی نە و نوكە د قوناغا وێنەگرتنێ دا یە و ل بەرە د هەیڤا رەمەزانا پیرۆز ل دەلال تیڤی بهێتە نیشادان.
هەروەسا گۆت: بۆ چێكرنا درامایێ دەرهێنەر ناچیتە گەشتەكا خۆش بەلكو دچیتە شەڕەكێ مەزن ل گەل دەمی وەكو دەرهێنەر دشێم بێژم كو دراما ئێك ژ كارێن هەرە زەحمەتە، چونكو نەبتنێ مرۆڤ چیرۆكێ دگێڕیت، بەلكو جیهانەكێ ئاڤا دكەت و چێكرنا درامایێ ب هەیڤان ڤەدكێشیت و هندەك جاران ل هاڤینێ دیمەنەكی دگێڕین كو دڤێت ل سەر شاشێ وەكو زڤستان دیاربكەت.
