درامایێن خۆمالی نه‌گه‌هشتیه ئاستێ درامایێن بیانی كو چاڤێ بینه‌ری تژی بكه‌ین
هەرهین محەمەد:
هه‌موو ده‌مان ئه‌م دبێژین ئه‌م وه‌كو دهۆك تهنیێن دراما خۆمالی نه، چونكۆ گه‌له‌ك كێم دهاته چێكرن و دابونه‌ریت و ئێش و ئازارێن جڤاكی به‌رچاڤدكرن و خۆدانێ كومپانیه‌كا كارێن هونه‌ری و دوبلاژێ دبێژیت: هه‌تا نوكه ئه‌م نه‌گه‌هشتینه وی ئاستی وه‌كو دراما بیانی دراما خۆمالی ژی ل هه‌موو وه‌لاتێن ده‌وروبه‌ر بهێته دوبلاژكرن.
ئه‌نوه‌ر بادی، خۆدانێ كومپانیا (ئه‌ی ڤی لاین) یا هه‌موو كارێن هونه‌ری و دوبلاژێ بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: د شاشه‌یێن مه یێن كوردستانێ دا مه دوو بابه‌ت هه‌نه ئه‌وژی دراما خۆمالی و ردراما بیانی و مه‌دڤێت و نه‌ڤێت دڤێت ئه‌م پشته‌ڤانێن دراما خۆمالی بین، به‌لێ ئه‌ڤه چه‌ندین ساله مه كه‌نال و كومپانی هه‌ین نه‌گه‌هشتیه وی ئاستی چاڤێ بینه‌رێ خوه تژی بكه‌ت و ئه‌و فلم و درامایێن بیانی ده‌مێ دهێنه چێكرن پاره‌كێ گه‌له‌كێ مه‌زن لێ دهێته مه‌زاختنن چونكو بازارێ وی یێ خۆشه بۆ نمونه وه‌لاتێ توركیا ده‌مێ درامایه‌كێ چێدكه‌ت ده‌ته گه‌له‌ك وه‌لاتان و ئه‌و ل سه‌ر زمانێ خوه دوبلاژ دكه‌ن، به‌لێ هه‌كه نوكه ئه‌م درامایه‌كێ چێكه‌ین بتنێ دێ بۆ دهوكێ بیت و خۆ ل هه‌ولێرێ ژی ناهێته په‌خشكرن و هه‌ردیسان درامایێن ل هه‌ولێرێ ژی دهێنه چێكرن ل دهۆكێ ناهێنه په‌خشكرن، ئانكو دراما مه نه‌گه‌هشتیه وی ئاستی وه‌لاتێن ده‌وروبه‌ر ژ مه بكرن و دوبلاژ بكه‌ن و بازارێ درامایان ژ كه‌نالان بۆ كه‌نالایه و ئه‌ڤ چه‌نده وێ یه‌كێ رادگه‌هینت كو مه سه‌ركه‌فنه‌كا باش نه ئینایه دیسان ئه‌و ئه‌كته‌رێن دناڤ درامایێن بیانی دا دبیت ئه‌كته‌رێن مه نه‌گه‌هشتبنه ئه‌وی ئاستی ب تایبه‌تی رولێ ژنێ گه‌له‌ك یێ كێمه لنك مه و گه‌له‌ك جاران درامایان دا دێ پێدڤی كچه‌كێ بن نه‌چارن كورده‌كا رۆژئاڤا، یان باكور، یان ژ ده‌ڤه‌رێن سوران بینن و هه‌تا نوكه ئه‌كته‌رێن مه‌یێ، كور دراما خۆمالی دا گه‌له‌ك رۆله‌كێ باش دگێرن و یێن كچ ژی گه‌له‌ك دكێمن وئه‌وێن مه هه‌ین ژی نه دئه‌كادیمی نه گۆت: دراما بیانی پاره‌كێ گه‌له‌كێ مه‌زن لێ دهێته مه‌زاختن و سیناریویه‌كا مه‌زن بۆ دهێته دانان وه‌كو ئامیره و ده‌رهێنان و وێنه‌گرتن و مونتاژ گه‌له‌ك ب ئاسته‌كێ بلند تره ژ یێن مه یێن كوردستانێ و هێشتا ئه‌م وه‌كو دراما كوردی نه گه‌هشتینه ئاستێ درامایێن بیانی كو چاڤێ بینه‌ری تژی بكه‌ین و ئه‌و پاری ل دوبلاژكرنا دراما بیانی دهێته مه‌زاختن گه‌له‌ك كێمتره ژ چێكرنا درامایه‌كا خۆمالی
بوشرا عومه‌ر وه‌كو دوبلێره‌كا كچ بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: ئه‌و كوالتیا دراما بیانیی پێ دهێته چێكرن ئه‌و كوالتیه دناڤ دراما خۆمالی دا نینه و هه‌ردیسان درامایێن خۆمالی ئه‌و هێزه نینه دراما هه‌تا سێ چار هه‌یڤان درێژبیت و بینه‌ری بخوه ڤه گرێده‌ت و ئه‌م دبینین بتنێ بۆ هه‌یڤا ره‌مه‌زانا پیرۆز و یان چه‌ند رۆژان دهێته په‌خشكرن و ب دووماهی دهێت و ئه‌ڤه نابیته زنجیره دراما و چه‌وا ستوری و شوت ستوری هه‌یه وه‌سا مه دراما و شورت دراما یا هه‌ی و ئه‌ڤا نوكه هه‌ی دناڤ ده‌ڤه‌را به‌هدینان و سوران شورت درامایه و هه‌روه‌سا دراما كوردی ته‌كه‌زێ ل سه‌ر ئێك بابه‌ت دكه‌ت و گه‌له‌ك رویدانان ناكه‌نه تێدا و درامایا بیانی ل گه‌ل هه‌رخه‌له‌كه‌كێ رۆیدانه‌ك هه‌یه.
كه‌ریم محه‌مه وه‌كو دوبلێر بۆ به‌رپه‌رێ هونه‌ری یێ رۆژنامه‌یا ئه‌ڤرۆ دبێژیت: جوداهیه‌كا مه‌زن دناڤبه‌را دراما خۆمالی و یا بیانی دا هه‌ی ب تایبه‌تی داب و نه‌ریت و ئه‌م ژی حه‌زدكه‌ین درما مه یا خۆمالی یا بهێز بیت و بتنێ چاڤێ مه ل سه‌ر دراما مه بیت و نه‌سه‌حكه‌ینه درامایێن بیانی، به‌لێ دراما مه یا خۆمالی گه‌له‌ك كێماسی نه ژلایێ وێنه‌گرتن و ده‌رهێنانێ و ئه‌كته‌ران و گه‌له‌ك كوالتیا وان یا لاوازه، له‌ورا دراما بیانی هه‌موو ده‌مان بهێزتره و بینه‌ره‌كێ مه‌زن دكێشته خۆ هه‌كه بێژین دراما بیانی ل گه‌ل داب و نه‌ریتێن مه ناگونجیت ل ئه‌ڤێ دووماهیێ ژی درامایه‌ك هاتیه چێكرن ب شێوه‌كێ به‌ر چاڤ ڤه‌خارنێن كحولی دهاتنه بكارئینان وئه‌ڤه ژی ریكلامه كه بۆ به‌رب خرابیێ هه‌ردیسان په‌یوه‌ندیێن رۆمانسی یێن تێدا، ئانكو ئه‌م بس ژین ئه‌و تشتێن دراما بیانی دا دهێنه‌كرن دراما مه یا خۆمالی ژی دا یێن هه‌ین و دهێنه‌كرن و ده‌مێ ئه‌م دراما بیانی دوبلاژ دكه‌ین هه‌موو دهێته فلته‌ركرن و هه‌رپارچه‌كا كریت بیت و نه‌یا گونجای بیت بۆ دیتنێ ئه‌م لاده‌ین یان شیێلی دكه‌ین، چونكو دنوكه دا دراما بیانی هه‌موو ئه‌ندامێن خێزانێ بینه‌رن.
