دره‌و بوویه پشكـه‌ك ژ پـه‌روه‌ردەیا خێزانی
دره‌وونناسەکی، د دیدارەکێ دا بۆ رۆژنامەیا ئه‌ڤرۆ دیار کر کو دره‌و د حاله‌تێ لاوازیێ دا دهێته بكارئینان و خه‌لك پتر باوه‌ر ژ دره‌وێ دكه‌ن و دبێژن راستی یا ته‌عله و گۆت: دره‌و زوی دناڤ جڤاكی دا به‌لاڤه دبیت و بوویه پشكه‌ك ژ په‌روه‌ردا خێزانی دناڤ جڤاكی دا.
یوسف ئۆسمان، دره‌وونناس و ڤه‌كۆله‌رێ جڤاكیه، د دیدارەکێ دا بۆ رۆژنامەیا ئه‌ڤرۆ دیار کر د هه‌موو ئایینان دا دره‌و ب دۆژمنێ خودێ دهێته نیاسین، دره‌و ده‌رگه‌هه‌كه بۆ هه‌لوه‌شاندنا خێزانێ و جڤاكی و گۆت: ئه‌وێ دره‌وێ بكه‌ت، دزیا و فێلبازیا و دو روویاتیێ و خیانەتێ ژی دێ كه‌ت و به‌رتیلان ژی دێ وه‌رگریت.
یوسف گۆتژی: گه‌له‌ك جورێن دره‌وێ هه‌نه، وه‌كو دره‌وكرن بۆ به‌رژه‌وه‌ندیێ، دره‌وا به‌رگریگرنێ، دره‌وا خۆ ڤه‌شارتنێ ژ كاره‌كی، دره‌وا كه‌ربوكینێ، ئه‌ڤه بۆ هندێ یه دا زیانێ بگه‌هینیته كه‌سێ به‌رامبه‌ر و ئه‌ڤه گه‌له‌ك دناڤ جڤاكی دا هه‌یه، هه‌روه‌سا دره‌وا ترساندنێ و چاڤلێكرنێ ژی هه‌یه، دره‌وا خۆ مه‌زنكرنێ وه‌سا خۆ نیشا دده‌ت كو یێ زه‌نگین و خۆدان مال و مولكه.
دره‌وونناسی دیار کر کو زۆر جاران دایك و باب دره‌وا ل زارۆیێن خۆ دكه‌ن داكو زیان نه‌گه‌هیته زارۆیین وان، ئه‌ڤه ژی به‌رۆڤاژی راستیێ یه، له‌وما ده‌مێ ئه‌و زارۆیه مه‌زن دبن، دزانن كو ئه‌و تشتێ دایك و بابێن وان گۆتینه وان، دوورن ژ راستیێ و گۆت: دره‌و كاریگه‌ریه‌كا نه‌رێنی ل سه‌ر جڤاکی دروست دكه‌ت، جڤاكه‌كێ دره‌وكه‌ر دێ دروست بیت، ب ڤی ره‌نگی تاكێن جڤاكی دێ فێری دره‌وێ بن و راستیان نابێژن و ب دره‌و ژی سویند دخون.
دەروونناس یوسف ئوسمان د بەردەوامیا ئاخفتنێن خۆدا دیار کر کو ئه‌و خێزانا توندوتیژی تێدا تاكێن وێ خێزانی فێری دره‌وان دبن و دره‌وا دكه‌ن، هه‌روه‌سا ل وی ده‌می تاكێن خێزانێ دره‌وا ل دایك و بابێن خۆ ژی دكه‌ن، هه‌روه‌سا دره‌وا سیاسی و جڤاكی و راگه‌هاندنێ و ناڤ خێزانێ بوویه پشكه‌ك ژ ژیانا خه‌لكێ مه و گۆت: خه‌لك ب ساناهی دشێن دره‌وێ جوان بكه‌ن و ئه‌ڤه دناڤا مه هه‌موویان دا به‌لاڤ بوویه.
یوسف ئوسمان گۆتژی: باشترین چاره‌سه‌ری بۆ دره‌وكرنێ ئه‌وه، دڤێت ئه‌م ژ په‌روه‌ردا خێزانێ ده‌ستپێبكه‌ین، دڤێت دایك و باب زارۆیێن خۆ ب دره‌وێ په‌روه‌رده نه‌كه‌ن، پێدڤیه تاكێن جڤاكی ل سه‌ر راستیێ و وێره‌كیێ بهێنه په‌روه‌رده كرن.
