درووشمێن بهربژێران د ناڤبهرا مللهت و خلهمت و گهندهلیێ دا
كۆڤان ئیحسان
پشتی ههوا ههلبژارتنان دهستپێكری، هندهك دیتن و گۆتن و درووشمێن نوو پهیدابوون، ههر چهنده بهری نوكه پتریا درووشمان گرێدای ههڤڕكی و مللهتی بوون، د ناڤ هندهكان ژی دا شههید و قوربانی دهاتنه دیتن، بهلێ ڤێجارێ دیاره نیڤ دودلیهك یا ل دهڤ بهربژێران ههیی، كا دێ چاوا گههنه خهلكی، دهمێ ههوا ههلبژارتنان دا من سێ رهنگێن درووشمان دیتن، دبیت هێشتا ههبن من نهدیتبن، بهلێ دێ بزاڤێ كهم بهحسێ وان ههرسێ رهنگان كهم:-
１. درووشمێ مللهتی: ههلگرێن ڤی درویشمی گهلهكن، بهلێ هند د زیق و بهربهلاڤ نینن، ههلگرێ ڤی درووشمی یێ د ناڤبهڕا ریفراندۆما كوردستانێ و ڤهگهریان بۆ ئیراقێ بهرزهبووین، هندهك ژ وان درووشمان بزاڤا ڤهگهرندنا مهزناهیا كوردان دكهن، مینا: یان دهستوور یان ژی بهسه، ل سهر مافێن ههوه بێدهنگ نابم، بۆ نههێلانا عهقلێ هێزێ هێزا عهقلی پێدڤیه. د ناڤ ڤان درووشمان دا هندهكا بزاڤ یا كری پتر كوورتر بچنه د ناڤ فهلسهفا نڤیسینێ دا، دبیت ناڤێ كوردان یان كوردستانێ نه ئینابیت، بهلێ ب ئیشك و كوریشكا هزرا وی دگههیت، دبیت ژی مهرهما وی ئهوبیت خۆ پویچهكێ ژ بهرپرسیێ بدهته پاش ههكه هات و چ ژێ نههات.
２. درووشمێ خلمهتێ: ههكه بهربژێڕان ل سهر پۆستهرێن خوه ژی بهحسێ ڤی لایی نهكربیت، دهمێ دچنه د ناڤ خهلكی دا باش وی لایی د ئازرینن، دبیت ژی دو مهرهم ب ڤێ چهندێ ههبن، یا ئێكێ مهرهما وی ئهو بیت دلێ خهلكی بۆ خوه راكێشیت، نهخاسمه نوكه خهلك یێ د كاودانهكێ خراب ڕا دهرباس دبیت. یا دویێ دبیت ئهو بهربژێر هندێ ژێ چێكهت یان بۆ دیتن و هزرا پهرلهمانی هندێ ب چهك و پێزانین نهبیت.
３. درووشمێ نههێلانا گهندهلیێ: هندهك بهربژێرا ئهڤ درووشمه یێ بلند كری، بهلێ هزرا وێ چهندێ نههاتیهكرن كو دێ گهندهلیێ ل كویڤه بنبركهن، ههكه ل ئیراقێ بیت گهلهك یا ب زهحمهته و بۆ ڤی بیاڤی چ ب كوردان ناهێته كرن.
هندهك تشت كێم یێن هاتینه بهحسكرن، هندهك ژی ههر نههاتینه بهحسكرن، بۆ میناك چ ژ بهربژێرا بهحسێ ریفراندۆمێ نهكریه، كهسێ بۆ خوه نهكریه ئالا، نزانم لێڤهگهرێن وان وه گۆتیێ یان ژی نهوێرن خوه ل ڤێ مژارێ بدهن. شههید و قوربانی گهلهك كێم د ناڤ درووشمێن بهربژێران دهێنه دیتن، بهری نوكه ئالا ههلبژارتنان بوو. دیساڤه رهڤاندیێن دهستێ داعشێ ژی كێم ل سهر دهێته دیتن، راستی ژی مژارهكا گهرم بوو ههكه ئێكی خوه لێدابا، بهلێ یا خوه دایه پاش.
تشتێ جوان من ڤێ جارێ دیتی، گهلهك بهربژێران دگۆت ههكه ئهز دهركهڤم و دهرحهقی شۆلێ خوه ل پهرلهمانی نهدهركهڤم دێ دهستان ژ كارێ خوه بهردهم، ئهڤه تشتهكێ لاوه و یا ژ منڤه بهری نوكه گهلهك كێم ههبوو.
