دزی ژ زەلامێ خوە دکرن
ئه‌ڤرۆ نيوز:
پارێزەرەکێ دادگەھا قەسروکێ راگەھاند کو کەسەک خودان چار زارۆ بوو، و رەوشا وی یا ئابووری یا باش بۆ، ئاریشە ل گەل ھەڤژینا خوە ھەبوون، ژبەرکو دزی ژێ دکرن و وی ھەر تەحەمولا وێ دکر، ب خاترا زارۆ و کەرامەتا خوە، بەلێ ژنێ ھەر توبە نەکر ھەتا گەھشتیە وی رادەی ڤێجا دزی ژ دکانان ژی کرن و گۆت: لەوما ھەڤژینێ وێ زۆر تۆرە بۆ و بریار دا وێ بەردەت.
پارێزەر عیماد عادل ئاکرەیی ل دادگەھا قەسروکێ بۆ ئەڤرۆ دیار کر کو ژن و مێرەک ژیێن وان دناڤبەرا 27 بۆ 30 سالیێ دا بوون و خودان چار زارۆ بوون و رەوشا وان یا ئابووری یا باش بۆ و گۆت: پشتی زەلامێ زانی کو ھەڤژینا وی یا دزیا ژ وی دکەت گەلەک تۆرە بۆ، بەلێ ھەر لێبوری و تەحەموولا وێ کر ب خاترا زارۆ و کەراماتا خوە، بەس ل ڤێرە ئەڤ رەفتارا وێ یا ب شەرم زێدە بوو و ھەر توبە نەکر، ھەتا گەھشتە وی رادەی دزیێن ژ دەرڤە کرن ژ دکانا و د کامیرێن چاڤدێریێ دا ھاتە دیتن.
پارێزەری گۆتژی: خودانێن وان دکانا ژی چوونە مالا وی و گۆتێ ئەم دزانین کو ئەڤە خانما ھەوەیە و دزی ژ دکانا مە یێن کرین و د کامیرا چاڤدێریێ دا یا ھاتیە وێنە کرن، پاشی ئاریشە مەزن بۆ، و گەھشتە مالا بابێ زەلامی، خودانێن دکانا گۆتی ئەڤ تشتە یێ روودایی مە پێ نەخوشە و ئەم چ سکالایا ل دادگەھی تومار ناکەین، بەلێ ئەم قەبوول ناکەین جارەکا دی دوبارە ببیت.
پارێزەری ئاشکرا کر ژی کو زەلامێ وێ گۆتێ تە گەلەک درێژ کر و تە ئەز شەرمزار کرم ل گەل خەلکێ بیانی ئەڤە چەند سالە من تەحەمولا تە یا کری و من ھەر خوە بێدەنگ دکر، لێ بلا ھەتا ڤێرێ بە س بیت و ھەڤژینێ وێ داخواز ژ دادگەھێ کر کو ھەڤژینا خوە بەردەت.
پارێزەری عیماد زێدەتر گۆت: من وەکو پارێزەر گەلەک بزاڤ کرن جارەکا ل گەل ئێک ژیانا خوە ببەنە سەری ب خاترا زارۆیێن وان و ھەڤژینا وی ژی ژ شاشیا خوە توبە بکەت و گوھداریا زەلامی َخوە بکەت، بەلێ زەلامی گۆت خلاس نەشێم ئێدی ل گەل بژیم.
ئاکرەیی دا زانین ژی دادگەھێ داخوازیا وی وەرگرت و زەلامی ھەڤژینا خوە بەردا، ژنێ داخوازا زارۆیێن خوە کر ژ دادگەھێ، بەلێ زەلامی قەبوول نەکر و گۆتە ھەڤژینا خوە تۆ داخوازا زارۆیان بکەی دێ پاشی کێشەکا دزیێ ل سەر تە ڤەکەم و گۆت: ژن ژی نەچار بۆ دەستا ژ زارۆیێن خوە بەردەت، ئاریشە ژی ب شێوەکێ عەشائیری دناڤبەرا واندا ھاتە چارە کرن.
