دكتاتۆریهت و تهڤگهرا ئازادى یا باكوور
ئهردۆگان و ههڤكار و ههڤالێن خوه بهرێ كۆدهتا سیاسى و سڤیل دانه كوردان و دخوازن تاكه ئۆپۆزسیۆنا ل توركیا ژى بێ دهنگ بكهن ئانكو ژناڤ ببهن، گرتنا ب سهدان سیاسهتمهدار و رۆژنامهڤان و ب دههان پهرلهمانتارێن كورد هزرا كو كورد بێ شهر دشێن ب سیاسهت و خهباتێن دیمۆكراتیك بگههنه مافێ خوه ژ هۆلێ راكریه و ل باكوورێ كوردستانێ ژ بلى دژواركرنا شهری چ رێیهكا دى ل بهر تهڤگهرا كوردى نهمایه و دهمێ وێ هاتیه كا چهوا تهڤگهرا ئازادیا كورد ل باكوورێ كوردستانێ سیاسهت و ستراتژیا خوه دهرباز بكهت و شاشى و كێماسیێن خوه ب نرخینیت.
راسته ئهردۆگانێ سهرۆك كۆمارێ توركیا مێزا دانوستاندنا ژ هۆلێ راكر و رۆژ ب رۆژ بهر ب دكتاتۆریهتێ ڤه دچیت و ناخوازیت چ ئۆپۆزسیۆن ئانكو تهڤگهرهكا سیاسى یا دژبهرى وى بمینیت و د ناڤ سازى یێن دهولهتێ و حكوومهتێ دا ب سهدان كهسان ب رێیا ڤیدیو یێن سیكسى و گهندهلیێ نهچارى بێدهنگبوونێ كرینه یان ب خوه را گرێدایێ و یهك ژ وان كهسان سهرۆكێ بزاڤا پارتا نهتهوهپهرهست مهپه و ب سایا ڤیدیۆیا سیكسى یا سهرۆكێ مهپێ، د رهوشا نها دا شیایه ئهنیا نهتهوهپهرهست یا میڵى دروست بكهت.
ل گهل ڤێ راستیێ دڤێت تهڤگهرا ئازادیا كورد ل باكوورێ كوردستانێ ژى خوه رهخنه بكهت و داخوازا لێبۆرینێ ژ گهلێ كورد بكهت ژ بهر كو ستراتژیا شهرێ باژێران و داخوازا خوهسهریێ ئانكو مافێن دیمۆكراتى رێ دایه ئاك پارتى ئانكو ئهردۆگانی دا كو بشێت باژێرێن كوردان وێران بكهت و پشتهڤانیا نهتهوهپهرستان وهربگریت و ئهنیا نهتهوهپهرهست یا میڵى ئاڤا بكهت.
سهركردایهتیا سیاسى یا تهڤگهرا كوردى یا باكوور دڤێت ئێدى دانپێدانێ ب سیاسهتا خوه یا شاش بكهت و ژ نووڤه خوه ل دووڤ راستیێن ڤێ قووناغێ دیزاین بكهت و ستراتیژیهكا نهتهوى و نیشتیمانى یا ل دووڤ پێدڤیێن سهردهمێ وهك بنگههێ خهبات و كارێن خوه یێن سیاسى قهبوول بكهت و قادا خهبات و چالاكیێن خوه ژ كوردستانێ دهربازى توركیا بكهت و فهلسهفا یهكگرتنێ ل گهل پارت و ئالیێن سیاسى یێن كوردستانێ ب كریارى بجه بكهت و ئهنیا رزگاریا باكوورێ كوردستانێ ل گهل ههموو ئالیێن سیاسى یێن كوردى زندى بكهت.
بۆ ڤالا دهرخستنا كۆدهتا سیاسى یا ئهردۆگانی دڤێت تهڤگهرا ئازادیا باكوورێ كوردستانێ د ههر واری دا پێشهنگیا كوردان بكهت و بێ دهنگیا خهلكى ل ههمبهر زۆردارى و كۆدهتا یا ئهردۆگانی باش تێ بگههیت و خوه ژ سیاسهتا رزگاركرنا دهم قورتال بكهت و سیاسهتهكا دهم درێژ یا خوه گههاندنا ئازادیێ بجه بكهت، دهمێ ڤێ یهكێ بكهت شكاندنا كۆدهتا ئهردۆگانی نه یا زهحمهته و دیرۆكێ ئیسپات كریه كو گهلێ كورد دشێت زۆرداران راوهستینیت و ههموو جۆرێن كۆدهتایان ڤالا دهربێخیت.
ئهم وهرن سهر ئارمانجا ئهردۆگانێ سهرۆك كۆمارێ توركیا، بنگههێ هزرا ئاڤاكرنا سیستهمێ سهرۆكاتیێ ل توركیا ڤهدگهریت سالا ٢٠١٣. دهمێ دادگههێن توركیا خوهستن وهزیرێن حكوومهتا ئهردۆگانی وكورێ وى ل سهر تۆمهتا گهندهلى و دزیێ دادگههى بكهن و ههولا گرتنا وان دا، ئهردۆگانی مهترسیا ل پێشیا خوه باش دیت و ل رێكێن خوه رزگاركرنا ژ دادگههكرنێ گهریا و ب رێیا ئاقلمهندێن دهولهتا كور ل گهل رێكخستنا ئهرگهنهكۆن و سهرباز و فهرماندارێن بهرێ یێن د دهولهتێ دا ب باندۆر و خودان هێز گههشته ههڤپهیمانیێ و د رهوشا نها دا ژی ئهردۆگان زێدهتر دهولهتا نوو یا كور دهستههلاته و ئهردۆگان داخوازیێن دهولهتا كور بجه دكهت.
ههڤپهیمانیا نوو یا ئهردۆگانی ب دهولهتا كور را ل سهر سێ بنگههان هاتیه ئاڤاكرن، یا یهكێ رزگاركرنا ئهردۆگان و مالباتا وى ژ دادگههكرنێ، یا دویێ رێ گرتنا ل ههمبهر ههموو كار و چالاكیێن چهپ و كوردى و یا سیێ ڤهگهراندنا توركیا ژ ئورۆپا بهر ب رۆژههلاتی ڤهیه. توركیا بۆ بجهكرنا ڤان ههر سێ خالان پێدڤى ب شهرهكى ناڤخۆیی، ئانكو ههرێمى ههیه و ل پێشیا توركیا سێ رێك ههنه یان شهرێ ناڤخۆیی ب كورد و چهپ و لایكخوازان را بكهت، یان دێ ل سهر بنهما پهیمانا لۆزانێ مافێن خوه ب كار بینیت و شهرێ عیراقێ بكهت یان ژى پكك بكهته بیانۆ بۆ خوه و ل سووریێ بكهڤیته شهرهكێ دژوار. سێ رێك و سێ مهترسیێن دژوار و مهرهمێن ڤهشارتى یێن توركیا ل سهر مێزا ئهردۆگانی و دهولهتا كور دایه و وهسا دیاره د رهوشا نها دا ژ عیراق و سووریێ زێدهتر بهرێ چهكێن خوه دایه سهر كوردان و دخوازیت ب شهرهكى ناڤخۆیی رهوش و ههوایێ توركیا ب گهۆریت ب سهركهفتنهكا خهیالى و راگههاندنێ دهمێ دهستههلاتا خوه درێژ بكهت و خوه ژ دادگههكرنێ رزگار بكهت.
كلیلا سهركهفتن و بنكهقتنا ئهردۆگانی و دهولهتا كور د دهستێ كوردان دایه ئانكو ئهم وهسا بێژن، تهڤگهرا ئازادیا كورد ب خوه گۆرین و بجهكرنا پێدڤیێن قووناغێ و نووژهنكرنێ دشێت رێ ل بهر دكتاتۆریهتێ بگریت، لێ رژدیا ل سهر سیاسهتا شێلۆ یا بێ ئارمانج دێ ببیته فاكتۆرێ سهرهكى یێ سهركهفتنا ئهردۆگانی و دهولهتا كور.
