دلخۆشم من و هەڤژینا خۆ ئەڤ خانیە ئاڤا كری
سالار محەمەد دۆسكی:
دەولەمەندەكێ باژێرێ دهۆكێ ب هەڤكاری و پشتەڤانیا هەڤژینا خۆ شیا كارەكێ خێرخوازی ئەنجام بدەت ئەوژی ئاڤاكرنا ئاڤاهیەكی ژ بۆ كچێن بێ سەمیان ل باژێرێ دهۆكێ ئەڤی كەسی بۆ رۆژناما ئەڤرۆ گۆت: ئەڤە هیڤی و دوعایا من بوو سوپاس بۆ خودێ ب پشتەڤانیا هەڤژینا خۆ ئەم شیاین ڤی كاری ئەنجام بدەین.
شڤان عزەت بەربهاری، خودانێ پرۆژێ ئاڤاكرنا خانیێ مەندو یێ كچێن بێ سەمیان بۆ رۆژناما ئەڤرۆ گۆت: (هزرا من ئەو بۆ كو كارەكی بكەم و هەكە خودێ كەرەم ل گەل من كر دێ كوژمەكێ پارەی دەمە لایەكی، بۆ ماوێ چەند سالان سندوقەك بۆ ئەنجامدانا ئەڤی كاری من هەبوو، سالا بوری من تەماشەی پارێ خۆ یێ دانایی كر كو بوویە كوژمەكێ باش، د هەمان دەمدا من تەماشەی ئاڤاهیێ كچێن بێ سەمیان كر كو نە ل ئاستەكێ باشە، لەوما هزر بو من دروست بو وەك خێرەك و پالپشتیەك بۆ حوكمەتێ ئاڤاهیەكی بۆ ڤێ تەخێ ئاڤا بكەم، بۆ ماوێ دەه سالان من هاریكاریا ئێتیمان ژی كریە).
بەربهاری گۆتژی: (هەموو دەما هەڤژینا من دگۆت هەكە تو خێرەكێ بكەی بۆ ئێتیمان بكە و د هەمان دەمدا كوژمەكێ مەزاختیێ ڤی پرۆژەی ژلایێ هەڤژینا من هاتە دابینكرن وەك پشتەڤانی بۆ ئەنجامدانا ئەڤی كاری و پارەیێ ئەڤی ئاڤاهی مە هەردوكان دابینكریە).
شڤان زێدەتر گۆت: (پشتی مە بریار دای و ل گەل بەرپرسێن گرێدایی بابەتی گەنگەشە كری و كومبووین مە ژ حوكمەتێ خواست عەردەكی بو مە دابین بكەت پشتی هینگێ ل رێكەفتی 16/4/2023 مە دەست ب ئاڤاكرنێ كر، هەتا گەهشتیە قوناغا دووماهیێ و رێو رەسمێن رادەستكرنێ مە رادەستی حوكمەتا هەرێما كوردستانێ كر و دهێتە چاڤەرێكرن ل دەسپێكا سالا نووی دەوام تێدا بهێتە كرن).
شڤان بەربهاری دیار كر كو عەردێ ئاڤاهی 3000 مەترە و ئاڤاهی ل سەر 500 مەتران هاتیە ئاڤاكرن و باغچەك دێ هەبیت هێشتا ب دووماهی نەهاتیە و بن باغچەی دا دێ گورەپانەكا وەرزشی یا گرتی بۆ دروست كەین بۆ هەر دو یاریێن باسكت بوولێ و ڤولی بولێ، هولەكا دی یا گرتی دهێتە دروستكرن بۆ چالاكیان و گۆت: (ئاڤاهی ب شێوەكێ مودرن و پێشكەفتی هاتیە ئاڤاكرن و هەموو سالوخەتێن پێشكەفتی تێدا هەنە و سیستەمێ ئاگرڤەمراندنێ و سیستەمێ سارو گەرمێ بۆ هەموو وەرزێن سالێ تێدا هەیە).
شڤان عزەت، خودانێ پرۆژێ ئاڤاكرنا خانیێ مەندو یێ كچێن بێ سەمیان دا زانین كو ئاڤاهی هاتیە رادەستكرن و ژڤانە 1/1/2025 كچێن بێ سەمیان بۆ ئاڤاهیێ خۆ یێ نوی بهێنە ڤەگوهاستن و گۆت: (رێژا كچێن بێ سەمیان رەنگە پتر بیت ژ 70 كچان، بەلێ گەلەك جاران مرۆڤێن وان لێ پەیدا دبن و گەلەك جاران خەلكێ هەی دڤێت خودان بكەن و نوكە كچێن كو دێ هێنە د ڤی ئاڤاهی دا و تێدا هێنە خودانكرن بتنێ 17 كچن و ئاڤاهی بۆ خودانكرنا 100 كچان هاتیە دروستكرن).
بەربهاری د بەردەوامیا ئاخفتنێن خۆدا گۆت: (ئەس گەلەك یێ دلخوش و ئارامم ب ئاڤاكرنا ئەڤی ئاڤاهی و ئەڤە دوعایا من بوو هەموو دەمان و هەر جهەكێ پیرۆز چووبامێ و من دوعا كربیت من ئەڤ دوعایە بخۆ كریە و بتنێ خودێ بكەتە رزقێ من ئاڤاهیەكی بۆ بێ سەمیانان دروست بكەم و سوپاس بۆ خودێ ب پشتەڤانیا هەڤژینا خۆ ئەم شیاین ڤی كاری ئەنجام بدەین).
ل دور هزرا ئاڤاكرنا ڤی ئاڤاهی بۆ تەخا بێ سەمیانان، شڤان عزەت بەربهاری گۆت: (ئەم قوتابی گەلەك جاران دا چینە گەشتێن قوتابخانێ و جاران مە دیت قوتابیەك نەهاتیە و دا پرسیار كەن بۆچی نەهاتیە؟ دا بێژن كاودانێن وی نەخوشن و ئێتیمە و كەسەك نینە چاڤێ خۆ بدەتێ و ئەڤێ چەندێ گەلەك كارتێكرن ل سەر من هەبوو هەر ژ زارۆكینی و هەتا نوكە، سەرەرای د ئاینێ ئیسلامێ دا ژی تەكەز كریە كو پێدڤیە چاڤدان و گرنگی ب ئێتیمان بهێتەدان و ئەڤە گەلەك یا بخێرە).
شڤان بەربهاری گۆت: (پشتی ئەم رابووین ب ئەنجامدانا ئەڤی كاری خودێ گەلەك دلێ من ئارام كریە و من سوزدایە هەكە خودێ ژ من ئینا و كرە رزق هەمان پرۆژە ل باژێرەكێ دیێ كوردستانێ ئەنجام بدەم).
خودانێ خانیێ كچێن بێ سەمیان گۆت: (سوپاسیا حوكمەتا هەرێما كوردستانێ دكەم ژ بۆ هاریكاری و دابینكرنا عەردی هەتا ئەم شیاین ئەڤی ئاڤاهی دروست بكەین، سوپاس بو هەر كەسەكێ پشتەڤانیا مە كری، سوپاسیا خێزانا خۆ دكەم كو پالپشتا ئێكێ بوو هەردەم دگۆت ئەم چەند پارا ب مەزێخین بۆ ئەنجامدانا ئەڤی كاری ئەم نە خسارەتین).
