دلخۆشی و بەختەوەری ژ ناخێ مرۆڤی پەیدا دبن
زاخۆ، دلۆڤان هالۆ:
ڕاهێنەرەکا گەشەپێدانا مرۆڤی بۆ ڕۆژنامەیا ئەڤرۆ دیار کر کو دلخۆشی و بەختەوەریا ڕاستەقینە چەندین یاسایێن گرنگ یێن هەین و گۆت؛ هەکە مرۆڤ پێگیریێ ب وان یاسایان بکەت دێ د ژیانا خۆ دا یێ دلخۆش و بەختەوەر بیت.
چیمەن محەمەد، دەروونناس و ڕاهێنەرا گەشەپێدانا مرۆڤی د دیدارەکێ دا بۆ ڕۆژنامەیا ئەڤرۆ دیار کر کو ئێك ژ یاسایێن گرنگ یێن دلخۆشی و بەختەوەریێ ئەوە کو نابیت مرۆڤ ژ دەرڤەی ناخێ خۆ ل دلخۆشی و بەختەوەریێ بگەڕیت، ئانکو بلا هزرا مرۆڤی ئەو نەبیت ب لێگەڕیان و ب دەستڤەئینانا تشتێن ماددی دێ مرۆڤ دلخۆش و بەختەوەر بیت، چونکی هەستێ دلخۆشی و بەختەوەریێ دڤێت ژ ناخێ مرۆڤی دەرکەڤیت و گۆت؛ ژبەر هندێ دڤێت ئەم دلخۆشی و بەختەوەریێ د ناخێ خۆ دا دروست بکەین.
چیمەنێ دیار کر ژی، دلخۆشی و بەختەوەری ژی دبیتە دوو چەق کو ئێك ژ وان دلخۆشی و بەختەوەریا دوم درێژ و بەردەوامە و یا دی ژی دلخۆشی و بەختەوەریا دوم کورت و بەروەختە، بەختەوەریا دەم درێژ ئەوە یا کو ب دەستڤەئینانا تشتێن مەعنەوی ب دەستڤە دهێت، و یا دەم کورت ژی ئەوە کو ب دەستڤەئینانا تشتێن ماددی ب دەستڤە دهێت و گۆت؛ بەهرا پتریا خەلکی ل دووڤ دلخۆشی و بەختەوەریا دەم کورت و ب دەستڤەئینانا تشتێن ماددی دچن.
ڕاهێنەرا گەشەپێدانا مرۆڤی د بەردەوامیا ئاخفتنێن خۆدا دیار کر کو ئێک ژ یاسایێن دیتر یێن دلخۆشی و بەختەوەریێ ئەوە کو دلخۆشی و کەرب و کین دژی ئێکن و پێکڤە ناگۆنجن، ئانکو ئەو کەسێن کەرب و کین د دلێن وان دا هەی نەشێن ب شێوەیەکێ ڕاستەقینە دلخۆش و بەختەوەر بن و کەسێن خودان کەرب و کین گەلەك پێکولان ژ بۆ ب دەستڤەئینانا دلخۆشی و بەختەوەریێ دکەن و ب دەستڤە نائینن و گۆت؛ لەوما ژ بۆ ب دەستڤەئینانا دلخۆشی و بەختەوەریا دەم درێژ و بەردەوام، پێدڤیە ل سەر مە ئەم ناخێ خوە ڤالا بکەین ژ کەرب و کینێ داکو جهێ دلخۆشی و بەختەوەریێ تێدا بکەت.
دەروونناسێ ئەو چەندە ژی دیار کر کو ئێک ژ یاسایێن دیتر یێن دلخۆشی و بەختەوەریێ ئەوە کو پێدڤیە مرۆڤ ب شێوەیەکێ ڕۆژانە هۆرمونێ ئەنەدرۆفین ل دەڤ خۆ چالاك بکەت و ئەڤ هۆرمونە ژی ب ڕێکا وەرزشێ و سەرشوشتنێ و خوارن و ڤەخوارنێن مرۆڤ حەز ژێ دکەت چالاك دبیت و گۆت؛ ئەڤ چەندە ژی دبیتە ئەگەرێ دلخۆشی و بەختەوەریا بەردەوام، هەر دیسان نەهێلانا ترسێ ژی ئێکە ژ یاسایێن گرنگ یێن دلخۆشی و بەختەوەریا بەردەوام.
