دلدارێ كوردستانێ
سه‌ربه‌ست بۆتی
خوه‌گۆریكه‌رێ وه‌لاتی
شه‌ر و داستان و سه‌رهاتی
بۆ ڤێگاڤێ و بۆ داهاتی
شوون ده‌ستێن ته نه به‌رزه‌بوون
شه‌هید محه‌مه‌دسالح بۆتی
بۆ وه‌لاتی ته یا گۆتی
وه‌كی شه‌مالكا خوه سۆتی
رۆژێن گه‌ش به‌رهه‌مێ هه‌وه بوون
ئه‌ز چوومه ناڤ شۆره‌شڤانا
پێشمه‌رگه‌هی و شه‌رڤانا
بریندار و دل كۆڤانا
ئه‌و عاشقێ ناڤێ ته بوون
تو نامری د ناڤ دلا دا
پیرۆزی د ناڤ هه‌ڤالا دا
هنده‌ك د ساخن وه‌ك دقه‌برا دا
ملله‌ت گه‌له‌ك ژێ توره بوون
ل ناڤ دیرۆكێ ده‌وله‌مه‌ندی
سه‌ركرده بووی سه‌ربلندی
خودانێ ناڤه‌كێ رندی
كوردپه‌روه‌ر خه‌مگینێن ته بوون
گه‌ریام ل ناڤ ده‌شت و چیا
من جاڤ دگێڕا ل هه‌میا
پێشمه‌رگه‌هێن ل سه‌رێ ڕێیا
جهێ بیرهاتنێن ته بوون
ئه‌ز چوومه گوندێ بۆتیا
ده‌وروبه‌ر و دووراتیا
دۆل و نهال لات و چیا
ئه‌و جهێ شوونوارێن ته بوون
هێشتا ته نه‌دیتی بزاڤ
ل هیڤیا ته بوو هه‌رده‌م و گاڤ
ب گرنژی لێ بكه‌ی سلاڤ
ئه‌و هیڤی و ئومێدێن ته بوون
وه‌كی شێر و وه‌ك پلنگی
به‌رسینگێ دوژمنا دجه‌نگی
سه‌ركرده‌كێ ب ناڤ و ده‌نگی
دیرۆكڤان دادڤانێن ته بوون
نه‌خوشی و خه‌م و ره‌زاله‌ت
خودان باوه‌ری و جساره‌ت
دا سه‌رفه‌راز بژیت ملله‌ت
خوشی و شادی ل ته به‌رزه‌بوون
مه ژ دل هه‌لبژارت خزمه‌ت
خه‌بات و كوردینی و ده‌وله‌ت
مه نه‌ڤیان مال و سه‌روه‌ت
سۆز و وژدانێن مه هه‌بوون
