دلشاد ئه‌حمه‌د: یاریزانێ ئێكانه مه ل پارێزگه‌هێ بۆ یاریا هه‌سپ سواریێ
ئه‌ڤرۆ،
د دیداره‌كێ دا یاریزانێ پارێزگه‌ها دهۆكێ بۆ یاریا هه‌سپ سواریێ دلشاد ئه‌حمه‌د بادی دیاركر كو ئه‌و یاریزانێ ئێكانه یێ پارێزگه‌هێ یه ئه‌ڤ یاریه ئه‌نجامدایه و ناسناڤ ژی ب ده‌ستڤه‌ئینایه و هیڤی خواست ب ناڤێ كوردستانێ پشكداری قاره‌مانیێن ده‌رڤه بیت.
زێده‌تر ناڤهاتی بۆ رۆژناما ئه‌ڤرۆ گوت: یاریا هه‌سپ سواریێ ل كوردستانێ وه‌رزشه‌كا نوو یه و تایبه‌تمه‌ندیا خوه هه‌یه ژ هه‌موو لایه‌ناڤه، ژبه‌ركو یاریزان بتنێ ب شیانێن خوه نه‌شێت یێ ئێكێ بهێت به‌لكۆ پێدڤی ب هه‌سپێ به‌رهه‌ڤبیت ژلایێ هیزێ، شاره‌زاهیێ ئه‌ڤچه‌نده ژی پێدڤی ب چاڤدان و دووڤچوونێ یه ژلایێ راهێنه‌رێن خودان شیان وشاره‌زا، ژبه‌ركو حه‌ز و ڤیانا من بۆ ڤێ یاریێ من هه‌موو له‌ورا من بزاڤكرن ببمه ئێك ژ یاریزانان و ئه‌ڤه بۆ ماوێ پێنچ ساله ل هه‌ولێرا پایته‌خت راهێنانا دكه‌م كو ل ئێك ژ یانێن تایبه‌تمه‌ندا، سه‌رباری دووراتیا رێكێ لێ رژدبووم و حه‌فتیانه هه‌تا سێ رۆژا به‌ره‌ڤ هه‌ولێرێ دچم بۆ ئه‌نجامدانا راهێنانا و ژلایه‌كێ دووڤه وه‌كو راهێنه‌رێ یاریا تایكواندویێ ژی به‌رده‌وامم و تیما خوه برێڤه‌دبه‌م.
ژلایه‌كێ دووڤه دلشاد ئه‌حمه‌د ئه‌وچه‌نده ژی دیاركر كو هه‌تا نوكه 20 جاران پشكداری قاره‌مانیێن ڤه‌كری یێن هه‌سپ سواریێ بوویه كو بۆ هنده‌ك جاران ژ فره‌نسا، ئه‌مریكا،تونس، لوبنان، ئه‌لمانیا پشكداربووینه وشیایمه رێزێن ئێكێ و دویێ ده‌ستڤه بینم ، دووماهی پشكداری به‌ری حه‌فتیه‌كێ قاره‌مانیا هه‌رێمێ بوو و شیام رێزا ئێكێ ده‌ستڤه‌بینم بۆ بلنداهیا 110سم ئاسته‌نگ یا خوه هاڤێتنا هه‌سپی و گۆت: هه‌موو بزاڤا دكه‌م به‌ره ب قاره‌مانیێن نێڤده‌وله‌تی و عه‌ره‌بی بچم كو ب ناڤێ كوردستانێ پشكداربم و دێ رژدبم لسه‌ر ڤێ ئارمانجێ، چاڤه‌ڕێ مه ل ده‌ستپێكا هه‌یڤا بهێت پشكداری قاره‌مانیا عه‌ره‌بی ل مسرێ ژی بكه‌م.
لدووماهی ناڤهاتی دیاركر كو پرۆژه هه‌یه د پاشه‌رۆژه‌كا نێزك دا ئه‌ڤێ یاریێ ل پارێزگه‌ها دهۆكێ دامه‌زرینیت ب هیڤییا وێ یه‌كێ جیهه‌تێن وه‌رزشی پشته‌ڤانبن و گۆت: سۆپاسیا هه‌ر ئێك ژ حسێن مسری، وله‌یس سه‌باح راهێنه‌رێن من و هه‌روه‌سان خالد ئه‌لراشد سه‌رپه‌رشتێ گشتی دكه‌م كو هه‌ڤكار و هاریكارێن من بووینه.
