دلشاد ئەحمەد بوو قارەمانێ بەریكانا سوارچاكیێ
دلشاد ئەحمەد كورێ پارێزگەها دهۆك و یاریزانێ یارییا سۆارچاكیێ ب ناسناڤێ قارەمانییا نێڤدەولەتی یا كوردستان ئیراقی هاتە خەلاتكرن، پشتی شیایی د بەریكانەیا 110سم یا خوە هاڤێتنا هەسپی ل سەر ئاستەنگان رێزا ئێكێ بهێت، د هەڤڕكیێن واندا ئەوا دوهی ژلایێ یانەیا هەولێر یا تایبەت ب یاریێ ڤە و هەڤكاری دگەل فیدارسیۆنا ئیراقێ یا سۆارچاكیێ ل هەولێرا پایتەخت هاتییە كرن.
ل دۆر ڤێ یەكێ یاریزانێ ناڤهاتی بۆ رۆژنامەیا ئەڤرۆ گۆت: قارەمانییا نێڤدەولەتی یا كوردستان ئیراق ب پشكدارییا 50 یاریزانێن كوردستان، ئیراقی و سێ وەلاتێن دی یێن جیهانی ل هەولێرا پایتەخت هاتبوو ئەنجامدان، ل سەر ئاستێ كوڕان و كچان یا ڤەكری بوو بۆ سێ شێفتێن جودا، من پشكداری شێفتێ 110سم ئاستەنگ كربوو و پشتی هەڤڕكییەكا ب هێز شیام ب سەركەفتیانە رێزا ئێكێ ب دەستڤە بینم و ناسناڤێ قارەمانیێ ژی ب دەستڤە بینم، پێنەڤێت ئەڤ دەستكەفتە ب زەحمەتا مەزن و راهێنانێن بەردەوام هاتییە و دكەم دیاری بۆ وەرزشا پارێزگەها دهۆكێ.
ژلایەكێ دووڤە ناڤهاتی دیاركر ئەو پرۆژەیێن باش هەنە ژبۆ بەلاڤكرنا ڤێ یاریێ ل پارێزگەها دهۆكێ و دێ هەموو بزاڤا كەت ڤێ یاریێ پێشبێخیت ب هیڤی نە جهێن پەیوەندیدار ب وەرزشێ و پارێزگارێ دهۆكێ پشتەڤانبن و گۆت: ئەڤ وەرزشە مفایێن خوە یێن باش هەنە بۆ تەندروستیا مروڤی و مێشكەكێ مەزن بۆ مروڤی دروستكەت و وەكو هەڤالەكی ژی بۆ مروڤی لێدهێت و ماسۆلكاژی بهێز كەت، لڤێرە ئەز سۆپاسیا بابێ خوە دكەم كو هەردەم هاریكارە و پشتەڤانێ من بوویە و دیسان كاپتنێ من یێ ڤێ یاریێ بەردەوام خوە زەحمەت دەت بۆ باشتكرنا ئاست و شیانێن من.
بۆ زانین دلشاد ئەحمەد ژبلی كو یاریزانێ یارییا سۆارچاكیێ د هەمان دەمدا ئەوە زێدەتری 20 سالە یاریزان، راهێنەرێ یارییا تایكواندۆیێ یە و چەندین ناسناڤێن ئێكێ د قارەمانیێن كوردستان، ئیراقێ و نێڤدەولەتی ئیناینە.
