دلشاد نێروەیی: ژبەر دو ئەگەران ئەلبۆما من گیرۆ بوو
هێلین سالم:
هونەرمەند (دلشاد نێروەیی) ل دۆر ئەگەرێن گیربوونا ئەلبۆما خوە یا سترانان، د دیدارەكێ دا بۆ رۆژنامەیا ئەڤرۆ گۆت: راستە ئەڤە چەند سالن ئەز مژوولی تۆماركرنا ئەلبۆمەكا سترانا مە و من ل بەر بوو بەلاڤبكەم، لێ دو ئەگەران ئەو ئەلبۆم پاشخستن، یا ئێكێ ئەز نەخۆش بووم و نشتەرگەریەك بۆ من هاتە كرن، وێ چەندێ نێزیكی سێ سالان ئەلبۆم گیرۆكر، یا دویێ ژی نەبوونا پشتەڤانیا دارایی بوو كو ئەم هەموو دزانین هەرێم كەفتە د قەیرانەكا دارایی دا، لێ ئەلبۆم هەردێ مینیت و هێدی هێدی دێ ب دووماهی ئینم هەتا رۆژا بەلاڤكرنا وێ دهێت.
هەروەسا گۆت: دەمەكی ئەز و هەڤژینا خوە بتنێ بووین و هندەك پارەیێ ژ شەهیانان بۆ مە دهات ئەم دشیاین هندەك ستران و كلیپان پێ چێكەین، د دووڤدا بووینە خودان زارۆك و هندی زارۆكێن مە د بچووك هەر ئەم د شیاین ب پارەیێ ژ شەهیانان دگەهشتە مە بەرهەمێن خوە پێ چێكەین، لێ ئەڤ چەند سالن شەهیان ژی نەماینە و زارۆك ژی مەزن بووینە و مەزاختیێن وان ژی زێدەتر لێ هاتینە، هەروەسا ئەم كرێدارین ژی لەورا یا ب زەحمەتە تۆ پارەكی راكەی و بهێی كلیپان پێ چێكەم، لێ هەر چاوا بیت ئەم دێ دبەردەوام بین، چنكو ئەڤە نێزیكی (40) سالانە ئەز یێ خزمەتا ستران و مۆزیكا كوردی دكەم و سۆزێ ددەمە وان كەسان یێن كو گوهداریا سترانێن من دكەن ب بەرهەمێن نووڤە دێ هێمە خزمەتا وان.
