دلۆپەك ژ بەحرێ
حسێنێ دەحلێنەوی
ڤیان یا دناوسكەكێ دا
شوین پەنچێن
ئەهریمەنەكی ل سەر نەخشاندینە
د مژ و مورانەكێ دا
ل دەڤێن گەلیێن كویردا
ل باهۆزەكێ دا
د رەشەبایەكا هار دا
دهێتە جەنجەركرن
د كڤانێ نێچیرڤانەكێ دا
بكرە و بكێش
بالندەیا ل ئاسمانا
دبژێرن
ل سەر دەستێن عەفریتا
بلەز دهێن!
ڤیان و ژیان
ل بەر سمێن ماهینێن كحێل
دەهمەنێن پیرە دایكێ
بویكا ل بەر پەریێ
كچا ژنوو گەهشتی
كرێت و شەرمەزار دبن.
٭٭٭٭٭٭٭
دلۆپەك ژ ئەقیانۆسی
كێلبێن ب خوین
دەریا ژ خوینێ سۆر
ل سەر سنوورا
فرشك دبن
ناف لێ دنێن كوچبەر
بەڤر ژ
رەنگێ خوینێ
گیان ژ
رەنگێ ئاخێ
پیر ژ
بێهێڤیبوونێ
گەنچ ژ
بێزارییێ
مینا بەبەغان
ل دارستانا دخوینن دبسترن
ئاوازێن شەرمەزارییێ
دژەنن.
٭٭٭٭٭٭٭
دلۆپەك ژ روومەتییێ
یێ دەست و پێ لێ لەنك بووی
گیان لێ كون كون بووی
هێز و شیان لێ خاف بووین
رۆژێن سەخت و دژوار
ژ بیردانكا وی فورمات بووی
ڤەرێژا ڤێ كەدێ
مەشتی
زبلدانەكا سكێرتێرەكێ و
دیوانا
سەرۆك چاش و ئاخایا دبوون!
